Bon Dia Aruba a acerca director di SVb, alavez encarga cu Organo Ehecutivo AZV, Dir. Edwin Jacobs, cu algun pregunta considera importante generalmente pero tambe den e actual temporada electoral. Seguidamente su contesta riba e preguntanan haci.

BDA: Den nan consehonan e organismo di supervision financiero CAft ta propone pa gobierno contempla ki aporte SVb y AZV por haci na gobierno di e surplus cu a acumula cerca nan. Pero esey no por haci sin mas, tin impedimento legal pa traspasa esaki?

EJ: Ta asina cu e LAft – Landsverordening Aruba financieel toezicht – ta prescribi cu e surplus di e sector colectivo (Pais Aruba plus e entidadnan apunta; red.) tin cu wordo usa pa reduci debe. Anto CAft ta atende gobierno cu e tin cu cumpli cu e ley. Dus eigenlijk no ta CAft ta bisa gobierno, pero un ley cu gobierno y parlamento a pasa ta bisa cu gobierno tin cu haci esaki.

Manera cu e situacion ta aworaki no por pa motibo di e ley cu no ta permiti esey. Nos ta trahando aworaki, nos a forma un comision di experto pa studia e posibilidad pa introduci na Aruba locual tin na Hulanda, cu nan ta yama ‘Schatkistbankieren’, banco di tesoreria, loke ta nifica cu na Hulanda tur instancia cu ta traha cu placa publico, dus placa cu ta bin for di gobierno of di belasting, tur locual nan tin resta, nan tin cu pon’e riba un cuenta di gobierno Hulandes, pa gobierno Hulandes por usa pa entre otro paga debe. Aworaki nos ta studiando con nos por adapta e concepto ey anto introduci esaki na Aruba, pa asina por deposita e surplusnan aki riba un cuenta na disposicion di gobierno. E ley tin cu prescribi kico e interes cu AZV y SVb lo ricibi for di gobierno pa cu esaki y con, ora cu SVb y AZV tin mester di e surplus aki, tin cu haci pa ricibi esaki. Anto den transcurso di otro aña nos ta expect cu lo pasa un ley asinaki, si gobierno acepta esaki, caminda cu e surplusnan lo bay na un cuenta di gobierno y gobierno ta paga interes na Svb cu AZV pa usa e placa aki.

BDA: Gobierno den su presupuesto multi-anual te 2029 ta proyecta un surplus di SVb di Afl. 51 miyon cada aña. Con realistico esey ta, si cada aña lo tin mas pensionado?

EJ: Esey ta un pregunta cu ta regarda gobierno eigenlijk. Nos ta manda informacion pa gobierno, anto gobierno ta publica esaki. Mi no por duna comentario riba e plan multianual di gobierno, mi no ta conoci cune tampoco.

BDA: Kico ta e situacion pa cu evaluacion si mester bay na edad di pension di 66 aña, compromiso haci den e Landspakket?

EJ: Den e landspakket ta para cu mester evalua si mester bay na 66 aña. Mi no sa pa ki tempo e evaluacion lo bini. Nos proyeccionnan ta mustra si cu ariba termino cortico no tin necesidad. E fondo ta proyecta pa tin suficiente reserva te cu final di añanan 30. Si bin reformanan chikito den ley di seguro di pension di orfandad y viudez ainda esey por bay un poco mas. Pues mi no ta al tanto pa ki fecha tin poni pa haci e estudio ey, pero por lo pronto, sigur den nos proyeccionnan, nos no ta mira necesidad pa cu e seguronan e decada aki. Kizas mester adapt’e. Tin cu cuminsa prepara si pa añanan 40, pero esey ta un mision politico.

BDA: Con ta para cu nombramento di SVb como supervisor di e ley di pension complementario pa sector priva? Den nos concepto, ta SVb so ta reuni e criterionan pa carga e tarea aki?

EJ: Te ainda, Svb no a keda apunta como supervisor di e ley di pension general, a pesar cu Ministerraad a tuma decision tres biaha pa apunta SVb. Mester bin cambio di ley, y e cambionan di ley ey ta tardando demasiado hopi, perhudicando un gran cantidad di trahadornan cu ta birando pensionado e proximo añanan, pasobra nan no tin seguridad cu nan placa a wordo deposita den un compania di seguro of den un fondo di pension.