Ayera den corte a tuma luga tratamento di caso den cual cuater periodista local ta sospechoso di, entre otro, soborno di agente policial y participa na un organisacion cu intencion pa comete crimen y/of soborno di un ambtenaar (polis). E caso aki ta relaciona cu e caso di ex-agente policial R.Vos ken ya caba a keda condena.

E sospechosonan di inicial R.P.L, B.L.R.K, N.E.A.G y N.M.Q.C.d.A. ta acusa di, for di periodo di prome di januari 2021 te cu 22 di maart 2023, conhuntamente intencionalmente a viola secretonan cual nan tabata sa cu e ambtenaar, relaciona cu su funcion, tabata obliga pa tene. Nan ta acusa di, den e periodo ya menciona, a participa den un organisacion cu tabata consisti di un y/of mas otro persona cu tabatin como meta pa comete crimen, esta, corupcion di un ambtenaar y/of tuma y/of duna soborno y/of maluso di funcion y/of violacion di secreto di trabao.

Fiscal a pidi e castigo di prizon incondicional 24 luna contra e sospechoso N.M.Q.C.d.A. Ademas fiscal a pidi pa e wordo hiba cera mes ora ora di dicta sentencia. Contra e sospechosonan R.P.L. y N.E.A.G. a exigi un castigo di prison di 18 luna, di cual 8 luna ta condicional, cu un tempo di prueba di 3 aña. Contra e sospechoso B.L.R.K. a pidi un castigo di prison condicional di 6 luna, cu un tempo di prueba di 3 aña y 240 ora di trabao pa comunidad.

Segun e noticiero local, Noticia Cla a reporta, den su rekisitorio e fiscal a indica cu e ta kere hopi cos y informacion a ser comparti entre e agente Vos y e periodistanan, pero cu mester por demostra cu prueba cu loke a sucede ta ilegal. Segun e fiscal e trafico di informacion colecta di WhatsApp entre e sospechosonan durante un luna tabata suficiente pa tin un idea di e operacion cu tabatin entre e polis y e sospechosonan.

E noticiero a reporta cu e fiscal a sigui bisa cu den hopi caso ora tende e palabranan ‘miembronan di organisacion criminal’ ta imagina un grupo di hende arma, estilo pelicula cu intencionnan violento. Pero el a splica cu den termino hudicial, e ta nifica cu dos hende cu ta malversa of konkel cifranan di contabilidad den un compania ta suficiente pa ser mira como miembro di un organisacion criminal.

Sospechosonan tin derecho di zwijgrecht, esaki ta nifica derecho pa keda keto. Dos di e sospechosonan a haci uso di e derecho aki, pero segun e fiscal e derecho aki tin consecuencia negativo pasobra no ta crea claridad den un acto y hopi biaha ta conduci na un veredicto di culpabel.

Hues a resalta cu pa sospechoso N.M.Q.C.d.A esaki no ta prome biaha involucra den un caso asina. Segun e portal a indica hues a splica ya caba el a haya un sentencia leve, castigo di prison condicional y trabao comunitario, pero ta parce cu e no a siña su les.

Huez lo cera e investigacion y lo dicta sentencia riba 18 di december riba 2024 pa 8.15’or di mainta.