Otmar Oduber: “Discusion riba surplus pa mi ta un hilaridad”

Den un entrevista recien cu politico y lider di partido PPA Otmar Oduber Bon Dia Aruba a dirigi pregunta na Oduber tocante entre otro gasto di aparato gubernamental, surplus y costo di vivienda. Oduber a splica algun punto cu ta inclui den e vision di PPA tocante con nan tin plania reduci gastonan di aparato gubernamental, pensamento tocante e ‘surplus’ cu gobierno ta papia di dje y kico PPA lo haci pa yuda mehora e situacion di vivienda pa comunidad

Pa loke ta trata reduccion di gasto di aparato gubernamental Oduber a splica cu PPA ta enfoca riba 16 punto den nan programa pa atende cu esaki. El a splica cu como partido nan ta mira cu tin espacio pa reduci cu 12%, cu ta entre 140 y 160 miyon florin, e gastonan di gobierno cual ta un combinacion di loke por reduci como gasto y loke por crea na entrada, sin bin cu ningun tipo di medida.

Oduber a sigui splica como ehempel cu gobierno tin 32 edificio na un balor 400 miyon florin cu ta para pa mas cu 20 aña cu gobierno no ta haya nada for di nan. El a remarca cu si simplemente aplica un ley cu su persona a laga atras como minister di Infrastructura, cual ta encera e creacion di e Aruba Property Funds.

E ley aki, el a indica, a pasa Raad van Advies y cu ta cla pa bay parlamento caminda cu practicamente ta crea un Real Estate NV cu ta 100% di gobierno caminda cu ta hinca tur e edificionan aki den dje y e ora ta cumpli cu tur e normanan di Hulanda y e balor di 400 miyon florin di e edificionan aki por bay den e mercado financiero. El a sigui splica cu ta cuminsa drecha e prome cuater pa cinco edificio, por sea huur nan back cu gobierno of bende algun di nan pa haya fondo.

Oduber a resalta cu na e momentonan aki tin 32 edificio para y tempo e tabata minister el a haci inventario cu a señala cu pa e 32 edificio cu tin para aki, tin 41 contract firma di huur. El a remarca cu lo por sigui paga huur pero e ora gobierno por pag’e na su propio NV, cu den e caso aki ta e Aruba Property Funds.

Otro ehempel cu Oduber a trece dilanti ta cu lo pone den ley di contabilidad normanan pa loke ta trata gastonan maximo cu por tin den e pot di goederen en diensten. E pot aki ta inclui tur loke ta huurmento di auto, comemento, biahamento, consultancy etc. PPA ta sugeri pa pone den ley di contabilidad normanan caminda ta bisa cual ta e maximo por gasta di e presupuesto pa esaki.

Di tres ehempel cu e partido ta menciona den su vision di partido ta e hecho cu nan kier habri e LMA den sentido cu tur director di departamentonan di gobierno ta haya un dienstverleningsovereenkomst (acuerdo di servicio) y no cu nan ta keda opera como ambtenaar y ta proteha bou di e leynan di ambtenaar.

El a resalta cu partido PPA ta kere firmemente cu door di pone director di departamento riba un dienstverleningsovereenkomst e ta haci e director tambe personalmente responsabel pa e maneho cu tin cu ser hiba den e departamento y no cu e minister ta e unico cu ta carga e responsabilidad politico.

Di cuater ehempel cu el a trece dilanti ta e ‘afstoting’ di diferente departamento cu ta obsoleto den gobierno y cu no ta forma parti mas di ta un servicio publico esencial cu por pasa pa sector priva. Di mesun manera el a menciona cu tin hopi departamento cu por ser independisa dentro di e aparato di gobierno y otronan por ser treci hunto y asina por reduci gastonan drasticamente y ta haci e compania- of departamentonan aki mas eficiente di loke nan ta aworaki.

Otro punto cu Oduber a señala ta cu partido PPA ta kere cu Utilities Aruba NV mester ser termina. El a splica cu e partido no ta mira niun motibo, fuera di paga salario pa politicamente e gobierno na mando pone algun hende sinta eyden. El a remarca cu partido PPA ta propone pa WEB y ELMAR wordo uni cu un solo director y eynan tambe, el a indica, bay reduci gastonan grandi.

