Despues di e detencion di Glenbert Croes, ken tabata fungi como minister di Labor, Energia y Integracion, ken te ainda ta deteni pa ta e sospechoso principal di e caso Portulaca, diferente reaccion a cuminsa surgi di otro partidonan, como por ehemplo, Marisol Tromp ken a bisa cu for di un aña y mei ta bin solicitando un reunion publico pa loke ta trata e maneho di Croes como minister.

E ta sigura cu Croes, “tin un free for all den su maneho di inmigracion, temanan den Dimas, retiro di director, proceduranan cu no ta respeta unda el a bisa algun tempo pasa cu e no ta laga e director pa handle y firma, e mes ta firma.”

Den un video Tromp ta señala cu e “tabata firma sin tene na cuenta cu e maneho cu tin y ta e motibo pa cual nos a pidi un reunion publico no un bes, nos a manda rappel, di dos rappel, di tres rappel y na final nos a bin logra haya un reunion publico, 16 di april unda nos a presenta un mocion di desconfiansa pa cu su maneho y nos a splica tambe pakico.”

E mocion aki a ser rechasa na Parlamento di Aruba cu 12 voto contra y 8 voto na fabor, “loke ta interesante ta pa wak e tempo ey cu tur e datonan y informacionnan cu nos tabatin y cu nos a trece pa dilanti den e reunion publico aki,” el a sigura.

Tromp a sigura cu el a splica y mustra na fraccion di partido Raiz e documentonan cu “ta preocupante” y cu tin documentonan cu ta mustra cu “minister Glenbert Croes ta manda carta pa cierto contratistanan, priminti nan cosnan cu ta imposibel cu por haci esaki den un fase cu e hendenan no ni a yega Aruba y di ultimo ora a bin inval den su oficina na Cocolishi cu no ta normal pa drenta Cocolishi pero tambe nos a wak cu a yega na cas di su mesun famia y esaki caba ta ilustra un situacion hopi preocupante pa gobierno y cu tin sospechosonan envolvi unda tin motibo pa haci e entrada aki.”

E tempo ey, e mesun ministerio a manda un comunicado pa prensa y tambe a sigura cu Croes no tabata sospechoso. Den su opinion, Tromp ta sigura cu prome minister ta “para ariba cu e tin un gobierno integro y cada bes e ta manda palabranan de mi direccion. Pero nos ta wak cu den su gobierno tin varios caso y cu esaki no ta e prome, anto den caso aki ta bin for di un politico cu por bisa di basta aña, cu tin su votonan, pero un politico tambe cu na varios ocasion spotlight ta riba dje door cu e no por keda sin usa su pen na momentonan hasta consehonan ta bis’e pa no firma y ta haci’e toch.”

Pa Tromp, aworaki por mira e consecuencianan y no obstante cu Aruba ta den un periodo electoral “ta hopi serio y mi ta hopi curioso pa wak kico minister presidente ta bay splica pasobra, manera mi a yega di bisa caba, no tin nada cu minister president lo no haya indicacion di dje.”

Tromp ta considera cu prome minister por tabatin conocemento di loke tabata sucediendo mescos cu Tromp ken a bisa cu e por a haya e documentonan y mira “mi ta publica esakinan regular di kico ta wordo haya y sinembargo, nos ta wak cu nan ta keda nenga y haci manera ta normal. Awe bo ta wak e consecuencianan y es mas, e ley cu a wordo traha iniciativamente door di MEP bisando cu nos tin cu haci un extra screening streng riba tur e ministernan.” el a bisa.

E ley aki di Integridad ta di aña 2021 e cual a pone cu screening riba minister mester ta mas intensivo unda a traha articulonan den dje como por ehemplo articulo 17 cu ta bisa cu “ora cu e minister bira sospechoso, e mester baha. E tempo ey nan a hiba discurso y a ataca diferente otro hende di partidonan di oposicion cu nan mester a bay cera, kita nan salario, manda nan cas, etc. Awe e mesun ley ey ta aplicable pa nan tambe, e ta aplica pa tur, kiermen no solamente pa e motibonan di pakico a bin cune e tempo ey pero aworaki nan ta haya un situacion cu pa nan mesun minister e ley ta ser aplica riba dje cual ta nifica cu e tin cu entrega su retiro,” el a finalisa.

E investigacion Portulaca ta trata di entre otro dirigi riba e sospecho di delitonan encuanto dunamento di permisonan di estadia/trabou entre 2020 te cu awor.

Anteriormente, dia 4 di juni 2024 den e mesun investigacion Portulaca, detencionnan tambe a tuma lugar caba. E tempo ey tambe listramento den diferente cas por ehemplo, esun di su mama unda e fundacion “Union ta Forsa” a ser reactiva pa campaña 2021 y edificionan comercial a sucede y a confisca diferente obhetonan.

Di e investigacion haci despues na e obhetonan confisca, e sospecha contra e minister a surgi y Ministerio Publico a aplica riba e sospechoso restriccionnan den interes di e investigacion. Esaki ta nifica cu e sospechoso por tin contacto solamente cu su abogado y no cu otro hende.