Segun parlamentario Tromp: E mata tabata un gesto pa mustra prome minister demisionario cu e mata di corupcion ta creciendo den su cura y e tin cu bay snoei

Recientemente Bon Dia Aruba a combersa cu parlamentario y lider di partido MAS, Marisol Tromp, ken a elabora riba e tema di encuentro publico den parlamento tocante metemento politico den OM y finalmente a contesta e pregunta kico ta e motibo cu el a hiba un mata den parlamento pa prome minister demisionario.

Dia cinco di november ultimo prome minister demisionario, Evelyn Wever-Croes, tabata den parlamento pa un encuentro publico pa duna un splicacion y contesta pregunta tocante supuesto metemento di parti di e mandatario den organo autonomo, Ministerio Publico.

Parlamentario Tromp, hunto cu colega di partido Aquannette Gunn y colega parlamentario Miguel Mansur, a pidi e reunion publico (OV) cual despues a ser cambia pa un encuentro publico (OB) pa supuesto motibonan di seguridad.

Durante e debate politico di Camara di Comercio prome minister demisionario a bisa cu Tromp a yama reunion pa metemento den OM pero despues no kier a papia di OM. E ponencia aki, Tromp a remarca, no ta corecto. “Minister president ta papia cu pueblo manera cu ta mucha chikito, manera e ta pensa cu pueblo ta dom,” Tromp a señala.

El a splica cu durante e reunion su colega Aquannette Gunn a haci un cantidad di pregunta dirigi riba e topico di metemento politico den OM. El a indica cu nan a palabra e trabou y durante e prome tanda Gunn a enfoca riba e punto di metemento politico den OM y su persona a dirigi riba metemento den entidadnan, en general, y a enfoca den e rapport cu Algemene Rekenkamer Aruba (ARA) a traha.

Parlamentario Tromp a splica cu den e rapport aki tin preto riba blanco skirbi cuanto metemento politico den tur e entidadnan aki a conduci na un situacion financiero desastroso den nan, y tin di nan cu practicamente bancarota.

El a señala como ehempel Serlimar, cu segun el a sigui splica ta danki na e surseance van betaling e tempo ey na 2020, tempo e tabata minister, cu hunto cu e board di Serlimar a tuma un decision cu no por a sigui asina y mester a rescata e luga. “E ta mustra bo eigenlijk cu no ta den OM so, eynan tambe door di gobierno. Esey ta loke nos a tackle den reunion,” el a destaca.

Tromp a enfatisa cu nan a trece dilanti e tema di metemento den OM, pero como a reparti e trabou su colega y su persona, y e ora prome minister demisionario a haci manera cu Tromp no tin gana di papia riba dje. El a subraya cu e ta un topico cu preto riba blanco ta mustra e carta caminda cu OM ta bisa cu prome minister ta yama y puntra nan informacion.

Den e mesun reunion aki Tromp a trece un mata pa prome minister demisionario, locual a capta hopi atencion y hopi tabata puntra kico tabata e motibo en realidad cu el a trece e mata den parlamento.

Tromp a splica cu mata tabata un gesto y cu ora e ta bay hiba su discurso e tabata pensa riba cuanto cos a pasa den ultimo añanan, e diferente politico cu a haya nan mes den problema y casonan di corupcion den departamentonan, entre otro.

El a señala cu cada bes prome minister ta bay den parlamento y ta ataca esnan cu ta haci e actonan aki y ta menciona e casonan, menos si nan ta di su propio partido.

Tromp a menciona cu esaki ta loke a pasa recientemente relaciona cu e caso Moringa, riba cual, e parlamentario a subraya, prome minister demisionario no a bisa ni un solo palabra di dje, locual el a expresa el a haya straño. “Esaki ta un topico unda practicamente bo ta bisa bo ta e mama di integridad, abo a bin cu e departamento, bo ta bringa corupcion y tur loke cu sucede e ta papia di nan y riba esaki tabatin silencio,” el a enfatisa.

El a sigui splica cu ora el a lesa e informacion di e caso el a haya a sa cu ta trata un caso di DIP, cu ta resorta directamente bou dje cu e prome minister demisionario ta bisa e ta depolitisa, pero segun Tromp ta resalta no tin depolitisacion pasobra e ta un departamento cu un minister ta keda responsabel p’e.

Tromp a indica cu talbes e minister no ta firma, ta apodera un hende pa firma p’e, pero na final di dia e minister ta keda e responsabel pa e departamento y esey no ta depolitisacion. “Esaki ta un departamento cu abo ta keda responsabel, ora tin un caso den corte ta abo como minister ta responsabel, y no ta e departamento so,” el a resalta.

Pues e gesto di e mata di parti di Tromp, el a enfatisa, tabata un simbolo pa mustra e prome minister demisionario cu “e mata aworaki ta creciendo den su cura y mester bay snoei.”

Ta conoci cu den pasado Tromp a trece dilanti varios caso di corupcion, a saca na cla “varios spirito for di den cashi”. A puntra e parlamentario si tin mas tin mas spirito den cashi of a wak tur loke mester a wak di e tempo ey.

Tromp a remarca cu tin mas spirito y “nan ta cana rond y ainda den cocolishi”. El a splica cu e tempo ey loke nan ta yama spirito, y te ainda ta ser referi na dje como spirito, ta spookambtenaar. E concepto aki ta nifica cu un persona tin un trabou y den e caso aki e no ta produci of den algun caso e no t’ey mes, e persona no ta aparece.

“Mi ta kere ta algo cu mester actua contra dje y ta un prueba cu tin spirito aki na Aruba,” el a enfatisa.

Pa loke ta e topico di Eagle LNG, Tromp recientemente a menciona cu e lo traha pa realisa un investigacion parlamentario alrededor di e contract di Eage LNG. A puntra e parlamentario pakico no a considera pa haci esaki prome ora a firma e acuerdo secreto

El a splica cu e tempo ey supuestamente tabatin un non-disclosure agreement, esey ta locual tabata ser bisa pasobra e tempo ey, el a indica, cu tabata desea y papia y haya sa opinion di e ex director cu a ser kita cu “golden handshake.”

El a sigui splica cu e tempo ey cu a hiba e discusion, mas cu claro parlamento kier wak e contract, pero no por a wak e y esey a haci’e dificil pa tuma un decision cu ta involucra mas cu 2.5 biyon florin, hasta mas cu esey, sin por wak kico exactamente ta loke ta ser poni riba papel.

“Como miembro di parlamento nos no ta haci esey. Tabatin parlamentario cu a dicidi di sostene, y den e caso aki nos a vota contra, y contra pasobra no tin claridad. Pa nos e tabata mustra mas mane un friends and family, un nepotismo cual a bin resulta tambe cu e ta,” el a resalta.

El a enfatisa cu un encuesta parlamentario ta un herment cu parlamento tin y cu parlamento por usa ora cu, particularmente, ta ser bisa cu tur cos ta okay pero despues ta resulta cu no ta okay.