Perspectivanan di partido RAIZ ta enfoca riba transicion duradero pa logra prosperidad di comunidad

Di e 22 punto den e Perspectivanan presenta den e plan di partido di RAIZ, algun punto cu a sobresali ta puntonan cu entre otro ta relaciona cu Transporte, Integridad, Naturalesa y Asuntonan di Adulto Mayor, carteranan cu lider di e partido y minister demisionario Ursell Arends a carga durante e periodo di gobernacion cu Gabinete Wever-Croes II.

Adultonan Mayor ta un punto di prioridad pa mayoria, si no ta tur, partido politico. RAIZ ta enfatisa cu garantisa calidad di bida, bienestar general y cuido di adultonan mayor, ta nan“compromiso y deber moral.”

Partido RAIZ enfatisa cu nan a demostra nan compromiso cu e adultonan mayor, door di establece e prome ministerio di Asuntonan di Adulto Mayor den historia di Aruba, como tambe instalacion di Directie Ouderenzaken.

Naturalesa ta un punto di enfoke pa e partido cu ta resalta e importancia pa restaura, fortalece y mantene e relacion y conexion entre hende y naturalesa. Partido RAIZ ta reitera su compromiso pa logra un Aruba unda realmente ta biba den harmonia cu naturalesa y no solamente di e servicionan cu naturalesa ta provee na comunidad.

Nan ta subraya cu nan ta e unico partido cu tin naturalesa hancra den su statutonan y ta destaca cu a demostra cu nan ta para pa naturalesa estableciendo e prome ministerio di Naturalesa den historia di Aruba su gobernacion, stimulando balansa y harmonia.

Tema di cambio climatico tambe ta uno di importancia. Partido RAIZ ta señala cu pa añas e sistema a enfoca riba calamidad natural, pero tambe humano door di, por ehempel, situacion di refugiadonan.

Nan ta enfatisa cu mientras cu posibilidadnan di dicho calamidadnan ta existi pero no ta sigur, e efectonan di cambio climatico si ta manifestando nan mes y cu un velocidad hopi avansa y ta sigura cu nan ta e voz di resiliencia pa atende cu e efectonan di cambio climatico como prioridad pa comunidad.

Pa loke ta e tema di transporte, partido RAIZ ta resalta e importancia di esaki pa bienestar, pasobra e ta conecta hende cu e necesidad y oportunidadnan basico cu ta mehora calidad di bida. E partido ta resalta cu bon posibilidad di transporte ta sigura cu hende por yega facilmente na cuido medico, educacion, trabou y contacto social.

Un punto di esencial no solamente pa partido RAIZ pero pa diferente otro partido, y un punto di preocupacion pa comunidad ta e bienestar di animalnan. Nan ta destaca cu lo implementa e Maneho di Bienestar di Animal Aruba (MBAA) 2024-2029 pa logra yega na un comunidad cu empatia y respet pa otro sernan cu tambe ta forma parti di bida diario, pa yega na un prosperidad humano, caminda e hende y e animal su bienestar ta central den e desaroyo di e pais.