Despues di dos debate electoral, no ta parce cu a bin mucho mas claridad den e panorama politico. En general debate electoral no ta causa gran cambio den opinion popular, hopi hende den un encuesta ta pronuncia loke nan tabata pensa caba y no a sali di un debate, convenci di otro manera di mira mundo. Esaki tambe tabata e caso den e debatenan cu a tuma lugar recientemente, un na San Nicolas y otro di Camara di Comercio. Loke ta mas interesante ta e pregunta si den e debatenan a trata e temanan realmente importante pa e pais, y na un manera cu esnan cu a sigui e debate por a haya informacion obhetivo, pa sustenta nan opinion. Manera bisa, mas informacion no necesariamente ta cambia opinion di hende. Nos ta corda cu den e debate di Camara di Comercio na 2013 a opta pa duna un ‘block’ di informacion obhetivo pa cada tema trata, anterior na e ocasion pa e lidernan politico duna nan opinion. Por ehemplo, a duna cifra y proyeccion di e riesgonan financiero cu Pais Aruba tabata core na man di e gobierno unipartidista democrata cristian. Seguidamente e partido cu a pone Aruba na riesgo a pasa pa celebra e mayor victoria electoral di nan historia. Kico e mensahe ta anto? Si ta organiza debate pa purba guia opinion popular, esey lo ta tempo perdi. Cu esey nos no ta bisa cu no mester organiza debate; ta bon pa hacie y cada ciudadano cu saca siquiera un tiki informacion di e debate, esey ta un avance.

Asina mes nos ta keda cu un interogante importante: den e debatenan realmente ta trece e problemanan nacional clave dilanti den un forma cu publico ta haya un vista mas claro di e asunto? Nos impresion ta cu no ta asina, na nivel di informacion e debatenan teni den e dianan aki no a toca e mero curazon di e asuntonan. Un ehemplo: e tema di un grupo creciente di ‘adulto mayor’, manera e nomber di moda ta actualmente, no a trece e realidad den cual mayoria di e personanan aki ta biba. Kico ta e caso? Nos tin un capacidad masha limita di institucion pa cuido di anciano y cu necesariamente lo mester aumenta. Pero, esey no ta cambia e realidad cu gran mayoria di persona di edad ta keda biba den o rondona pa famia; algo cu nos mester aplaudi y apoya. Kico esey ta significa pa bo como gobierno? Cu bo mester evalua con pa apoya y fortifica e fenomeno familiar aki y no supone cu tur cos lo bay bon di mes. Por ehemplo, mester analiza con pa stimula oferta di servicio – priva – na persona di edad y nan structura familiar di apoyo, por ehemplo den cuminda (di dieta tambe) entrega na cas. Gobierno no mester pretende cu por haci esaki como un tarea gubernamental pasobra aki iniciativa priva lo funciona mihor. Pero kico nos ta mira ta sucede ainda? Cu politico ta bay bishita institucion pa anciano pa saca potret cu persona di e grupo aki, mustrando nan bon curazon pero nada di loke realmente nan tin pensa di haci pa e grupo aki. Loke cerca nos ta lanta e sospecha si e politico mes ta comprende con amplio y compleho e tema aki ta…

Nos ta keda asombra pa scucha nos politiconan parti promesa tur caminda, sin toca e trasfondo menos faborable di e asunto. Ta papia di aumenta pension drasticamente, mientras ningun momento ta bin dilanti ta ken ta bay paga e asunto aki. Hasta e partido democrata cristian cu 13 aña pasa a carga e peso di e decision dificil di salba nos fondo di AOV, ta parce di a lubida pakico e tempo ey no tabatin otro alternativa cu hiba edad di pension te 65 aña. Nan a carga consecuencia electoral di esey? No, nan a pasa pa e antes menciona victoria electoral historico di 2013. Miedo di kico anto?

Tin otro aspecto relaciona cu pension cu no ta hayando atencion di ningun banda. Esey ta e ley di pension complementario pa sector priva, tambe di 13 aña pasa, un seguro adicional pa empleado cu no ta cay caba bao di un fondo di pension via nan empleador. Nos no tin ni un idea con ta para cu e fondonan crea cerca e dos empresanan asegurador cu ta maneha e fondonan pa esun cu – voluntariamente – ta registra cerca nan pa cumpli cu ley. Sin embargo, e asegurador no tin autoridad gubernamental pa impone cumplimento; esey ta gobierno (ministro di finanzas) mester a regla. Despues di atende e tema aki varios aña pasa caba, nos no a tende nada mas di e asunto, solamente cu nos sa di testimonio di persona individual cu e incumplimento por ta bastante grandi. Ta ironico cu ni e mesun partido cu a logra introduccion di e pension adicional, awe 13 aña despues no ta ni papia di esaki y ta contempla aumento drastico di AOV atrobe, mescos nan a haci tanto aña pasa.

Di otro banda, e otro partido grandi, actualmente den gobierno, ta parce di ta keda insisti den nan tradicional politica di avestruz, mientras cu ta nan mester bisa con ta sigui, si ta necesario pa bay pa pension na 66 aña, segun e compromiso cu nan a acorda cu Hulanda pa 2025. Finalmente, e unico cos cu nos como votador por siña aki ta cu no ta pasobra un politico ta toca e tema, e necesariamente ta conta bo loke realmente e asunto ta encera. Parce cu politica ta pa convence, no pa informa…