Parlamento mal informa… Nunca lo por funciona…

Dentro di algun siman Aruba ta bay urna electoral atrobe pa elegi e siguiente parlamento cu lo mira un ehecutivo nobo surgi, a base di resultado electoral, pa despues parlamento continua cu nan trabao clave: percura pa legislacion adecua. Cada biaha nos ta carga speranza cu awor si nos lo haya un parlamento cu ta atende nos asuntonan manera mester ta. Y cada vez nos ta keda decepciona pasobra tempran den e proceso ya nos por ripara cu atrobe parlamento ta carga cu cierto honor e nomber di ‘stempelparlement’. Esey ta un realidad innegable, pero realmente esey mester straña nos? Nos situacion no ta unico den e aspecto aki, na tur pais cu un sistema democratico por sinti e presion riba parlamento pa bay di acuerdo cu loke poder ehecutivo, gobierno, ta desea. Y ta logico tambe cu, si no tin un apoyo parlamentario pa e gobierno di e momento ey, ta bira hopi dificil goberna. Nos lo mira mas tanto anto cu e apoyo ey lo ta presente, pero ainda ta keda un sentimento negativo, di insatisfaccion con e sistema ta funciona. Kico ta e caso?

Un di e problemanan fundamental den cualkier sistema unda poder ehecutivo y poder legislativo mester busca y haya un forma di colaboracion y coexistencia, cu ta beneficioso pa e pais. Esey naturalmente ta un lema hopi bunita, pero nos ta mira esey funciona asina tambe den practica? E contesta cortico ta: no. Pero ban elabora riba e pakico no. Un factor importante ta e diferencia den nivel di conocimento y informacion, cu semper ta na fabor di gobernacion. Den e practica di tur dia informacion ta drenta via e aparato publico y gobierno ta traha riba e maneho cu ta desea di hiba, basa riba e informacion ey. Un parlamento semper ta den desbentaha aki, pasobra ta depende pa gran parti di e mesun poder ehecutivo pa haya e informacion necesario pa por huzga un situacion relevante. Con ta – purba – soluciona e problema aki? Nos no ta sigur cu tin un intento pa logra esey, al contrario. Laga nos tuma como ehemplo e casonan importante den pasado reciente, unda parlamento a tuma decision sin por a dispone di e informacion relevante. Caso 1: e contrato di gobierno di Aruba cu Citgo, cera na 2016. Poniendo un documento di mas di dos mil pagina riba mesa, y cu un tempo limita pa lesa, y un prohibicion di copia cualkier parti di e documento, a obliga oposicion pa bay di acuerdo cu e convenio, bao chantage di keda critica pa ta ‘contra interes di pueblo’. Envez di nenga di aproba e contrato, desconociendo su contenido pa gran parti, nos por a mira e berguenza nacional di 20 parlamentario inutil cu a bay di acuerdo cu algo cu nan no tabata conoce. Tabatin solamente un parlamentario cu tabatin e sensatez di no bay di acuerdo cu e payasada ey y cu a haci su trabao di nenga aproba cos ciegamente.

Caso 2: e contrato cu Eagle LNG di 2021. E mesun partido di oposicion, cu na 2016 a bay di acuerdo, rascando diente, cu e contrato inmenso di Citgo, a inventa mientras tanto un manera mas astuto ainda pa desinforma parlamento. A aludi na un convenio cu e compania Eagle LNG, unda ambos banda lo tabata mara na un asina yama ‘non-disclosure agreement’, pues “Parlamento, boso tin mala suerte, nos no por divulga nada mas”… Nos tur sa con e storia ey a caba.

Sin embargo, nos no mester keda pega den lamento pa loke a sucede, pasobra e partidonan cu a inventa e patrañanan aki pa por desmantela e tarea di parlamento pa controla, ta probechando actualmente di e situacion, aparentemente acepta como hecho, cu poder ehecutivo ta liber pa informa parlamento segun nan gana. Esaki nunca por ta un base adecua pa un parlamento funciona, pero segun nos e problema ta cerca parlamento mes tambe, pasobra no tin un maneho solido for di parlamento mes, kico ta e informacion cu poder ehecutivo mester entrega. Asina ta acepta como un hecho cu gobierno ta dicidi kico parlamento ta haya na informacion.

Loke ta haci henter e asunto aki mas grave ainda ta cu ta trata di dos contrato sumamente importante pa e pais, unda e dos partidonan grandi a dicidi cu nos no mester sa kico nan a acorda na nos nomber. Nos ta haya straño anto cu den ambos caso e proyecto acorda a fracasa? Den ambos caso a sconde e informacion, hustamente pasobra esaki lo a causa hopi critica, y critica corecto, cu lo a preveni cu como pais nos lo a bay den un aventura cu tabata destina pa fracasa di antemano.

Claro cu den un situacion asina, gobierno lo a recuri na e texto di Constitucion cu ta bisa cu gobierno tin un obligacion di duna informacion, a menos cu tin aspecto di seguridad nacional envolvi. Nos lo tin gana di haya un splicacion ta kico ta e aspectonan di seguridad nacional envolvi den e contratonan cu Citgo y Eagle LNG… Awor, despues di e fracaso den ambos caso, nos por constata cu tabata hustamente interes di Aruba pa haya sa na tempo cual tabata e riesgonan cu nos tabata core. Gobierno a perhudica nos teniendo e asunto secreto. Si parlamento ta haya cu nan ta un poder (legislativo) riba nan mes, ki dia nan ta cuminza tuma nan mes na serio y realiza cu, sigur ora gobierno ta bisa cu no por divulga algo, ta pasobra e asunto ta dudoso y lo bay causa problema despues. Tarea di controla?