Geoffrey Wever di partido Futuro: “Mi tin derecho di splica pueblo kico mi a haci ultimo tres aña”

Recientemente, Bon Dia Aruba a combersa cu candidato #2 riba lista di partido Futuro, y minister demisionario di Asunto Economico, Desaroyo Sostenible y Comunicacion, Geoffrey Wever, tocante su logronan como minister y su aspiracionnan pa e siguiente etapa di su carera politico.

Geoffrey Wever a drenta politica cu Partido Raiz, y a fungi como minister den Gabinete Wever-Croes II den e coalicion MEP-Raiz. Sinembargo, awo Wever ta campañando hunto cu su partido nobo, Futuro, y entre comunidad a surgi e critica si Wever “ta campañando pa Futuro cu logronan di Raiz.” Pa esaki, Wever a responde: “Mi a traha tres aña como minister. En berdad mi a wordo poni eynan como Raiz, mi tabata parti di Raiz y mi a yuda Raiz drenta den parlamento y gobernacion.” Sinembargo, e ta enfatisa cu “locual a logra den mi ministerio ta mi logronan. Naturalmente, un logro di un minister no ta un logro di un persona so, ta ful un team rond di dje, departamentonan, coleganan minister, parlamentarionan. Dus hopi biaha nan ta wordo presenta como logro di un persona, pero nan ta logronan hopi biaha toch di un constelacion mas grandi.” Ademas, e ta considera cu e tin derecho di “splica pueblo kico mi a haci ultimo tres aña, hasta awo cu mi ta cu un otro partido.” E ta rechasa e critica cu ta campañando pa Futuro cu logronan di Raiz, “pasobra ta cosnan cu ami a logra. Mi no ta campaña cu cosnan di otro hende, ta cosnan cu ami a logra, cosnan cu ami a pone como maneho y cu ami a traha tres aña riba dje.”

Wever ta opina cu pueblo por confia cu e mesun strategia, balor, pensamentonan lo continua den Wever su proximo etapa politico tambe. “E persona no a cambia, mi ta e mesun hende ainda. Bo tin cu wak kico mi a haci ultimo tres aña, wak con mi a hiba politica, y wak kico mi a logra, y si bo ta haya esey tabata bon, bo sa cu bayendo dilanti e no lo ta diferente. Mi ta kere e situacion central, bo tin un judgement riba locual mi a haci y con mi a haciele.”

“Ursell Arends ta un persona hopi agradable, hopi placentero y un amigo”

E decision pa bandona un partido, y join otro, ta uno dificil. Tocante e decision pa bandona partido Raiz, Wever a bisa cu hunto cu lider di Raiz, Sr. Ursell Arends, a bay di acuerdo cu no lo bay mucho den detaye tocante e motibonan tras di salida di Wever, bisando solamente cu tin un vision diferente riba politica. “Pero pa pon’e den contexto, e no tabata un decision facil, specialmente tambe door di un relacion profesional y amistoso cu mi a construi cu Ursell Arends tambe. E ta un persona hopi agradable, hopi placentero, y un amigo. Ora bo ta realisa ‘mi tin otro vision, mi kier algo diferente den politica cu mi no ta kere por logra den constelacion di Raiz’, e ta hopi dificil pa bo bay den e combersacion ey, pa bo splica bo mes.” Wever ta enfatisa cu no ta haci algo asina sin mas, sino e tabata un decision cu a tuma su tempo, y mester a genera e curashi pa hacie, pero na final no tin mal sentimento pa cu Arends. “Na final di dia mester a hacie y hacie na un forma respetuoso. Mi ta contento cu nos por a mantene nos relacion di amistad y relacion profesional, pasobra e respet pa e persona no ta cambia pasobra bo tin un otro vision politico. E respet pa e hende ta keda, e respet pa ken e ta, kico el a logra. Na final di dia ta cu Ursell mi a drenta politica, dus mi tin un aprecio y gratitud enorme p’e, y esey no lo cambia.”

Asina el a realisa tambe cu e tin un alineacion cu Sra. Gerlien Croes. Door cu Croes tabata un parlamentario, hopi biaha e tabata critico di e gobierno di cual Wever tabata parti, pero toch a mira cu tabatin sinergia “den e forma con bo kier goberna bo pais.” Wever a bisa cu a reconoce e manera di hiba politica y gobernacion, y e principionan di Croes, y esaki “toch a duna nos espacio pa a pesar cu nos tabata contrincante politico, toch nos tabatin respet pa con cada un di nos tabata hiba politica of nos pensamentonan.” Y esaki a conduci na e pensamento cu por join otro y forma un partido hopi mas fuerte y trece un cambio den politica di Aruba.

