(AP)—Papa Francisco a haci yamado pa un investigacion pa determina si e atakenan di Israel riba Gaza ta constitui genocidio, segun e extractonan publica ayera for di un buki nobo prome cu e aña di Jubileo Pontifico.
Esaki ta e prome biaha cu Francisco a urgi publicamente pa un investigacion di acusacionnan di genocidio tocante e accionnan di Israel riba e Franha di Gaza. Na september, el a bisa cu e atakenan di Israel na Gaza y Libanon a tabata “inmoral” y desproporciona, y cu su ehercito a viola e reglanan di guera.
E buki, pa Hernán Reyes Alcaide y basa riba entrevistanan cu e Papa, ta titulo “Speransa nunca ta desapunta. Peregrinonan den direccion di un mundo miho.” E lo ser publica diamars prome cu e Jubileo di 2025. E jubileo di Francisco ta anticipa di trece mas cu 30 miyon peregrino na Roma pa celebra e Aña Santo.
“Segun algun experto, loke ta pasando na Gaza tin e caracteristica di un genocidio,” e papa a bisa den extractonan publica ayera pa e corant diario La Stampa. “Nos mester investiga cuidadosamente pa determina si e ta pas den definicion tecnico formula pa hurado- y organismonan internacional,” el a agrega.
Aña pasa, Francisco a reuni separadamente cu famianan di rehennan Israeli na Gaza y Palestinonan bibando den e guera y a causa un scandal por medio di usa palabranan cu diplomaatnan Vaticano usualmente ta preveni: “Terorismo” y segun e Palestinonan, “genocidio.”
Francisco a papia e tempo ey tocante e sufrimento di ambos Israeli- y Palestinonan despues di su reunionnan, cual a ser organisa prome cu e trato di rehen entre Israel y Hamas y un paro temporal den bringamento a ser anuncia.
E pontifico, ken siman pasa tambe a reuni cu un delegacion di rehen Israeli cu a ser libera y nan famianan presionando e campaña pa trece e rehennan restante cas tabatin control editorial tocante e buki.
E conflicto entre Israel y Hamas na Gaza a causa varios caso legal na cortenan internacional na Den Haag pidiendo pa ordennan di aresto como tambe acusacionnan y negativa di crimennan di guera, crimennan contra humanidad y genocidio.
Den e buki nobo, Francisco tambe a papia tocante migracion y e problema di integra migrantenan den nan pais anfitrionado. “Enfrenta cu e reto aki, ningun pais por keda atras y ningun hende por pensa di atende e asunto aki den isolacion via mas leynan restrictivo y represivo, tin biaha aproba bao presion di miedo of den buskeda di bentahanan electoral,” Francisco a bisa.
“Al contrario, manera nos ta mira cu tin un globalisacion di indiferencia, nos mester responde cu e globalisacion di caridad y cooperacion, el a agrega. Francisco tambe a menciona e “herida habri di e guera na Ucrania cu a resulta den miles di hende pa bandona nan cas, specialmente durante e prome lunanan di e conflicto.”