El a splica cu otro punto inclui den e vision di partido PPA ta pa departamento DRH bira un stichting caminda cu no solamente tin hende di gobierno den dje, pero tin otro gremionan den e mercado tambe cu ta bay ser hinca eyden pa ta e “watchdogs” caminda nombramento cu bevordering no ta ser maneha mas door di Conseho di Minister y niun minister ta ser involucra mas, si no DRH, a base di e liña cora cu e minister cu ta encarga cu DRH ta pone, ta tuma e decisionnan aki.

Por ultimo Oduber a menciona Serlimar como ehempel di un compania cu pa motibo cu gobierno no a pasa un ley cu su persona a laga atras ta den tweede ronde y ta warda riba votacion, ta pone cu Gobierno di Aruba tin cu hinca mas o menos 28 miyon florin den Serlimar tur aña. Segun el a indica na momento cu pasa e ley aki e suma ta reduci na 7 miyon florin y ta haci e compania financieramente independiente y ta opera completamente independiente di gobierno.

Pa loke ta e tema di surplus, Oduber a enfatisa cu e discusion riba surplus ta un “hilaridad” p’e. El a cuestiona con gobierno ta papia di surplus si nunca no a baha gasto di gobierno. El a subraya cu e ora e surplus aki ta “riba lomba” di henter e pueblo. El a sigui splica cu gobierno a djis bin cu BBO na frontera, cual a produci 80 miyon florin, y a bin cu medidanan cu a introduci pa aumenta cierto primanan den gobierno y a kita remedinan cu tabata riba AZV pa reduci gastonan di AZV y asina a crea un surplus.

“Surplus bo ta creele di berdad ora bo reduci bo gastonan den gobierno y di otro banda bo ta cambia bo sistema fiscal,” Oduber a remarca. El a menciona cu PPA ta para pa bay over na un BTW caminda ta cobra un biaha na frontera y despues di esey paden ta duna e pueblo un break completo riba loke ta inkomstenbelasting, baha loonbelasting, baha e winstbelasting pa comerciante pa tur hende tin mas placa cu automaticamente ta haci cu nan por absorbe e cambio di BBO pa BTW den e prome aña y despues di e prome aña ey e pueblo tin poder di compra mas halto pa e por dicidi kico e ta cumpra.

Pa loke ta costo di vivienda, specificamente e punto cu e ta casi imposibel pa ciudadanonan por yega na un cas propio den actualidad pa motibo di e prijsnan halto, Oduber a splica cu un di e problemanan grandi cu tin den e mercado di Real Estate ta e hecho cu door cu Aruba a bira hopi turisticamente, y pasobra a dicidi di trece moratorio, hendenan a bay den direccion di “home accomodations”, entre otro Airbnb.

El a sigui splica cu pa hendenan no residente di Aruba e prijs di casnan ta barata, accesibel y esaki a dolarisa e mercado di Real Estate di Aruba cu ta pone cu casnan cu tabatin un balor mas decente awor ta bira hopi mas caro pasobra hendenan ta pagando e balor eynan.

El a remarca cu un di e prome cosnan cu PPA kier introduci ta un moratorio, para e desaroyo aki y no ta permiti cu hendenan cu no ta residente cumpra Real Estate mas den futuro cu e meta pa bay huur e pa cambernan di corto duracion. Nan por cumpra cas, pero no lo por huur e mas di e forma ey.

Di toro banda, el a agrega, cu esnan cu si tin un permiso caba di no residente pa tin un propiedad na Aruba lo bin cu un forma di cobra e presion cu nan ta pone riba e comunidad, riba economia pasobra nan ta huur un propiedad como un no residente y gana placa riba dje poniendo presion grandi riba economia. “Nos ta kere cu nan tin cu paga pa esaki mientras ta laga e oportunidad pa nos propio hendenan si por desaroya nan mes mientras tanto,” el a resalta.

E otro aspecto cu el a menciona ta cu ta kere mester bin cu incentivo pa loke ta material di construccion. El a splica cu ora cambia bay na BTW no ta bay paga tanto pasobra cu BTW ta paga un biaha so na frontera y esaki ta baha e prijs di construccion na Aruba.

Por ultimo el a indica cu ta un hecho cu tin limitacion den tereno na Aruba y p’esey a cuminsa cu e maneho pa cuminsa inculca e cultura den e hendenan cu mester cuminsa biba den edificionan y biba den ‘gated communities’ manera ta sucede tur parti mundo, sobretodo si a tuma e decision cu kier a proteha algun parti di Aruba.