“Afiliacionnan di pasado no ta bay tin impacto riba e constelacion nobo di un eventual gobierno”

Pero e decision di Wever pa join Futuro a asombra hopi den comunidad, y no menos pa e sombra di partido AVP cu ta cay riba Croes y su partido nobo. No solamente pasobra Croes a sali di partido AVP, sino pasobra hendenan den e partido ta inclui Angel Bermudez, Duque Croes y Muzanine Wever, cu ta un sorto di ‘herencia’ di e partido. Contestando si esaki a presenta dificultad ideologico, Wever a bisa cu no, pasobra Croes a scoge mas cu un aña pasa caba pa bandona e partido “pa un diferencia di opinion.”
“Si e tabata kier ta den AVP, lo e lo a keda den AVP. El a dicidi pa tuma un stap cu curashi pa bandona un organisacion cu e no ta kere mas den dje, y tampoco tabata facil, pero el a haci e stap aki y cuminsa cu su mesun organisacion politico.”

Wever ta enfatisa cu lanta un partido ta un proceso dificil y largo y cu “mester tin hopi dedicacion, hopi sacrificio.” Segun Wever, den e constelacion y cooperacion di e partido, “Futuro no ta un verlengster di AVP.” El a recorda cu e mes a ricibi e mesun critica, cu tabata herencia di MEP tempo cu el a bay den Raiz pasobra e tabatin famia cu tabata parti di MEP, pero “toch mi tin mi mesun pensamento politico, y mi a bay mi mesun caminda den politica. Y nos a end up ta forma un gobierno cu MEP e tempo ey, pero e tipo di decisionnan ey no ta defini ken e partido ta, ken e politiconan na.”

Wever ta bisa cu e ta kere cu eleccion proximo ta bay tin “sorpresa”, y cu si Futuro forma parti di un coalicion, e lo kier un coalicion amplio di 12 of 13 asiento “pa ningun parlamentario haya e control riba un gobernacion of bira un malcria of ban bisa, exigi.” E ta kere cu un constelacion mas amplio por goberna 4 aña den un forma serio, “cu e pais no ta cay den muchachada, den chantahe.” Y pa preveni esaki, ta cera un acuerdo di gobernacion “cu tres, cuatro partido” den cual ta defini e puntonan specifico kico ta bay logra, con ta bay hacie, ken ta bay haci kico y den ki timeframe, cuanto placa ta aloca den presupuesto pa haci esey. Y ta pone esaki den un contract cu diferente articulo pa cada tema. “Bo ta evita cu durante gobernacion ta bay tin discusion unabes cu gobierno ta cera, anto e ora hendenan no ta coopera mas.” Segun Wever, tanten cu tin bon definicionnan den e acuerdo di coalicion, ta nifica cu ningun partido, incluyendo MEP of AVP, lo tin un influencia desproporcional. Y e ta pensa cu lo por forma coalicion cu cualkier partido cu ta comparti e vision y principionan di futuro, “y decisionnan di pasado of afiliacionnan di pasado no ta bay tin impacto riba e constelacion nobo di un eventual gobierno.”

Den oposicion, “cada un a scoge nan mesun caminda”

Sinembargo, e idea di un base amplio ta parce leu di por keda realisa mirando e cantidad grandi di partido nobo, en bes cu politiconan di oposicion por a uni den un of dos partido cu un lista mas largo y un base di sosten mas amplio tambe. E fragmentacion aki por habri porta pa MEP y AVP toch keda como e partidonan mas grandi na Aruba. Wever a indica cu e resultado ta papia pa su mes. “Cada un a scoge su mesun caminda. Mi ta kere bo tin politiconan cu tabata parti di organisacionnan caba, por ehemplo Sr. Otmar Oduber cu tabata parti di AVP, bo tin Sra. Marisol Tromp cu tabata parti tambe di AVP como MEP, dus ta bira dificil pa esunnan aki mi ta kere bay back den e constelacion unda nan tabata, pasobra ya tabatin diferencia di opinion. Eigenlijk lo mester puntra nan, pero mi ta kere cu tabata logico cu nan ta bay den nan mesun direccion.”

Wever ta enfatisa cu den politica “ta deal cu caracter di hende, ta hende nan ta na final di dia. Manera di traha, manera di comunica cu otro. Ami mes tin politiconan den MEP, den oposicion, den otro partidonan cu bo tin hopi aprecio pa nan, cu nan ta hendenan agradable, profesional, y cu ta trata bo bon y honesto, y tin di nan no. Hopi di nan no. E ora e ta depende di e persona cu bo ta bin cune, tambe ki tipo di constelacion bo kier.”

Den segundo parti di e entrevista den nos siguiente edicion, Wever ta papia tocante e propuestanan di partido Futuro pa economia, vivienda y seguridad na Aruba.