A traves di su rednan social CEDE Aruba, ken ta promove pa trece hende y recursonan hunto pa un desaroyo sostenibel, ta haciendo un encuesta pa asina haya sa informacion concreto riba e necesidadnan y interesnan di habitantenan di e barionan rond Aruba.
Den e lucha contra e problemanan socioeconomico y social na Aruba, nan ta trece e gruponan meta den contacto cu por fortalece otro y semper cu tin oportunidad pa desaroyo social y educativo.
Manera ta conoci, CEDE ta contribui na un comunidad caminda hende di tur edad por desaroya nan mes. Nan ta kere cu desaroyo sostenibel den comunidad di Aruba ta factibel.
Un di nan proyectonan conoci ta Bario Unico e cual ta sigui sirbi como e team organisatorio pa e sesionnan di trainingnan aki, facilitando conexion entre organisacionnan riba e isla y facilitadornan cu experticio riba nan tereno, promoviendo un ambiente di desaroyo y colaboracion.
Un di e metanan crucial di e proyecto aki ta pa fortalece e comunidad di e isla, duna centronan di bario y otro organisacionnan e recurso y hermentnan necesario pa crea un impacto social positivo.
Pa e motibo aki, nan a crea un encuesta unda e opinion di ciudadanonan ta hopi importante pa asina yuda nan mehora e barionan door di yena e encuesta rapido aki e cual tin como meta pa colecta informacion concreto basa riba necesidadnan y interesnan di e habitantenan di bario. E encuesta a ser desaroya pa Bario Unico bao guia di CEDE Aruba.
E informacion compila lo yuda Centronan di bario y otro organisacion den mehoracion di nan programanan, actividadnan y servicionan cu ta na beneficio di e comunidad
Importancia di henter e encuesta ta pa crea barionan prospero, sigur y diverso, unda ciudadanonan por conecta na Centronan di Bario cu ta bon ekipa cu programanan a traves di arte, cultura, deporte, boluntario y iniciativanan educativo, promoviendo tanto desaroyo individual y tambe comunitario.
Den encuesta aki ta puntra e persona den cua bario e ta biba, cuanto aña tin bibando den dje, kico ta e cosnan cu mas e ciudadano ta gusta y no ta gusta di su bario, si tin espacionan pa actividadnan den aire liber manera pa hende cana y pa usa bais, si tin bon servicio di bus, si tin espacionan recreativo, si tin espacionan pa hende cu tur tipo di habilidad, si tin bon iluminacion den su cayanan y si tin acceso na servicionan cu ta bishita regularmente manera supermercadonan, scolnan, banconan, restaurant, entre otro.
E encuesta aki ta disponibel den dos idioma, Ingles y Papiamento, tambe esnan cu a yena nan datonan caba, e dia di awe lo tin oportunidad di gana un premio. Algun ganado a ser anuncia caba.
