Den un carta recien di Secretario di Estado pa Relacionnan di Reino, Zslot Szabo y minister di Husticia y Seguridad di Hulanda, D.M. van Weel a toca e tema di estado di derecho na e islanan Caribense di Reino. E carta ta duna informacion riba e revision di e rol di Hulanda y Reino segun Articulo 1 di statuut, y ta introduci e recalibracion di e maneho aki.

Dia 6 di maart 2023, e revision di politica di Articulo 1 di capitulo IV Relacion di Reino di e Presupuesto di Reino ‘Reforsando Estado di Derecho’ (revision di politica Articulo 1) a keda presenta na Tweede Kamer. E investigadornan a conclui cu e compromiso Hulandes cu e cadena di ley ta valioso, pero tambe ta mira espacio pa mehoracion. Por ehemplo, mientras cu e meta di Articulo 1 ta “reforsa estado di derecho,” en practica, e enfoke principalmente ta riba cumplimento di ley. Investigadornan tambe a nota cu e cadena di ley den partinan Caribense di Reino ta vulnerable, ya cu no tin suficiente inversion den varios componente, y inversionnan local y Hulandes existente ta considera inadecuadamente e cadena en su totalidad.

E retonan pa tanto Bonaire, Sint Eustatius y Saba (BES) como Aruba, Corsou y Sint Maarten (ACS) ta significante. Nan ubicacion geografico cerca di America Latino y dentro di Reino ta haci e sociedadnan aki obhetivonan atractivo pa criminalnan. Na mes momento, e escala chikito di e islanan ta agrega na e retonan di un estado di derecho funcional. Ya cu crimen no ta stop na fronteranan, su efectonan ta sinti tanto den partinan Caribense di Reino como den Hulanda Europeo. Conversamente, un estado di derecho fuerte na ACS ta sirbi como un barera contra crimen na BES y Hulanda Europeo. Pues, ta den interes directo di Hulanda pa cooperacion den asuntonan di estado di derecho funciona bon.

Adicionalmente, internacionalmente ta mira Reino como un solo entidad, y ta tene Hulanda responsable pa problemanan di estado di derecho na cualkier pais.

Den respuesta na e revision di politica aki, Secretario di Estado pa Asuntonan Interno y Relacionnan di Reino (BZK), Minister di Husticia y Seguridad (JenV), Secretario di Estado JenV, y minister di Defensa conhuntamente ta priminti di recalibra e compromiso di Hulanda pa e cadena di ley den e paisnan (“e recalibracion.”). Den e carta, ta informa Tweede Kamer, tambe den nomber di Minister di Defensa, tocante e resultadonan di e recalibracion.

Prome, e obhetivo di politica di Articulo 1, “reforsando estado di derecho,” ta bay keda refina. E articulo aki ta cay bao Capitulo IV Relacion di Reino di Presupuesto di Reino.

Di dos, e carta ta atende solucionnan identifica den JVO (Consulta Quadripartite di Husticia) pa atende e desbalans den cadenanan di cumplimento di ley den e paisnan Caribense den Reino, cual ministerio JenV ta bay atende den cooperacion cu BZK, Defensa y e paisnan Caribense.

Articulo I di Presupuesto: Reforsando Estado di Derecho

Residentenan di Reino mester por confia cu derechonan humano, bon gobernacion y certeza legal ta protegi unda cu nan ta den Reino. Esaki ta componentenan esencial di un estado di derecho democratico funcional, na cual e paisnan di Reino individualmente y conhuntamente a compromete. Pues e proteccion aki ta inclui explicitamente den Articulo 43, paragraf 2 di Statuut.

Statuut ta establece cu e realisacion di derechonan humano fundamental, seguridad legal y bon gobernacion ta responsabilidad di e paisnan mes (Articulo 43 prome paragraf). Hulanda ta sostene Aruba, Corsou y Sint Maarten den esaki, parcialmente a traves di Articulo 1 den Capitulo IV di Presupuesto, Relacionnan di Reino. Manera menciona, e esfuerso aki actualmente ta enfoca riba cumplimento di ley. E investigadornan di e revision di politica di Articulo 1 ta critico riba eaki, ya cu cumplimento di ley (i.e. polis, wardacosta, aduana, etc) ta solamente un componente di un estado di drecho cu ta funciona bon. Institucionnan fuerte manera bureaunan di integridad y un sociedad civil vibrante ta sigura e proteccion di libertadnan di e ciudadanonan y resolucion di problemanan social. Salvaguardia derchonan fundamental, reforsa democracia y establece gobernacion confiable ta e tareanan central di minister BZK na Hulanda. Pa e motibo aki, den cooperacion cercano cu Ministerionan JenV y Defensa, BZK ta comprometi na yuda e paisnan Caribense di Reino establece un estado di derecho vibrante y robusto.

