Ayera, a traves di un comunicado di prensa, a indica cu Gobernador di Aruba, Su Excelencia Alfonso Boekhoudt, a manda un carta na presidente di Parlamento di Aruba, Raymond Kamperveen, pidiendo opinion di Parlamento riba retiro di minister Glenbert Croes relaciona cu caso Portulaca.
Segun e comunicado di prensa:
“Diaranson 9 di october 2024, Prome Minister, Sra. E.C. Wever-Croes, a presenta Gobernador di Aruba cu un concepto di decreto nacional pa wordo firma. E concepto di decreto nacional ta trata retiro di Sr. G.F. Croes como Minister di Labor, Energia y Integracion. Minister Croes a pidi pa e wordo retira conforme articulo 17, sub b, di e Ordenansa Nacional pa Integridad di Ministernan.
“Mesun dia Gobernador a manda un carta pa Presidente di Staten di Aruba pidiendo opinion di Parlamento riba e retiro consecuente di e minister. E opinion aki ta wordo pidi a base di articulo II.2, prome inciso, di Constitucion di Aruba.”
Manera ta conoci, siguiendo su aresto en conexion cu caso Portulaca, minister Glenbert Croes a entrega su retiro como minister di Labor, Energia y Integracion. Prome minister a indica cu “Señor Glenbert Croes mes a tuma e desicion aki pa retira di su posicion pa motibo di ta wordo considera un sospechoso den e investigacion di e caso Portulaca. Ademas den Partido MEP y den gobernacion actual tin principio y regla, cu si un Minister of miembro di Parlamento den funcion bira un sospechoso den un caso, cu e lo tuma su retiro inmediatamente pa asina garantisa transparencia y permiti cu e proceso legal sigui sin obstruccion.”
