Den un mundo caminda costo di bida ta sigui subi, cu e sector financiero y bancario ta domina y controla pa un oligopoli y cu tin un presion creciente ariba vivienda debi na plataformanan manera Airbnb, ta bira cada bes mas cla cu e forma di goberna un pais ya no por sostene nos isla y pueblo mas.

E realidad ta cu, mientras e pueblo ta sufri pa paga gasto di biba y tin dificultad pa haya un vivienda accesibel, tin un necesidad urgente pa un liderazgo fuerte cu por kibra cu e deterioro politico, degradacion y corupcion cu a yega su limite.

E votador ta wak un mundo cu ta enfrenta e mesun problema globalmente. Un ehempel recien ta e resultado di e eleccion na Merca, caminda Donald Trump a gana eleccion 2024, demostrando cu e descontento popular tin mas peso cu politiconan y partido Democrata. Trump a logra captura un movecion di hende cu ta sinti cu e di gobierno a lubida di nan necesidadnan y a enfoca riba proteha interesnan di un poco poderoso, e ‘establishment”.

Pa e motibo aki, ta cla cu un politico cu ta bini cu un promesa di kibra e status quo y pone e necesidad di pueblo na prome luga mester ta e lider cu ta gana eleccion 2024. Nos ta mira caminda costo di bida ta subi y tin falta di poco regulacion pa proteha e clase medio y e grupo mas vulnerabel. Oligopolionan bancario ta sigui domina e mercado y trece likidacion insuficiente den e economia, mientras cu presion riba cas y turismonan informal ta sigui crece.

Presion riba Vivienda y e Rol di Airbnb

Na Aruba y otro luganan den Caribe, e problema di vivienda ta un tema hopi fuerte. Airbnb y otro plataformanan pa huur a corto plaso a crea un situacion caminda hende local ta haya mas dificil pa por keda den nan bario di origen, pasobra e cuestionnan di prijs y disponibilidad ta subi. Mester bin cu un plan pa cobra tur cu ta haci negoshi di Airbnb pa trece placa den caha di gobierno.

Un politica renovado cu ta regula e manera cu turismo y huur a corto plaso ta opera, mester ta parti di e argumento pa gana confiansa di e electorado.

E necesidad di un politica cu ta reconoce e problemanan di pueblo

Un politico cu ta pidi confiansa di e pueblo mester pone enfoke y duna importancia riba e problema di costo di bida, sistema bancario y su dominacion di oligopoli, y e presion cu  e sistema di huur di corte plazo ta pone riba e economia y nos comunidad. “It’s the economy, stupid” no ta solamente un slogan cu a hiba Bill Clinton na victoria na 1992; ta e realidad cu e electorado cu ta busca un liderato cu ta desafia e sistema actual y ta pone e necesidadnan creciente di e pueblo na prome luga. Trump durante su campaña a demostra esaki cla, y den Caribe nos ta wak e mesun señalnan, inclusivo Hulanda.

Den Caribe, e desaroyo aki ta nifica cu un politico cu ta propone medidanan pa regula miho e sector bancario, traha riba regularisa mercado di vivienda, y drecha presion turistico pa e beneficio local, lo ta un candidato fuerte cu por gana e eleccion. E electorado mester ta consciente cu e “track record” di cada politico ta esencial ora di scoge e lidernan di nos pais. Scoge lidernan cu ta cumpli cu nan promesanan durante campana ta esencial. E politico cu no por demostra cu prueba di su logronan den pasado mester ta e punto di salida ora ta deposita confiansa. E confiansa aki ta transferi tambe na cu nombracionnan den funcionnan clave den comunidad (nos lo bin cune den otro edicion) manera ora ta nombra personanan pa funcionnan halto manera den RvA, Algemene Rekenkamer, Board of Directors di entidadnan publico, unda esakinan tambe ta sali den luz negativo y ta un reflexion di e politico

Conclusion

Na final, e electorado di 2024 lo scoge pa un lider cu ta pone fin na e status quo y pone e bienestar di pueblo na prome luga a base di e desafionan cu e pueblo ta biba awe aden y ta premira den un futuro cercano. E experiencianan global y local a demostra cu e sistema cu ta custumbra cune no ta traha mas (e sistema actualmente no ta traha mas); un politica di renobacion y reforma cu ta bini cu solucion realistico ta e caminda pa gana e confiansa di pueblo. E frase “It’s the economy, stupid” ta un recordatorio potente cu un economia cu no ta sirbi e mayoria, ta forsa e pueblo pa busca un lider cu ta cambia e regla di wega. Lider cu kier drecha e desbalansa y cambia e status quo lo ta e lider cu lo keda cu e victoria.