Den e debate electoral di e siman aki tabatin un intercambio interesante entre e lider di partido PPA y e actual ministro demisionario, tambe lider di partido Raiz, unda a discuti e situacion na empresa estatal di recoge y procesa desperdicio, Serlimar. E debate aki a conduci na algun di e momentonan mas candente di e evento. Un di e puntonan di discusion tabata e hecho cu lider di Raiz lo a vocifera cu su contrincante lo a hinca Serlimar den debe. Di su banda lider di PPA a desmenti esaki y a declara cu durante su presencia como ministro (2017 – 2019) e empresa a haya tur e placa cu a pidi na gobierno como subsidio. Esaki na varios ocasion no tabata sucede manera mester den e añanan anterior.

Como cu Bon Dia Aruba tabata dispone di e rapport di e accountant cu a ‘leak’ di algun manera na 2020, durante e aña ey y na 2021 na varios momento a publica tocante e situacion na Serlimar, cu a conduci entre otro na e peticion na corte di un ‘surseance van betaling’, cu ta e ultimo recurso pa por evita un bancarota di e compania. Tocante esey mas despues. Bolbiendo na e rapport y na loke nos a produci e tempo ey, nos a bin comproba cu e critica di e ministro demisionario si tabatin base.

Seguidamente e introduccion di nos articulo di 13 di juni 2020 cu ta splica bastante caba: “Rapport di accountant Grant Thornton tocante e situacion financiero di Serlimar ta mustra cu e debenan ta principalmente cu gobierno (impuesto, prima, pension) y cu e contract di lease pa e trucknan. Na banda di entrada, e obstaculo mayor ta e no cobranza pa residencia, pa cual no ta parce cu tin un solucion.”

Despues den e mesun articulo ta duna mas informacion di con e debe di Serlimar a crece a traves di añanan: “Durante varios aña e debenan di e compania a keda bastante modera, tanto debe a largo plazo como a corto plazo. E debe a largo plazo mas halto den e añanan anterior tabata na 2013 tempo cu esaki a yega na Afl. 4 miyon, pa baha atrobe den e añanan siguiente, pa explota despues na 2019 cu Afl. 15,8 miyon. E debenan a corto plazo a conoce un crecimento mas gradual, di Afl. 8,2 miyon na 2015 te Afl. 25,3 miyon na 2019. E ultimo aña aki a acumula un suma total di debe di Afl. 41,1 miyon, mientras cu na 2018 ainda e debe tabata menos di mitar di esey: Afl. 20 miyon.”

E rapport di accountant ta referi na e contrato cu un compania di carrental pa lease di e trucknan pa Serlimar, cu e suma di Afl. 11,134,898, e parti mas grandi di e debenan a largo plazo. Tambe ta aparece e prestamo pa 20.000 baki di sushi (Afl. 2,336,945); e prestamo pa e incinerator (1,561,892); y un prestamo menor di Afl 76,944 pa entre otro un wheelloader y excavator. Hunto bon pa Afl. 15.836.552, tur a base di contrato cera na aña 2019, segun relato di e accountant. E ex-ministro y lider di PPA a renuncia na december 2019, despues di tabata e mandatario responsable desde cu a forma gabinete Wever-Croes 1 na casi final di 2017.

Awor, por surgi e interogante pakico nos ta dedica atencion na e asunto aki. E contesta ta cu nos trabao como prensa ta pa publica segun berdad y mantene e criterio aki tambe pa esnan cu ta aspira di yega na (co)goberna nos pais. Den e caso aki den e debate a usa algo cu ta berdad, e mesun rapport di accountant ta comproba cu durante e dos añanan cu e lider di PPA tabata responsable, Serlimar a haya e subsidio pidi y hasta na 2018 a haya como Afl. 3,5 miyon mas, pa cual sigur e ministro di e tempo ey a haci peticion. Pero fuera di esey, nos no ta mira pakico e no a simplemente defende su maneho, cu pa gran parti tabata conoci. Si el a encontra un situacion tal na Serlimar na fin di 2017 cu tabata requeri un intervencion fuerte, pa cual motibo a cera e contratonan ey pa e compania por opera, nos no ta mira pakico mester a trata di sconde esey.

Surseance

E situacion cu su sucesor (di mesun partido POR) a bin haya, tempo cu e rapport di accountant tambe a keda cla, a opta pa pidi corte surseance van betaling, e suspension di obligacion di paga debe, pa por ehecuta un intento pa salba e empresa. Despues di e retiro di e ministro aki, na 2020, den e siguiente añanan e proceso na corte a cana su caminda y a resulta den un rescate di Serlimar. Cu esey e problemanan a termina pa Serlimar? No, pasobra te awe e empresa mester bay cada aña cerca gobierno pa pidi subsidio. Pa 2025 Serlimar ta presupuesta pa Afl. 21 miyon di gobierno, cu e nota acerca cu no ta trata subsidio so, sino tambe pago pa e servicio cu Serlimar ta brinda Pais Aruba.

Por constata cu ainda tin politico cu ta carece di e madurez pa discuti loke realmente ta importante; esey pa Serlimar ta keda loke e mesun rapport di accountant ta constata: cu e pago deficiente di e clientenan individual, e ciudadanonan, ta laga cada vez un bashi den ingreso cu e compania lo mester haya. Lamentablemente practica ta mustra nos cu debate, ni electoral ni despues den parlamento, ta yuda pa trece dilanti loke realmente ta relevante. Nos no ta avanza.