Corupcion a bira… Algo structural caba…?

E aresto sorpresivo di otro ministro di nos pais a coincidi cu atencion den parlamento Hulandes pa e situacion di corupcion na e islanan den Caribe, banda tambe di e situacion di e refugiadonan Venezolano, cu tambe a conduci na pregunta pa e mandatarionan concerni. Atencion anto pa nos isla den prensa y politica Hulandes y atrobe no den sentido positivo. Secretario di estado Szabó a pidi mas tempo pa su contesta, argumentando cu e ta desea di scucha expertonan di Transparency International riba e tema aki. No pa casualidad algun aña pasa a tuma lugar un investigacion segun e modelo di un ‘Nationaal Integriteits Systeem (NIS)’, cu tabata un iniciativa di Stichting Deugdelijk Bestuur Aruba, cu a acerca gobierno di Aruba cu e proposicion pa laga haci e investigacion conhuntamente.

Nos no ta bay aki den detaye tocante e rapport aki; en todo caso e rapport a mustra cu corupcion y falta di integridad ta di tal nivel cu actuacion urgente ta necesario. E rapport lo ta na disposicion di gobierno Hulandes tambe, nos por supone. Ademas, nos mester por supone tambe cu den cuadro di e colaboracion cu tin dentro di e organizacion temporal pa e Landspakket, e ‘Tijdelijke Werkorganisatie’ (TWO) cu ta operando algun aña caba, e empleadonan publico Hulandes lo mester a topa cu hopi di e fayo y deficiencianan cu tin den nos gobernacion. Sin duda algun nan lo a raporta riba e asuntonan ey tambe. Y cu e responsabilidad di gobierno di Reino pa garantiza gobernacion adecua, lo ta cuestion di tempo pa nos mira accion di e banda ey.

Sin embargo, loke nos mester puntra nos mes kico nos mes mester haci. Puntra nos mes, si cu tanto mandatario bao investigacion no tin algo fundamental y structuralmente robez den nos sistema di gobernacion, cu e consecuencia cu si nos no ta tuma paso drastico, nos ta keda mira e fenomeno aki ta bolbe. Esey riba su mes ta malo, pero tin efecto negativo mas amplio den nos comunidad y nos economia tambe. Y na e momento aki nos ta na un punto crucial den nos desaroyo socio-economico. Di un banda nos tin un desaroyo economico faborable, cu pa un tempo ta garantiza cu gobernacion tin recurso pa opera. Pero nos no por contempla solamente e aspectonan positivo di e momento, sino tambe mester duna debido atencion na e problemanan na horizonte. Esey no tin nada di haci cu un vision pesimista, esey ta simplemente contempla futuro cercano cu e realismo necesario. Y kico tin na caminda pa nos anto?

Por ehemplo, un aumento rapido di nos poblacion, a base di e expansion economico cu ta exigi hopi mas forza laboral cu nos tin. A proposito, Aruba su propio poblacion ta bayendo atras. Aña 2024 lo termina cu un cifra di fayecimento cu ta como 200 mas halto cu e nacimentonan. Nos tin un poblacion cu mas y mas lo consisti di hende pensiona cu pa gran mayoria no lo traha. E tendencia aki ta haci nos mas dependiente ainda di importacion di trahador den e proximo decada. E importacion aki mester tuma lugar na un manera ordena, pa nos por ta sigur cu ta tuma e pasonan corecto, y no cu corupcion ta ocasiona cu nos no por ta sigur ta ken ta drenta nos pais, y pa keda…

E sobrepoblacion cu Aruba a conoce caba ta causa cu recursonan natural, manera tereno pa urbanizacion a bira scars, y si no tin un administracion adecua, liber di corupcion, esaki tin consecuencia devastador den sentido economico y moral. Escasez di recurso semper ta pone mas presion riba un administracion publico pa no opera di manera husto y transparente, y si no ta haci e debido esfuerzo esaki ta ocasiona un deterioro di mentalidad, unda cada ken lo bringa pa nan interes, unda cu esun cu ta paga mas ta haya su gana. Tin mas proceso di permiso cu gobierno ta emiti y pa tur ta conta loke ta describi aki pa admision y tereno, e dos procesonan mas vulnerable te awor, loke nos por deduci tambe di e acusacionnan contra e mandatarionan cu a topa te awor cu persecucion penal. En todo caso, si nos ta pretende di por garantiza un sociedad husto pa e generacionnan despues di nos, unda cada ken tin derecho di desaroya nan mes, cu igual derecho riba acceso na beneficio cu gobernacion ta reparti na un manera corecto y equitativo, nos no por sigui permiti cu nos politiconan ta opera sin control, repartiendo beneficio estatal na e ‘highest bidder’. Claro cu lo mustra nos riba e pasonan cu a tuma te awor pa mehora operacion integro den e aparato publico. Tin un ley cu ta obliga ministro entrega nan retiro ora nan ta sospechoso den un caso penal. Pero a cambia algo den e manera cu ministronan ta organiza nan tareanan? Tin regla y proceso fiho cu un ministro ta bin haya ora e drenta cu e no por pone un banda y dal bay manera e ta haya ta bon? No ta straño cu net riba e tereno aki nos no ta mira nada ta move, nada ta mehora y cada biaha atrobe ta e sistema hudicial mester interveni pa pone un paro na actuacion coruptivo? Nos a yega na e punto unda tur actor politico mester dicidi pa nan mes si nan ta insisti den mantene un sistema di corupcion, unda ta trata esnan cu cay cera como caso di ‘mala suerte’, o ta yuda crea un sistema unda ta combati corupcion structuralmente.