Den Capitulo 4 di su Operational Report, titula Desaroyo Financiero 2023, CBA a resumi cu e activonan total a cay cu Afl. 123.4 miyon na Afl. 2,701.7 miyon (-4.7 porciento) na fin di aña 2023, compara cu Afl. 2,834.1 miyon na fin di aña 2022. A atribui e contraccion aki principalmente na un reduccion den activonan di divisa, i.e. cu Afl. 180.4 miyon (-7.4 porciento) cu tabata contraresta parcialmente pa un aumento den e balor di reserva di oro di Afl. 49.8 miyon (+13.8 porciento.)

E reduccion den activo di divisa tabata principalmente e resultado di un caida di Afl. 99.0 miyon (-4.3 porciento) den “Gobierno y otro papel” y un caida den “debe di banco y otro institucion financiero’ di Afl. 86.9 miyon (-56.7 porciento), respectivamente (Tabel 1).

Gobierno y otro papel
 E reduccion menciona di Afl. 99.0 miyon tabata atribui principalmente na transferencia cash neto den suma di Afl. 204.1 miyon for di portafolio di inversion di e cuenta coriente teni na un institucion financiero na Merca, pa cumpli cu e necesidadnan di likides di divisa di Gobierno di Aruba y banconan comercial.

Ademas, e item ‘Gobierno y otro papel’ a haya impacto negativo di un perdida di capital neto realisa di Afl. 39.7 miyon. Na mei y december 2023, CBA a ehecuta dos operacion di restructuracion pa mitiga e riesgo pa tasa di interes y reduci mas ainda e posicion di perdida no realisa di e portfolio di inversion, cu meta pa maximisa e capacidad di e portfolio pa genera entrada pa proximo añanan. Efecto di e movementonan aki tabata contraresta parcialmente pa e cambio net den balor di e portfolio di inversion den mercado (cuenta di revaluacion) (+Afl. 80.1 miyon) y entrada di interes ricibi (+Afl. 64.8 miyon).

Pa december 2023, e ‘yields’ riba e US Treasuries di 2 aña y e US Treasuries di 3 aña tabata, respectivamente, 18 punto basico y 21 punto basico mas abao compara cu fin di december 2022, resultando den ‘yields’ di 4.23 porciento y 4.01 porciento respectivamente. E caida den ‘yields’ aki tabata resultado di e expectativa di mercadonan financiero cu e Reserva Federal ta bay cuminsa baha tasa di interes pa berano 2024.

Debe di banco y otro institucion financiero
 E aumento neto di Afl. 86.9 miyon den e item ‘Debe di banco y otro institucion financiero’ ta relaciona principalmente na caida den e cuenta coriente teni na Reserva Federal New York (FRNY) (-Afl. 48.5 miyon) y Banco Central di Corsou y Sint Maarten (CBCS) (-Afl. 22.4 miyon), como tambe den e time deposit teni na un institucion financiero na Colombia (-Afl. 17.9 miyon) te cu december 31, 2023, compara cu december 31, 2022.

Di otro banda, e cuenta coriente na De Nederlandsche Bank (DNB) a aumenta cu Afl. 1.5 miyon. E caidanan menciona anteriormente tabata relaciona cu financiamento di e necesidadnan di likides denomina den divisa di Gobierno di Aruba y banconan comercial.

Reserva di oro di Banco Central
 Dia 31 di december 2023, e prijs di oro den mercado tabata USD 2,062.40 (Afl. 3,691.70) pa cada fine troy ounce, un aumento for di USD 1,812.35 (Afl. 3,244.11) pa fine troy ounce riba december 31 2022. E aumento aki di 250.05 dollar (Afl. 447.59) pa fine troy ounce a pusha e balor di reserva di oro cu Afl. 49.8 miyon na Afl. 410.9 miyon pa fin di 2023 compara cu fin di 2022.

E reduccion den pasivo y patrimonio neto pa fin di 2023, compara cu fin di 2022, tabata en gran parti e resultado di un caida skerpi den e item “deposito di residente” (-Afl. 320.9 miyon of -14.2 porciento).
E ultimo aki tabata contraresta parcialmente pa un aumento den cuenta di revaluacion (+ Afl. 129.9 miyon or + 100.0 porciento) (Tabel 2).