Weekend ultimo a tuma luga e ceremonia unda a desvela e borchi di e caya na honor di Hyacintho Rudolfo (Rudy) Croes. E caya ta cuminsa na rotonde di Plaza Status Aparte te na rotonde di ex-Drive In.
Prome Minister Evelyn Wever-Croes tabata presente pa e ocasion importante aki hunto cu coleganan minister y varios parlamentario y colega di Partido MEP.
Rudy Croes a nace 5 di september 1946 y a fayece na edad di 75 aña dia 20 di november 2021. Den su carera politico Rudy a sirbi pais Aruba como Parlamentario y Minister.
Rudy Croes tabata un persona hopi stima den Santa Cruz. Pa hopi tempo e tabata den arena politico como minister y parlamentario pa partido MEP. Ademas, e tabata integrante di e famoso Grupo di Betico, y a eherce trabounan social, caritativo, y tabata activo den diferente area di deporte. Tambe den su tempo liber Rudy tabata activo den e “Harley Davidson Riders Club”.
Prome Minister a splica riba e procedura di e peticion pa dedica un caya na un persona cu ta a base di un lista di cierto cantidad di firma di habitantenan di e caya unda ta mustra cu nan ta di acuerdo cu e cambio di e nomber. E peticion tambe ta contene un descripcion di logronan di e persona, no solamente pa loke ta trata su trabao, pero tambe logronan pa pais Aruba. A base di esey, e peticion lo wordo tuma na consideracion.
“Esaki ta djis un parti chikito di e biografia di Rudy. Awe ta asina leu cu Gobierno ta dedica e caya aki na Rudy Croes. Tabata un anochi agradabel unda su yiunan, rumannan, famianan y coleganan di Partido Movimiento Electoral di Pueblo a reuni pa e momento memorabel y a recorda logronan grandi di Rudy. Santa Cruz y Aruba ta dedica e caya aki na e gran persona Rudy Croes. Danki Rudy, pa tur loke bo a haci pa nos dushi isla Aruba”, Prome Minister a expresa.
