A pesar cu ta tarda hopi, Proyecto di reconstruccion di caminda na area di hotel ta dentro di tempo stipula

Manera ta conoci dia 22 di april DOW Aruba a cuminsa cu e proyecto di reconstruccion di caminda di e area di high rise hotels. E proyecto aki a ser dividi den cuater fase y aworaki ta den fase cuater pa termina pa por termina e proyecto.

Durante e proyecto aki lo drecha e rioolering, sistema di drenahe, tubo di presion y ta asfalta e caminda. E area dilanti di high rise hotels, specificamente dilanti Riu Hotel, ta un area cu tabata conoci pa problema cu rioolering y awa cu ta keda pega, specialmente ora awa yobe.

Desde a inicio di e proyecto di reconstruccion DOW a finalisa fase un, dos y tres, y aworaki fase cuater ta andando. Segun informacion fase cuater, cual ta e ultimo fase pa e aña aki, a inicia dia 5 di september y e fase ki lo tin un duracion di 11 siman. Motibo pakico fase cuater ta dura mas cu e otro fasenan, ta pasobra e caminda ta mas largo compara cu e otro fasenan.

Ultimo actualisacion di DOW Aruba pa loke ta e proyecto aki ta tabata 29 di october den cual ta inofrma cu contratista ta bashando e banchinan y ora cu keda cla cu esaki lo pasa over na cuminsa basha basecourse pa asina por asfalta e caminda.

Bon Dia Aruba a tuma contacto cu un representante di DOW pa asina puntra si e trabounan ta bayendo segun schedule, si a encontra algun contratiempo y si e trabounan lo keda cla na tempo of ki tempo esakinan lo keda cla. Pero no a logra ricibi un contesta prome cu e ciere di edicion.

A pesar cu e proyecto ainda ta dentro di e tempo indica cu l tarda pa finalisa, algun ciudadano a cuminsa cuestiona e duracion di trabounan, mirando cu desde april e caminda ta cera, y con esaki lo tin un impacto riba turismo, cu ta e pilar economico di Aruba.

Desde april te cu november DOW Aruba a realisa varios trabou di reconstruccion di caminda na diferente parti di Aruba y ta trahando ainda riba algo otro Teniendo na cuenta cu turismo y e importancia pa semper duna un bon impresion na turistanan, ta cuestiona si e duracion di e proyecto aki no por tabata un poco mas cortico pa asina finalisa esaki mas lihe y evita cualkier inconveniente pa turistanan.