Un tema cardinal den e ciclo di eleccion actual ta den reduci costo di bida y baha gasto di gobierno. Den e pensamento aki, lo siguramente tin oportunidad grandi pa locual ta e uso di Inteligencia Artificial (AI) den caso tur sector di Aruba su economia, esta di Gobierno, pero tambe salubridad y sectornan priva.
E binidero ola di automatisacion cu AI lo por trece por directamente y tambe indirectamente baha gastonan pa consumidor, gobierno y pa empresanan local. Pero na mesun momento lo tin peliger pa esnan cu lo “wordo weg ge-automatiseerd”. Como sociedad e ora nos lo tin e tarea pa pensa bon con nos lo vang op e grupo grandi aki y con por ehempel nos por haci uso di educacion pa “upskill” tur esnan cu lo wordo afecta door di e tendencia di automatisacion.
Baha gasto den tur sector
Segun un analisis hopi amplio di e Banco di Inversion renombra “Goldman Sachs”, AI lo por hisa crecemento economico na nivel global cu casi 7% y na mesun momento hisa productividad laboral cu 1.5% den manera structural. Si e calculacionnan aki ta cuadra e impacto global y tambe pa Aruba lo ta enorme.
E lo encera cu lo por baha gasto den casi tur sector di economia, incluso aparato gubernamental, sector di salubridad, y casi tur sector priva. Tur esaki lo traduci su mes den mas bienestar directamente pa pueblo ambos directamente y indirectamente door di varios efecto spillover.
Analisando e situacion di Aruba, cu ta uno sumamente dificil den hopi area, door di por ehempel nos debe nacional, escasez di labor cualifica, nos necesidad pa diversifica nos economia. Nos mester conclui cu Aruba como pais mester enfatisa e tendencia di automatisacion cu man habri.
Reto: Kico lo haci cu trahador cu no mester di dje mas?
Na mesun momento, nos mester reconoce e riesgonan cu esaki lo trece pa simplemente bisa, tur e trabao humano cu no lo ta necesario mas. Tambe nos mester zorg como gobierno/pueblo pa tur e prosperidad cu automatisacion trece wordo distribui den un manera husto y pa full pueblo por gosa di su frutanan.
Segun e mesun rapportnan di Goldman Sachs mas cu 70% di trabao cu nos conoce awo lo por wordo automatisa completamente of parcialmente. door di esaki lo tin mester den manera sumamente urgente un enfasis hopi grandi riba educacion di adulto den añanan cu ta bin.
Upskilling & educacion
Vooral trabaonan legal, back office y accounting lo sinti un impacto enorme door di automatisacion di AI. E lo ta imperativo pa sociedad pa vang-op e gruponan grandi laboral aki y “upskill” e trahadornan den cuestion.
E mesun ola den automatisacion lo crea oportunidadnan inmenso den forma di trabaonan nobo, pero tur e ocupacionnan nobo aki lo mester tin skillsets moderno y up-to-date. Dus un gobierno nobo, mester no solamente abarca AI cu man habri pero tambe pone hopi enfasis mes den educacion di adulto.
Universal AI Tax & Universal Income
Na delaster luga e lo ta un imperativo inmenso pa zorg cu tur hende den pueblo gosa di e frutanan di AI y no solamente grupitonan elite. Pa hopi añanan caba partidonan manera PvdA na Hulanda por ehempel a propone e idea pa bin cu un impuesto universal pa AI y cu esaki lo wordo redistrubui pa pueblo. Den e añanan cu a pasa nos por nota cu varios Silicon Valley CEOs tambe ta steun conceptonan asina.
Dus por ehempel si AI trece 100 miyon florin pa aña den beneficio economico pa Aruba, lo por in un belasting special di por ehempel 15%, cual lo wordo distribui den manera directo pa pueblo via un plan di Entrada Universal.
E añanan cu lo bin ta bay ta crucial pa Aruba y gobierno siguramente mester tin strategia & plan na nivel sumamente halto intelectualmente y no e proyectonan di kleuterschool cu nos lastimamente ta wak den e delaster añanan.
Ta ora pa cambia e Kleuterschool cu ta Cocolishi y upskill e edificio aki den un VWO, locual pueblo di Aruba no solamente merece pero ta tambe lo ta sumamente necesario pa bienestar di nos pais.
