Mientras cu a enfoca riba algun topico, algun otro tema di gran importancia a keda afo durante e debate politico di KvK

Diahuebs anochi a tuma luga e debate politico organisa pa Camara di Coemrcio (KvK) conhuntamente cu Universidad di Aruba. Un total di 10 partido, di 11 cu ta participando den eleccion a tabata presente, cu AVP como e unico partido cu no a presenta.

E debate politico organisa pa Camara di Comercio (KvK) durante campaña electoral a bira casi un tradicion, ya cu ta organisa esaki pa hopi aña. Custumber di e gremio comercial ta pa lidernan di cada partido participa representando nan partido.

Evelyn Wever-Croes, MEP; Miguel Mansur, ACCION21; Marisol Tromp, MAS; Ursell Arends, RAIZ; Otmar Oduber, PPA; Gilbert Webb, HTC; Eric Ras, CURPA; Gerlien Croes, FUTURO; Ricardo Croes, RED; y Rycond Santos do Nascimento, LPR tabata e lidernan cu a representa nan partido durante e debate.

E debate tabata consisti di tres diferente tanda durante cual e politiconan tabata expresa nan punto di bista riba algun ponencia y contesta algun pregunta. E aña aki KvK a introduci un cambio den e manera cu e debate politico a bay tuma luga. Ta trata cu cada lider di partido por a bin cu un candidato for di e lista di partido pa tambe participa den e debate, den e caso aki den e di dos tanda.

Otro aspecto interesante di e debate politico e aña aki tabata e oportunidad cu cada lider di partido tabatin pa haci un pregunta di su escogencia na cualkier otro lider di partido di su escogencia. E parti aki tabata un aspecto nobo y uno cu a resalta pa e lidernan cu a participa durante e debate. Algun politico a tuma e oportunidad pa haci preguntanan fuerte na nan colega politico mientras cu algun otro tabata mas suave.

Mester resalta cu mayoria di e lidernan di partido a dirigi nan pregunta na prome minister demisionario y lider di partido MEP, Evelyn Wever-Croes, ken tambe a reconoce esaki gradiciendo e otro lidernan pa e atencion cu nan a dun’e y oportunidad pa papia y duna mas splicacion.

A pesar cu e debate a cuminsa cu un tono bastante pica, algun ciudadano a expresa riba rednan social cu a spera di mira un poco di e aspecto di ‘debate cayente’ entre e lidernan y a sinti cu no a toca algun punto di preocupacion.

Topiconan cu a bin dilanti durante e debate tabata finanzas, vivienda, enseñansa, adultonan mayor y corupcion. Un di e topiconan cu no a bin dilanti y cu ta uno cu ciudadanonan ta considera hopi importante ta e tema di migracion y personanan indocumenta na e isla. Un topico cu hopi ta considera por tin un efecto riba nan decision pa ken nan lo vota.

Durante e debate publico por a vota pa cual lider politico a gana e debate. Segun e cantidad di votonan cu a drenta, lider di partido MEP, Evelyn Wever-Croes, a gana e debate. Na di dos luga tabata Gerlien Croes, partido FUTURO, na di tres luga Otmar Oduber di partido PPA.