Partido HTC a presenta su plan di partido

Partidonan politico den pleno pa campaña pa eleccion di dia 6 di december y proceso di esaki ta inclui formula y presenta un plan di partido na comunidad di Aruba pa informa tocante nan vision y plannan pa pais Aruba. Partido HTC a publica nan plan di partido cu ta consisti di 78 punto di atencion.

Partido HTC lidera pa e hoben politico Gilbert Webb su plan di partido ta enfoca riba e siguiente cuater aña di periodo di gobernacion. Di e 78 puntonan di atencion cu HTC a presenta e punto number uno ta keda nan vision pa un Parke di Atraccion na San Nicolas.

Otro punto cu e partido ta trece dilanti ta cu tur compania cu ta opera un hotel, airbnb of motels, tin e oportunidad pa contribui un pago anual na Arubus pa por duna servicio di “free shuttle” na su clientenan for di e compania na e parke y parke na e compania.

HTC ta inclui den su programa di partido habri “crèche publico” cu un tarifa abou pa luna pa asina yuda mayornan cu no tin manera pa logra paga un crèche priva, of mayor nan cu ta traha trabou shift. Adicionalmente tur mayor cu nan baby ta bay un crèche priva y ta desea di mantene na e crèche aki, gobierno lo asisti cu un Kinderopvangtoeslag di 25%

Pa loke ta e debe di Aruba, HTC ta apunta cu nan kier sinta na mesa cu Organisacion Internacional Club di Paris, pa yega na un acuerdo pa alivia Aruba di debenan inaceptabel, reduci debe nacional, busca cooperacion mas profundo cu Hulanda pa e structura di finanzas y cumpli cu Landspakket na un miho forma.

Ta menciona cu nan kier sinta na mesa cu CAft pa logra scucha nan preocupacion y demostra nan plan concreto pa un mehoracion mutuo pa Aruba. HTC ta señala cu 63 miyon di surplus cu a ricibi for di SVB|AZV|ATA nan lo enfoca riba proyecto necesario na pais Aruba.

Manera varios otro partido tambe a inclui den nan plan di partido, HTC kier elimina BBO|BAZV|BAVP|BBO na frontera y introduci un BTW general na 12.5% na 2025 y baha esaki despues na 10% na 2027.

Ademas e partido kier reduci winstbelasting, reduci inkomstenbelasting y reduci impuesto riba tur producto importa na un impuesto balansa di 10% standard.

Otro puntonan di atencion cu HTC ta menciona den su plan di partido ta cu nan kier pa AZV cubri tur remedi bek y nan kier baha edad di pensioen na 60 aña y pone pre-pensioen na 58 aña. Nan a splica cu e pre-pensioen ta traha cuater ora so, trabou ta paga cuater ora y SVB ta paga cuater locual, segun e partido, lo aumenta placa di pensioen cu 60%.

Segun e partido nan lo construi un Cas Social Flat na unda tur persona cu menos recurso por logra aplica pa un hypotheek y cumpra un cas na un prijs rasonabel di entre 30 mil florin pa 70 mil florin.

HTC ta menciona den nan plan di partido cu lo reduci gasto di otorgamento di permiso di stranhero, innova esaki cu tempo corto y aumenta e BTW pa nan na 17% den mercado laboral pa suavisa e gasto di permiso y proceso structural pero stricto.

Pa loke ta personanan indocumenta, e partido politico ta menciona cu lo duna nan un luna di dispensacion pa registra den e sistema legalmente na DIMAS y contribui na impuesto na Aruba y lo introduci un proceso estricto di permiso

Igual cu varios otro partido, HTC ta papia di mehora mainstreet na San Nicolas y Oranjestad cu actividadnan cu ta atrae e pueblo den e area specifico aki. E ta papia di reduci cantidad di cambernan di hotel y alaves enfoca riba mehora locual tin caba.

E partido kier introduci tambe un San Nicolas Main Port (SMP) pa cuminsa habri porta pa mas oportunidadnan pa, entre otro, trece ferry na Aruba y alaves cruceronan pa haci uzo di esaki tambe.

HTC tambe ta indica cu den nan planes ta inclui legalisacion di cannabis medicinal y recreacional pa aña 2026.

E partido kier actualisa e ley di screening di ministernan, pa evita cu tin cualkier persona ta bira minister pa interes personal.

