Den conferencia di prensa dialuna ultimo, minister di Enseñansa y Deporte, Endy Croes a confirma cu ta bay presenta den Parlamento dia 15 di october proximo relaciona cu e caso di fraude den Stichting Sportsubsidie Aruba.

Dia 4 di october ultimo, presidente di Parlamento, Raymond Kamperveen (Raiz) a indica den un entrevista pa Bon Dia Aruba cu e ta considera e caso di SSA uno hopi urgente. “Un reunion cu ta hopi na su luga aworaki, e ta un tema cu ta recien y ta importante pa nos scucha for di minister Croes kico a bay robes. Mi no sa si e por bin tambe cu e voorzitter di SSA pa tambe por contesta preguntanan, pa tin mas claridad riba e situacion. No solamente pa nos como parlamento sino tambe pa pueblo haya sa kico a sucede,” el a bisa.

Dialuna, minister Croes a bisa cu “nos sa desde ultimo dos siman tin e storia di SSA – cu ta Stichting Sportsubsidie Aruba. Nos sa tambe cu nos a para dilanti un conferencia di prensa ‘kinan y a duna caba detayes kico tabata wordo encontra eyden.”

Segun Croes, “e linea cora” tabata en berdad cu tabatin tres persona cu lo tabata ricibiendo subsidio “pero no tabata organisa pa e proposito cu nan ta manda un carta aden.”

“Nos a splica tambe cu e director di SSA a wordo schors mesora, a admiti culpabilidad den un carta cu el a pidi – nos ta laga esey pa por ta den Parlamento nos por elabora mas, pero el a pidi disculpa, pordon, y a admiti y entrega su retiro. Nos sa cu SSA despues di den september a constata esaki, den september a haci nan investigacion, den september a percura pa schors e director kende despues a entrega su retiro, y 25 di september nan a entrega keho oficial” na Ministerio Publico. Croes a bisa cu pa e motibo aki mester duna espacio na autoridadnan “pa haci e restante di trabao.”
Croes ta conclui cu “nos a actua corectamente, manera cu mi a wordo notifica mi a pidi nan haci investigacion y tuma e pasonan corecto y concreto, y nos ta lamenta cu te ainda tin un emisora y un news cu ta keda bin cu hopi storia ariba.”

Croes a bisa cu durante e reunion dia 15 di october “lo mi elabora riba e caso aki specificamente.”

Presidente di Parlamento a yama minister Endy Croes pa di tres biaha

Riba un comunicado publica riba pagina di Facebook di Partido Raiz, presidente di Parlamento, Raymond Kamperveen a publica un declaracion tocante e reunion publico den Parlamento riba caso di SSA.

“Despues cu a sali na cla diferente informacion tocante un posibel caso di corupcion den e directiva di Stichting Sportsubsidie Aruba (SSA), instancia previamente dirigi pa un coordinador di Minister Endy Croes, a yama e Minister encarga pa bin rindi cuenta na Parlamento. Ya caba a purba di convoca un reunion publico na dos ocasion, esta dia 3 di october y 7 di october. Den tur dos ocasion e reunion a wordo nenga pa e mandatario.”

E presidente a continua bisando cu “dia 15 di october, otro siman diamars, ta e fecha nobo stipula pa señor Kamperveen pa asina duna e Minister un di tres oportunidad pa aclaria e caso di malversacion di fondo na SSA. Pues cu e di tres intento aki lo a duna e gobernante amplio oportunidad pa haya un espacio den su agenda pa asina presenta na Parlamento di Aruba.”

A agrega cu “nenga di presenta un di tres biaha na Parlamento pa un reunion publico unda cu lo trata un caso di corupcion siguramente lo manda un señal cu Minister Endy Croes y partido MEP no tin integridad na pecho. Pues ta su deber pa rindi cuenta na Parlamento di Aruba cu ta e organo mas halto di nos pais encarga cu e tarea di controla gobierno.”

Finalmente, Kamperveen a menciona detencion di ex-minister di MEP, Glenbert Croes: “Ya caba e partido tradicional a sufri di un gran impacto ariba su credibilidad e ultimo dianan aki pa via di un kebrante di integridad unda cu un otro mandatario esta ex-Minister Glenbert Croes a wordo deteni como sospechoso den un caso di corupcion cu lo trata di permisologia. Glenbert Croes lo ta e di tres minister di MEP cu ta bira sospechoso den un caso penal. Tur tres a fungi como minister bou di e liderazgo di señora Prome Minister Evelyn Wever-Croes. Plataforma Raiz ta conta ariba e sano huicio cu ainda lo por keda den partido MEP, pa asina exigi di su Minister pa presenta dia 15 di october 2024 na parlamento. Integridad bo no ta papi’e, integridad bo tin di haci’e.”

Controversia cu caso SSA

Despues e noticia a bira conoci cu algun persona di Stichting Sportsubsidie Aruba (SSA) a keda suspendi pa motibo di iregularidadnan cu uso di algun fondo, parlamentario di MAS, Marisol Tromp a informa cu el a bay Ministerio Publico pa entrega un keho di posibel delito penal bao funcion di ex-director di e stichting aki.

Den un comunicado ta splica cu lider di fraccion di MAS a entrega na Ministerio Publico pruebanan cu el a ricibi di malversacion den un fundacion di deporte di gobierno cu ta resorta bao minister Endy Croes.

“Hopi biaha hende ta tende rumor y ta papia riba caya, pero den e caso aki, parlamentario a ricibi pruebanan preto riba blanco. Y e ta compronde e consternacion cu tin riba e caso aki, pasobra ta trata di berdad over di mal uso di funcion di e director di Stichting Sportsubsidie Aruba (SSA),pero ta wak tambe cu valsheid in geschrifte ta tuma lugar.”

Den e keho ta papia tocante placa di subsidio cu no ta yega nan destino, invoicenan ta wordo falsifica y cu tin un modus operandi. “Mi ta haya hopi lamentabel cu un gobierno cu ta papia di integridad, no ta prome bes cu ta wak e tipo di modus operandus aki y vooral cu e minister aki ya a hay’e envolvi den un caso similar antes. Aworaki por mira cu esaki ta sosode atrobe y laga husticia haci su trabao.”

E Parlamentario a critica cu no a entrega un keho na Ministerio Publico, pero Fundacion Sportsubsidie Aruba (SSA) ta sigura cu nan a entrega un keho dia 25 di september ultimo na autoridadnan di Landsrecherche pa iregularidadnan detecta dentro di e fundacion.

Mediante un comunicado, nan tambe a informa cu “e iregularidadnan detecta ta regarda transaccionnan financiero sin cu e obhetivonan deportivo planea a wordo realisa. SSA ta laga e proceso aki den man di e autoridadnan hudicial corespondiente pa haci nan trabao.”

Tambe tabatin controversia pasobra e director di SSA tabata un persona cercano na prome minister Evelyn Wever-Croes. Prome minister a señala cu “berdad ta trata di un persona cu ta toca na mi famia, pero no ta pa e motibo ey cu el a wordo encarga cu e puesto, sino tur su preparacion financiero na universidad y despues den deporte. A pensa cu e ta e persona cu por a wordo confia cu e posicion, awor tin sospecho di malversacion.”

Pa finalisa, prome minister a enfatisa cu “ni con cerca e persona ta di nos, e lo mester carga su responsabilidad. Esaki sigur ta e diferencia mas grandi entre nos Gobierno y e partidonan den oposicion cu no por bisa mescos. E caso ta den man di OM y lo duna nan espacio pa haci nan trabao pa asina husticia por vence.”