(NLTimes) – Den un decision historico, gobierno Hulandes a priminti di debolbe placa na mas cu 10 mil studiante cu a ser marca inhustamente pa fraude di financiamento di studiante door di un algoritmo desaroya pa e Agencia Ehecutivo di Enseñansa (DUO). E proceso, cu a bin bou di candela despues cu un investigacion recien a haya cu e ta discriminatorio, tabata enfoca riba studiantenan basa riba factornan di riesgo arbitrario cu a afecta desproporcionalmente esnan di antecedentenan di inmigrante, particularmente esnan di descendencia Turco y Marocano. E anuncio ta sigui un control creciente riba e uso di algoritmonan basa riba dato di DUO y e asunto mas amplio di profilacion etnico dentro di institutonan gubernamental.
Minister di Enseñansa Eppo Bruins a aloca 61 miyon euro pa e proceso di restitucion, cu ta encera 47 miyon euro pa reembolsonan directo y 14 miyon euro adicional pa ehecucion. “Nos kier preveni cu studiantenan mester cay den batayanan legal,” Bruins a declara, enfatisando cu e pagonan lo ser haci sin importa e resultadonan di fraude debi na e prehuicio sistematico presente den e metodonan di investigacion.
E sistema di deteccion di fraude di DUO, implementa na 2012, a marca studiantenan a base di criterionan manera edad, nivel di educacion y distancia geografico for di e residencia di nan mayornan, un acercamento cu a mustra di ta dirigi inhustamente riba studiantenan etnicamente diverso. Un investigacion di medionan di noticia Hulandes NOS y Investico na juni 2024 a haya cu di 375 studiante representa den casonan di fraude, 97% tabata di antecedentenan etnicamente diverso. A pesar di DUO su nengamento di cualkier prehuicio intencional, e instancia despues a admiti un sobrerepresentacion di studiantenan no-Hulandes den su controlnan, atribuyendo e discrepancia aki na fayonan sistematico en bes di profilacion racial explicito.
Mas detaye a surgi den un rapport independiente publica pa PricewaterhouseCoopers (PwC) na maart 2024, cu a confirma e existencia di discriminacion indirecto contra studiantenan migrante. E rapport a destaca cu e antecedentenan cultural di e studiantenan a hunga un rol den controlnan di fraude debi na criterionan di seleccion cu inadvertidamente a captura un cantidad desproporcional di studiantenan inmigrante. E criterionan a inclui e distancia pa e residencia di e mayornan di e studiante, cu hopi biaha tabata impacta famianan di inmigrante caminda studiantenan tabatin menos chens di biba independientemente den vivienda di studiante comparti. Studiantenan di enseñansa vocacional secundario (MBO) tambe tabata desproporcionalmente dirigi pa control di fraude durante un periodo cu subsidio no-residente tabata disponibel solamente pa e grupo aki.
E anuncio di minister Bruins ta marca un cambio crucial den politica despues di un ola di critica di varios organisacion di vigilancia. E Autoridad di Proteccion di Dato Hulandes (AP), cu a lansa un investigacion riba DUO na juli 2023, anteriormente a adverti cu instancianan di gobierno Hulandes a sigui depende riba algoritmonan defectuoso cu ta compromete derechonan di ciudadanonan. “E hamber di gobierno pa dato ta parce cu casi no a ser conteni,” presidente di AP Aleid Wolfsen a bisa, ken a argumenta cu e uso no regula di dato por conduci na consecuencianan severo pa individuonan, manera por mira den e scandal di beneficionan.
Un serie di investigacion interno y externo a mustra riba e fayonan sistematico di e sistema di DUO. Un advertencia inicial tocante posibel profilacion etnico den e controlnan di fraude di DUO a surgi na 2020 ora cu abogado Rudolf van der Ham a señala cu un mayoria di e sospechosonan di fraude di DUO tabatin famnan no-Hulandes. A pesar di e advertencia, DUO a sigui depende riba su algoritmo, afirmando cu e tabata basa riba “caracteristica obhetivo (comportacional).”
Como contesta riba e reaccion creciente, minister Bruins a ordena e suspension di e algoritmo discriminatorio na juli 2023 y a reemplas’e cu un sistema di deteccion di fraude basa riba muestranan aleatorio. Sinembargo, organisacionnan manera Amnistia Internacional ta argumenta cu riesgonan significante di profilacion etnico ta keda ancra den instancianan gubernamental. Un rapport di Amnistia di maart 2024 a critica e gobierno Hulandes pa no implementa proteccion efectivo contra profilacion etnico, bisando cu “organisacionnan gubernamental tin podernan amplio pa monitoria hende,” un practica cu “ta habri e porta pa abuso di poder y profilacion etnico.”
Minister di Enseñansa Robbert Dijkgraaf, ken tabata envolvi den evaluacionnan anterior di e metodonan di DUO, anteriormente a expresa preocupacionnan tocante e potencial pa discriminacion no intencional. “Como gobierno, nos a bira realmente alerta pa esaki como resultado di e asunto di beneficionan,” Dijkgraaf a declara, referiendo na e scandal di beneficionan cu a resulta den e retiro di e di tres gabinete di prome minister Mark Rutte. Desde e tempo ey e ministerio di Dijkgraaf a encarga instancianan independiente pa audit e practicanan di DUO.
DUO, bou di un control mas halto di varios parti, a compromete su mes na drecha su practicanan di dato y revisa su metodonan di deteccion di fraude. E instancia a expresa “lamento profundo” riba e resultadonan y a priminti di traha transparentemente cu instancianan di supervision.
