Ayera mainta politico Otmar Oduber tabata den corte hunto cu su ekipo di abogado pa pidi hues declara Ministerio Publico no admisibel den caso Flamingo, cual ta poni pa ser trata dia 6 di december, mesun dia di eleccion parlamentario den cual Oduber tambe ta participa.

Den declaracion na prensa pafo di Palacio di Husticia abogado di Oduber, Vito Carlo a duna un splicacion tocante e motibo pakico e ekipo di defensa di Oduber a tuma e decision di entrega e peticion aki na hues.

Segun Carlo a splica, nan a pidi hues di antemano, sin trata e caso pa declara Ministerio Publico no admisibel pa motibo cu a proposito e entidad a trapa cierto leynan fundamental den un caso penal.

Abogado Carlo a recorda cu caso Flamingo a cuminsa cu shete acusacion di BCI y cu awendia ya Oduber no ta sospechoso mas pa e acusacionnan aki, pero si no pa full otro cos.

El a remarca cu Ministerio Publico sabiendo cu e informacion cu nan a ricibi tabata falso y cu nan no por a control’e, toch a dicidi pa us’ele pa drenta Oduber su cas y haci huiszoeking, pa detene Otmar y interoga su persona, y a proposito gaña un hues comisario cu esey ta e caso.

El a splica cu esey ta e hues comisario cu a duna okay pa nan drenta Oduber su cas. Abogado di Oduber a hasta bisa cu si e hues comisario tabata sa e tempo ey cu e informacion di BCI tabata falso, e nunca lo a duna permiso pa drenta e cas ni pa laga Oduber keda deteni e tempo ey.

Abogado Carlo a sigui splica cu na momento cu otro hues comisario a trata e peticion pa Oduber keda 16 dia mas deteni, pero na luga a laga Oduber liber, Ministerio Publico diripiente a presenta un sospecha di BCI y denuncia di sra. Marisol Tromp.

Segun e abogado a indica cu na momento cu e sospecho y denuncia a drenta nan a bay DIP kadaster pa busca informacion y a logra desbarata full e declaracion di BCI. E informacion aki e ekipo di Oduber a pone riba papel y a presente tambe.

“Esey ta djis pa mustra atrobe cu Ministerio Publico, landsrecherche sabiendo cu e informacion ey ta falso of cu nan mester por sa cu e ta falso nan a usele pa purba di convence hues comisiario pa Otmar keda deteni. Nan a logra pasobra e mester a bay back KIA,” abogado Carlo a indica.

Otro punto cu Oduber y su ekipo a presenta na hues den nan peticion pa declara Ministerio Publico no admisibel tabata trata e denuncia di Marisol Tromp. Pa cu esaki abogado Carlo a splica cu dos cos por a pasa, of Marisol a haci denuncia falso of landsrecherche a haci mal uso di e situacion politico e ora ey. Segun e, tur dos situacion ta loke a sucede.

El a señala cu despues cu partido POR a retira su confiansa den Marisol Tormp den parlamento dia 5 di juni, dia 2 di juli landsrecherche a yama Tromp pa haci un denuncia. Segun e abogado no ta Tromp riba su propio forsa a bay haci esaki, cual el a indica pa ley e ta obliga di haci ora cu e percata cu tin cosnan malo a sucede.

Abogado Carlo a sigui indica cu e despues di e yamada ey Tromp a bay entrega algun papel, despues na telefon a duna su declaracion y na final locual landsrecherche a resumi nan a firma manera declaracion. Segun abogado Carlo landsrecherche ta pone presion riba Tromp pa entrega keho, cual tabata 24 punto y despues algo di Serlimar.

Di e 24 puntonan aki, el a remarca, aworaki solamente un punto ta permanece y ta trata dos spookambtenaar.

“E resto dicosnan cu el a denuncia no ta awe al caso. P’esey nos ta bisa, uno landsrecherche a haci mal uso di e momento ey, un momento politico, nan a haci mal uso di yamele exigiele pa e bin declara, nan a pone presion pa pone denuncia contra Oduber,” abogado Carlo a indica.

Otro punto cu Oduber y su ekipo a trece dilanti ta e supuesto metemento di Ministerio Publico den politica.

Abogado di Oduber a splica cu un di e testigonan tabata sr. Haime Croes, ex director di DIP. Segun el a indica nan tin prueba por escrito cu Ministerio Publico ta bisa DRH pa no schors Croes ainda pasobra e ta declarando den caso flamingo hopi bon y ta yudando Ministerio Publico den un manera.

“Ministerio Publico na bon of na malo kier a traha nan caso contra Otmar. Riba dje den e mailnan bo ta wak fiscal ta mail direct cu DRH, PG ta mail direct cu prome minister y miembronan di RST ta copia den e email. Bota wak gewoon cu e cos ki na final loke nan tabata busca, e sospechanan di BCI, e miyones cu nan a kere nan ta bay haya for di Otmar, e miles di tereno cu el a bende, a dal nan duro. Pa scapa cara nan a tira un tarai pa wak cua piskechi nan por haya,” abogado Carlo a enfatisa.

El a indica cu e mensahe cu nan kier duna na hues entregando e peticion pa declara Ministerio Publico no admisibel den caso Flamingo y asina elimina e caso por completo, ta pa stop e “free for all” cu, segun nan, tin den Ministerio Publico.

Manera ta conoci caso Flamingo tin mas di cinco aña andando y na mas di un ocasion Oduber a vocifera su malcontento pa con e proceso a cana, con Ministerio Publico a haci su trabou y a entrega keho oficial contra informantenan di Ministerio Publico cu segun Oduber a indica a traha rapportnan falso cu informacion cu ta completamente falso contra su persona.

Originalmente caso Flamingo mester tabata den corte dia 17 di november, pa cual Oduber tabata spera cu finalmente e saga di caso Flamingo lo por a termina pa dia 2 di december. Pero recientemente a cambia e fecha di e caso y fecha nobo ta dia 6 di december, cual ta e mesun fecha di eleccion parlamentario, cual Oduber ta participando aden como lider di partido PPA.