HTC ta indica tambe cu partidonan cu logra haya e cantidad di firma pa participa na eleccion lo ricibi un suma maximo standard di pais Aruba pa por tin un campaña husto durante eleccion. Adicionalemnte e partidonan tin cu reporta e finanzas anual di e partido referente e fondo aloca aki.

E partido ta enfatisa cu nan no kier mas corupcion den companianan cu ta cay bou di ministerionan, nan kier bin cu mas transparencia haciendo tur documento di gobierno y parlamento publico y nan kier bin cu mas control riba fondonan di ministerionan.

Otro punto di atencion ta trata e implementacion di un ley cu ta yuda e personanan den necesidad, tambe esnan den KIA, y ta educa nan cu cursonan specifico pa integra nan back den comunidad prepara pa e reto nobo.

E partido ta sigui menciona cu nan ta desea di introduci un ley pa mantene tur locual ta necesidad pa scol cu un prijs standard sin posibilidad pa aumenta esaki inhustamente.

Nan ta inclui tambe cu tur scol publico lo tin cu duna e muchanan desayuno mainta durante pauze di scol y evita cu tin mucha cu situacion fastioso na cas no ta bay scol cu cuminda.

Pa loke ta personanan cu limitacion cu ta cobra bijstand, HTC ta indica den nan plan di partido cu nan lo bin cu un aumento di 300 florin extra.

Manera pa diferente otro partido, pa partido HTC cuido di adultonan mayor ta prioridad. Segun nan plan di partido nan lo sinta hunto cu tur instancia di cuido pa modernisa e centronan, y trece solucion pa e personanan aki ricibi cuido y sinti confortabel.

Den KIA nan kier crea un departamento psikiatrico di enseñansa y trabounan practico pa e personanan den KIA por sigui den e proceso di conscientisa pa integra bek den comunidad y mehora nan bida.

Otro punto di atencion ta cu nan kier structura onderstand cu regla flexibel pa ciudadanonan di Aruba cu a perde trabou ta haya 300 florin extra pa luna, pero ta obligatorio pa atende cursonan na Enseñansa Pa Empleo y ora cu termina e curso lo tin compania afilia cu inmediatamente ta dispuesto pa tuma e personanan aki den servicio.

HTC kier introduci e ARBO-wet cu ta na bienestar di e empleado y dunado di trabou y nan kier reduci e cantidad di persona cu tin actualmente hayando onderstand pa hopi aña. Nan meta ta pa cumpli cu normanan internacional di ILO (International Labor Organisation).

Nan ta indica cu nan kier cambia e leynan pa desaroya enseñansa, enfoca riba plataforma nan e-learning (online) cu por yuda esnan cu ta trahando tambe caba scol via plataforma digital.

Partido HTC kier mantene su enfoke riba sostenibilidad di medio ambiente, bio-diversidad y practicanan di maneho efectivo, mientras nan ta traha pa alinea nan esfuersonan cu e obhetivonan di desaroyo sostenibel pa 2030. Nan lo busca financiamento Europeo pa sigui cu nan esfuersonan pa proteha eco-sistema marino esencial.

Nan ta sigui indica cu nan kier enfoca riba cada districto su problema cu sushi y crea un centro special di reciclahe na e districto pa asina por cuminsa sortia e desperdicio pa mehora e parti di mantene Aruba limpi.

Pa loke ta e problema di RWZI y Bubali Plas, HTC ta subraya cu nan kier mehora e infrastructura, mehora e control di contaminacion, restaura e eco-sistema, involucra comunidad, y promove practica sostenibel na Aruba.

Como partido nan kier enfoca riba bahamento di tarifa di coriente pa cada ciudadano y trece solucion concreto pa cu aumento di gasolin y diesel, pa mantene e tarifa abou. Pa esaki nan tin plania negosha directo pa cu e “Moving Pricing Strategy”.

Nan ta papia di diversificacion di iniciativanan di desaroyo economico pa reduci dependencia di turismo. Plan pa esaki ta inclui e Parke di Atraccion na San Nicolas.

Por ultimo, partido HTC ta indica cu tur comerciante of persona individual cu tin un debe atrasa na impuesto lo haya un ayudo di alivio temporal y guia necesario pa hunto por logra coach e comerciante of e persona individual na e direccion di cumplimento.