Den añanan recien a haci esfuerso, particularmente a traves di Articulo 1, pa reforsa bon gobernacion y promove integridad na Aruba, Corsou y Sint Maarten. Ministerio BZK financia un proyecto conhunto cu ta yuda e paisnan aki desaroya hermentnan administrativo pa combati crimen cu ta mina sociedad.

Esaki ta inclui genera consciencia entre ambtenaarnan, contrata capacidad legislativo pa hancra e hermentnan aki, y establece perfilnan di crimen cu ta mina sociedad. Minister di JenV recientemente a anuncia exploracion di opcionnan di fondo pa tambe involucra Bonaire, Saba y Sint Eustatius.

E maneho aki ta contribui na un sociedad resliente unda crimen cu ta mina sociedad tin dificultad pa logra establece su mes. Oportunidadnan pa labamento di placa y corupcion ta keda reduci. Siguiendo e recalibracion, ministerio BZK tin intencion pa intensifica cooperacion den promove estado di derecho democratico.

A tuma stapnan inicial na 2023: cu fondo di BZK, a organisa e prome Cumbre di Integridad Caribe Hulandes na 2023 cu bureau y agentenan di integridad di e seis isla.

Trinta participante di 15 diferente organisacion gubernamental a tuma un stap inicial pa cooperacion structural y construccion di capacidad. BZK subsecuentemente a lansa e Plataforma di Integridad Caribe Hulandes, cu meta pa intercambio structural di conocemento y experiencia entre e seis isla riba e tema di integridad.

E plataforma ta enfoca riba tanto integridad administrativo como den manho. E luna aki, BZk den colaboracion cu e islanan ta bay organisa e di dos Cumbre di Integridad Caribe Hulandes na Sint Eustatius. E enfoke ta bay ta riba establece politicanan di integridad, crea y posiciona bureaunan di integridad, instala protocolnan pa reporta, proceduranan di investigacion, y aumenta conscientisacion dentro di organisacionnan y pafo.

Ademas, monitoreo di integridad na e diferente parti Caribense di Reino ta deseable, ya cu ta permiti comparacion di integridad y gobernacion cu otro pais y isla den region di Caribe y den Rieno.

Den e proximo periodo, ministerio BZK, den colaboracion cu Aruba, Corsou y Sint Maarten, ta bay explora kico ta necesario pa e partinan aki di Reino participa den e indice- y monitornan existente di integridad y gobernacion y kico e participacion aki ta bay genera. Pa e proposito aki, ministerio BZK tin plan pa participa den discusion cu organisacionnan manera Transparency International.

Aruba, Corsou y Sint Maarten tin un sociedad civil vibrante cu hopi organisacion dedica na nan comunidadnan. Un sociedad civil fuerte ta un prerekisito pa autodependencia. Pa e motibo aki, Hulanda ta sostene reforsa e organisacionnan aki. E partidonan aki ya ta utilisa recurso di varios departamento Hulandes unda cu ta posible. Por ehemplo, BZK a aloca mas cu $7 miyon pa R4CR – Proyecto di Facilidad di Asociacion di Sociedad Civil pa Reciliencia – na Sint Maarten, a traves di cual a lansa mas di 100 proyecto.

E enfoke ta riba organisacionnan di sociedad civil cu ta construi capacidad door di profesionalisa otro organisacionna. Ministerio BZK, a traves di Representacion di Hulanda na Aruba, Corsou y Sint Maarten, tambe ta sostene proyectonan riba integridad, gobernacion, seguridad social y ciudadania democratico. Dia 16 di mei, representante di Hulanda na Aruba, Corsou y Sint Maarten a tene un recepcion di networking pa comunidad LGBTQI+ Arubano riba e isla.

Ministerio BZK ta trahando riba un propuesta pa revisa Articulo 1 pa asina e temanan menciona tin un lugar visible den politica a largo plaso. Esaki ta bay involucra cooperacion cercano cu ministerionan JenV, Defensa y Finanzas. Ta bay informa Tweede Kamer riba esaki den prome mita di 2025.