Mediante un publicacion riba nan pagina oficial di Facebook WEB Aruba NV a anuncia cu dia 31 di october a firma un acuerdo cu Wärtsilä Finland Oy pa e ‘RECIP 3 Expansion Project’.
Segun e compania estatal a splica e proyecto aki ta encera expansion di planta RECIP III cu dos motor y ta trata di un aumento di e capacidad actual cu 36 MW. Cu e expansion aki lo yega na un total di 230 MW (capacidad instala) di motornan RECIP. Diabierna ultimo ambos compania celebra e firma di e acuerdo aki durante un ceremonia den workshop di planta na WEB den presencia di colega y invitadonan.
WEB Aruba NV a splica cu e proyecto ta necesario pa por cumpli cu demanda creciente di energia riba termino medio. Manera ta conoci, na augustus 2024 WEB a implementa e planta mobil di 20 MW pa atende cu e demanda pa energia riba termino cortico. E compania ta agrega cu ademas WEB ta explora posibilidadnan pa instala baterianan pa almacena energia.
“Nos expertonan ta consciente di e necesidad imperativo pa sigui explora y studia maneranan pa facilita e expansion di energia renovable na Aruba. E meta di e iniciativanan aki ta pa cumpli cu e demanda creciente pa energia, pa awor y den futuro. E proyecto ta programa pa keda cla na juni 2026,” e publicacion a indica.
Dia 17 di mei ultimo WEB Aruba y Wärtsilä Finland Oy a firma e ‘final take over’ di planta RECIP IV. Cu e firmamento aki, Wärtsilä formalmente a entrega e planta na WEB Aruba.
WEB Aruba a inicia proyecto RECIP IV na 2019 cu e meta pa bay over 100% riba e tecnologia reciprocal, planta RECIP IV tabata plania pa bay den operacion na 2021, sinembargo a haya un tardanza debi na e pandemia COVID-19 y despues algun defecto inicial a pone cu e entrega formal di e planta por a tuma luga te e aña aki.
E prome motornan RECIP a bay den operacion na WEB na aña 2006 y cu esey a inicia e caminda pa reduci uso di e Heavy Fuel Oil costoso, e tempo ey e motibo principal pa a introduci e tecnologia di RECIP tabata pa aumenta eficiencia. Na 2013 tabata obvio cu e eficiencia aki no tabata solamente pa reduci gasto, pero mas importante pa baha emision di gas den medio ambiente.
Awendia WEB Aruba ta conta cu un produccion di energia, usando un mix di energia di solo y di biento, pero tambe di almacenahe di energia y cu IGMS, e sistema di maneho di energia inteligente. Segun nan ta sigura, cu tur e esfuersonan aki, WEB Aruba a logra baha consumo di Heavy Fuel Oil cu casi 60% desde 2005, sinembargo, e averahe di demanda di coriente di e isla, compara cu aña 2023, a subi cu 10% cual ta hopi halto y esaki por ta debi na aumento di temperatura pero tambe debi na crecemento economico y turistico.
