Bon Dia Aruba a tuma nota di un publicacion di Sra. Anouk Balentina riba Facebook, y kier aclaria cu e ponencia di Balentina ta completamente incorecto.
Den su post, Balentina a publica rate card (lista di prijs) di tres medio di comunicacion. Publica rate card di un compania priva ta un acto completamente sin etica.
Tur medio di comunicacion ta depende di aviso pa subsisti, y tur reportahe investigativo di Bon Dia Aruba ta danki na nos clientenan cu ta sostene periodismo etico y di calidad. Si Sra. Balentina no tin medio y recurso pa core un campaña, e ora no mester a cuminsa cu campaña politico. No por core campaña riba costo di otro persona.
Segun Balentina, e no a aparece den ningun entrevista pasobra tur medio ta cobra pa esaki. Sinembargo, e rate card cu Balentina a publica ta exclusivamente pa AVISO, manera por observa. Pero den nos deber como medio di informacion y como promotornan di democracia, Bon Dia Aruba den ultimo simannan ta bin publicando entrevista cu nos corant a haci cu lider di tur partido. Bon Dia Aruba a ofrece e entrevista aki na tur partido sin ningun costo. Tambe nos ta publicando Plan di Partido di tur partido gratis, pa asina nos lectornan por haci un decision di voto bon informa.
Nos ta lamenta cu Sra. Balentina a scoge di ataca nos medio specificamente y directamente. E comportamento aki di Sra. Balentina ta pone duda riba e proceso di screening di partido Raiz, y riba cua base a laga un persona subi nan lista di partido.
Bon Dia Aruba ta spera cu tur partido por comporta na un nivel profesional y respetuoso durante campaña.
