Recientemente minister di Defensa Hulandes, Ruben Brekelmans, a dirigi un carta na presidente di Tweede Kamer den cual e ta presenta e resultadonan di investigacion historico realisa tocante un accidente di mortero (arma di artileria cu ta tira proyectilnan explosivo) cu a sucede na Aruba na 1961.
Den su carta e minister a splica cu riba 31 di augustus 2022, e Hunta di Seguridad di Hulanda (OvV) a instrui mi predecesor den funcion, den luz di e resultadonan di OvV tocante e accidente di mortero di 2016 na Mali, un accidente di mortero na Aruba na 1961 mester ser reconsidera.
E motibo pa esaki tabata cu OvV a ser poni na altura pa un familiar di un di e victimanan di e di accidente di mortero na Aruba, a señala aparente similaridadnan entre e dos accidentenan.
E mandatario a indica cu su predecesor a pidi despues e Instituto di Historia Militar di Hulanda (NIMH) pa haci investigacion historico riba e accidente na Aruba. Den e investigacion aki e NIMH kier a actua mas independientemente posibel, por lo tanto a usa material original cu a ser suministra door di e familiar cu a sobrevivi, pero no a probecha di e oferta di e pariente cu e sobrevivi pa duna un contribucion activo na e investigacion.
E circunstancianan di e accidente ta mustra cu dia 11 di juli 1961, mariniers tabata den practica na e tereno di entrenamento di California na e extremo noordwest di Aruba. E ehercicio a tuma luga como parti di e entrenamento di dos mariniers recluta. Den oranan di mainta nan a practica cu e mortero di 60mm. Den oranan di atardi
nan a cuminsa practica cu e mortero di 81mm. Un accidente a sucede durante e ehercicio aki
na unda tres soldaat di Cuerpo di Marina a muri y dos otro a keda gravemente herida.
E investigacion historico di NIMH a enfoca riba tres aspecto di e accidente: e tempo di e investigacion conduci pa marina, e trato cu e victima- y familiarnan a ricibi, y e posibel similaridadnan cu e accidente di 2016 na Mali.
NIMH a conclui cu e splicacion duna na momento cu e accidente a ser causa pa e prome granada for di e punto di candela y a bin den contacto cu e di dos granada, cu a dal e ayudante den e curso di e mortero trempan, ta en berdad mas probabel, aunke un splicacion diferente no por ser descarta completamente. E resultado di investigacion ta indica cu mester tene cuenta cu otro factornan cu por a contribui na e accidente.
NIMH a splica cu como resultado di e accidente, e reglanan di seguridad na final no a ser ahusta. Instruccionnan a ser duna pa haci e personal mas consciente di e riesgonan y pa informa nan y enfatisa e importancia di aplica proceduranan rigurosamente.
E investigacion a señala cu autoridadnan naval, den e aspecto di cuido despues di accidente na e mayornan di e marinero cu a fayece cu a ser considera responsabel pa e accidente, tabatin deficiencianan serio.
Pa loke ta e investigacion di e Marina Real, NIMH a indica cu inmediatamente despues di e accidente, a cuminsa cu un investigacion di parti di marina. Dia1 di september 1961
Marina Real a conclui cu e accidente tabata debi na cargamento di e mortero mucho lihe di parti di e soldaat encarga cu esaki. Segun e investigacion aki prome cu un granada a ser lansa for di e tubo, e siguiente granada a ser carga caba.
Segun e Marina Real, e accidente no tabata debi na e otronan soldaatnan envolvi den ehercicio di tiramento. E rapport di investigacion di NIMH ta mustra cu e Marina Real
a saca e conclusionnan aki mucho lihe. Durante e investigacion, preguntanan importante tocante e circunstancianan rond di e accidente a keda sin contesta. Contesta riba e preguntanan ey por tira luz nobo riba e accidente y e rol di e cargado den dje.
E rapport di NIMH ta mustra cu tabatin suficiente evidencia ta indica cu tabatin circunstancianan 63 aña pasa cu a contribui na e accidente, pero cu no a ser investiga mas profundo. Como resultado, durante e investigacion preguntanan tocante e nivel di educacion y preguntanan tocante e cantidad di granada y calidad di e municion a keda sin contesta.
P’esey NIMH ta recomenda pa haci investigacion riba e mecanismo di seguridad di e granada cu a usa e tempo ey pa posiblemente determina si esaki a fracasa. Sinembargo, e mortero y e municion asocia a ser kita for di servicio net despues di e accidente pasobra nan a ser reemplasa sistematicamente pa un tipo nobo. Pa e motibo aki e conseho di NIMH no ta posibel.
E resultadonan di e investigacion ta señala cu pasobra e preguntanan tocante municion a keda sin contesta y no a tene na cuenta cu e circunstancianan rond di e accidente, Marina Real a conclui incorectamente na 1961 cu e accidente tabata solamente debi na un eror di cargamento di e soldaat cargado.
Pa loke ta trata con e Marina Ral a trata cu e familiarnan di e soldaat cu a fayece, e rapport ta indica cu autoridadnan cu a mester a duna cuido na e familiarnan di e soldaat cu a fayece no tabata na standard.
Segun NIMH un rato despues di e accidente, e mayornan di e mariniers cu a keda herida
a ser informa pa medio di carta tocante e status di nan yiunan y e circunstancianan di e accidente. Sinembargo, mayornan di e cargado y tirado no a ser informa tocante e rol cu nan yiu homber, segun e Marina, a hunga den e accidente. Solamente despues di seis luna e famia di e marinier cu tabata e cargado a ser informa tocante e resultadonan di e investigacion, pa motibo di e rol atribui na dje den e accidente. Marina tampoco no a contesta e pregunta di e famia si tabata posibel pa trece e restonan mortal Hulanda, of pa permiti e famia haci e graf limpi durante bishita na Aruba.
Minister di Defensa Brekelmans a pidi un disculpa pa e estado di cosnan aki. A remarca cu e a marinier a cumpli cu su tarea segun su miho conocemento. Su rol den e accidente por a ser mira den un contexto mas amplio e tempo y mayornan di e marinier mester a biba
cu e conclusionnan di e tempo ey.
Por ultimo e minister di Defensa ta enfatisa cu nan haya sa di accidentenan, sin importa con hopi tempo pasa nan a sucede. E conclusionnan di NIMH ta enfatisa e importancia di haci investigacionnan cuidadoso y paga tino na e victimanan y nan miembronan di famia.
