Diamars anochi a tuma lugar e Forum Politico di San Nicolas Business Association, cu a conta cu participacion di tur partido cu ta registra pa participa den proximo eleccion dia 6 di december. Enfoke di e Forum aki tabata obviamente San Nicolas y su interesnan particular y specifico, y den e contexto aki a haci diferente pregunta na cada partido.
A pesar di algun ‘glitch’ tecnico, e evento a bay den un bon manera sin mucho interupcion ni problema. Sinembargo, e formato di e Forum a laga comunidad insatisfecho. Entre otro, e preguntanan tabata un poco generico, pa loke cada partido a djis contesta segun nan plan di partido, cu ya ta disponible, den mayoria di caso, pa lesa den su totalidad. Tampoco tabata cuestiona of debati e contestanan, ni door di e moderadornan, ni door di e otro participantenan den e Forum. Esaki a haci cu e sesion di Q&A no tabata mucho mas cu un mini-discurso di cada partido cada biaha, sin mucho interaccion.
Tambe tabatin critica cu e Forum tabata mas un medio pa presenta e interesnan di SNBA en bes di informa electorado di San Nicolas. Durante e Forum, SNBA a duna un presentacion tocante nan plannan pa desaroyo di San Nicolas.
Algo cu a resalta ta cu e partidonan no-tradicional, manera HTC, tabata miho prepara di loke hopi a spera y toch a presenta propuestanan interesante. Un momento cu a genera hopi interes riba rednan social tabata momento cu candidato di partido HTC, Gilbert Webb, a insinua cu lider di ReD, Ricardo Croes tabata na soño. Esaki pasobra Croes a critica cu tur partido ta bin cu idea, pero no ta bisa di unda e placa pa implementacion lo bin. Webb a contesta cu el a bisa caba cu lo introduci un parke di diversion na San Nicolas, y esaki lo financia proyectonan. Sinembargo, e comentario di Croes toch tabata al caso pa publico, ya cu e pregunta di unda placa lo sali pa financia proyecto ta uno cu ta toca cada ciudadano.
Varios partido a enfoca riba e topico di “rebiba caya grandi” di San Nicolas, pero mester cuestiona si esaki ta vale la pena. Principalmente considerando e hecho cu no a logra rebiba e caya grandi den Oranjestad ni maske a haci cantidad di esfuerso y inversion. Tal bes ta ora pa pensa cu e era di un caya grandi ta pertenece den pasado, y enfoca riba solucionnan cu ta pas cu e comportamentonan di consumidornan actual.
Y riba e topico di desaroyo creativo, algo cu a genera hopi decepcion ta e falta di creatividad y vision di mayoria di partido, cu a hancra tur propuesta di desaroyo di San Nicolas riba turismo. Sea turismo medico, cultural, of tradicional – crucero, hotel, waf – e realidad ta cu Aruba mester desaroya un otro pilar economico en bes di keda depende riba turismo. E desaroyo di San Nicolas por ta un oportunidad tremendo pa introduci desaroyo sostenible di otro pilar economico, pues tabata desapuntante pa mira mayoria di candidato keda enfoca riba turismo.
Y tocante sostenibilidad ainda tabata falta mas. Desaroyo no ta nifica construccion, y esey ta algo cu vooral e generacionnan nobo, pero sigur tur cu ta stima nos isla, ta tene central. Especialmente cu e cantidad di construccion cu nos ta mira tur rond cu ta lagando tiki espacio pa naturalesa y nos flora y fauna vulnerable. Cu mas propuesta pa construccion, expansion y turismo, ta surgi e pregunta unda e localnan – flora, fauna y humano – ta suppose di biba, y mas ainda prospera. Ta parce mas manera e idea di nos candidatonan politico ta mas un “gentrificacion” di San Nicolas na lugar di un desaroyo cu por trece prosperidad pa pueblo.
Finalmente, algo cu a keda falta ta e asuntonan mas relevante pa pueblo en general, cu tambe ta conta pa habitantenan di San Nicolas: salario minimo cu ta bao bestaansminimum, un costo di bida impagable, escasez di vivienda, y falta di empleo bon paga, entre otro. Considerando esaki, e desaroyo di turismo na San Nicolas no ta parce un manera adecuado ni eficaz pa atende cu e preocupacionnan mas urgente di nos comunidad.
