Diahuebs mainta, Minister demisionario di Finanzas, Xiomara Maduro (MEP) tabata presente na Departamento di Impuesto DIMP pa asina hunto cu directora di DIMP Sra. Gomez-Pieters ricibi e cargamento di plachi di number nobo.
E mandatario a saca potret cu plachi A-1 cu ta pertenece na Gobernador di Aruba pa, asina mustra e bunita color blauw di e plachi number nobo cu lo ta vigente di aña 2025 pa 2029.
Señora Pieters a informa cu den e dianan nos dilanti DIMP lo haci e controlnan necesario pa asina prepara pa parti e plachinan via un sistema di afspraak. E proceso di traha afspraak lo ta uno online, pero DIMP lo percura pa yuda nos grandinan na un manera diferente. Ta pidi pa keda pendiente pa informacion di DIMP con esaki lo wordo organisa.
Minister Maduro ta gradici y desea e ekipo di DIMP hopi exito cu e entrega di plachi di number nobo. E mandatario ta gradici tambe e compania local Retraco cu a percura pa tur plachi di number por a keda entrega na tempo.
