Awe 20 di november mundo ta celebra Dia Internacional di Derecho di Mucha. Un dia cu cada aña ta haya mas atencion for di comunidad na Aruba y cu ta ser celebra cu varios actividad pa conscientisa y informa e poblacion tocante derechonan di mucha.

E dia aki ta marca e adopcion di e Tratado di Derechonan di Mucha na 1989. Derechonan di mucha ta derechonan humano. Nan no ta negociabel y universal, pero na hopi luga rond mundo awendia derechonan di mucha ainda no ta ser mal comprendi, desconsidera of hasta nenga y ataca.

Na Aruba pa varios aña caba varios organisacion y fundacion ta pone enfasis riba e importancia di derechonan di mucha. Desde 2016 Aruba tin un Comision Vision Pedagogico cu tin como meta pa formula y promove e Vision Pedagogico na Aruba. E comision aki ta consisti di cinco organisacion cu tin como tarea principal sostene mayor. E organisacionnan aki ta Departamento di Asunto Social, Fundacion Pa Nos Muchanan, Stichting Wit Gele Kruis Aruba, Fundacion Respeta Mi y Tienda di Educacion.

E organisacionnan aki conhuntamente cu 30 otro organisacionnan den tereno social ta forma parti di e Plataforma Vision Pedagogico y nan ta traha duro pa ofrece diferente servicionan pa sostene mayornan y famianan na Aruba durante henter aña.

Den un entrevista cu Fundacion pa nos Muchanan, Felisha Ponson, Pedagogisch Consulent, a elabora tocante e trabou y iniciativanan cu Fundacion Pa Nos Muchanan ta realisa pa loke ta trata e tema di derechonan di mucha.

Ponson a splica cu Fundacion Pa Nos Muchanan ta haya hopi invitacion di scolnan relaciona cu e tema ey. “Tur aña nos ta wak mas y mas scol ta invita nos, y otro organisacionnan tambe, pa bay den klas y papia tocante e derechonan di mucha y bo tin cu trece esey den un manera un tiki mas facil pa e muchanan compronde,” el a indica.

Apart di esaki, el a agrega cu tin mayornan cu ta bay na e oficina di e fundacion pasobra nan yiunan ta haci spreekbeurt tocante derechonan di mucha, locual ta demostra cu e informacion y e topico ta yegando cada biaha mas cerca di e muchanan, di varios forma.

Banda di esey, Ponson a splica cu nan tin otro actividadnan cu nan ta realisa como parti di e Comision Vision Pedagogico. Como parti di e iniciativa di e Siman di Lantamento di Mucha, e comision ta organisa diferente actividad pa publico relaciona cu Dia Internacional di Derechonan di Mucha.

Desde 2018 Aruba conoce e Siman di Lantamento di Mucha y a scoge e siman aki hustamente pasobra e ta inclui e fecha 20 di november. Durante e siman aki e organisacionnan ta tuma e oportunidad pa enfatisa e importancia di algun punto importante pa lantamento di mucha.

Ponson a sigui splica cu Fundacion pa Nos Muchanan ta realisando hunto cu Tienda di Educacion un actividad special pa mamanan cu ta den KIA. E ta un actividad unda e mamanan den KIA por comparti cu nan yiunan pa nan por celebra hunto den famia pasobra un di e derechonan di mucha ta cu e mucha tin derecho pa ta hunto cu su famia.

Pa loke ta e trata e conocemento den comunidad tocante derechonan di mucha den comparacion cu añanan anterior, si ta mira cu esaki a bira mas popular, Ponson a splica cu tin basta aña cu ya caba e tin un enfoke, specialmente na scolnan, riba e derechonan di mucha, specialmente den luna di november.

“Mi ta haya cu cada aña e ta bira mas y mas importante. Pa basta aña caba e ta algo cu ya ta popular, dia di mucha, y semper tin actividadnan. Mi ta haya si cu tur aña e ta bira mas y esey ta super bon pa e muchanan ta na altura di nan derechonan,” el a subraya.