(NLTimes) – Polis ta investigando publicacionnan riba medionan social cu ta menasa cu tiramento na varios scol secundario na Amsterdam, principalmente den districtonan West y Nieuw-West, diaranson. Scolnan ta habri y polis ta tumando “medidanan visibel y invisibel,” AT5 a informa.
Dos publicacion cu ta circula riba Snapchat y otro plataformanan di medionan social ta inclui textonan manera “tiramento mañan na scolnan West” y “tur hende ta bay muri.” E publicacionnan a aparece pa prome biaha diamars anochi.
“Nos ta tumando esaki hopi na serio y ta p’esey detectivenan a cuminsa un investigacion riba e menasanan aki,” un vocero di polis a bisa AT5.
Cuater scol a confirma na e emisora di Amsterdam cu e menasa tabata dirigi riba nan. E partnership Amsterdam-Diemen, e organisacion paraplu pa tur scol den e area, ta na altura di mas scol cu ta atende cu menasa, tambe pafo di e districtonan West y Nieuw-West. “Nos ta haya cu ta lamentabel cu esaki ta pasando y ta hopi stresante pa maestro-, mayor- y studiantenan.”
Luna pasa, cuater scol secundario na Deventer a manda muchanan cas despues di un menasa online di un tiramento na scol. Na april y mei aña pasa, varios scol rond di e pais a keda confronta cu menasanan asina, incluyendo alrededor di 20 scol di Amsterdam. Ningun tiramento a tuma luga.
