Diabierna ultimo, Secretario di Estado pa Relacionnan di Reino y Digitalisacion, Zsolt Szabo, mediante un carta a informa cu no lo duna contesta na pregunta di parlamentario di PVV, Van Haasen, tocante corupcion den Caribe Hulandes dentro di e periodo stipula di tres siman.

“Mediante e carta aki mi ta informa bo persona cu e preguntanan haci door di parlamentario Peter van Haasen di PVV tocante instabilidad politico y corupcion den parti Caribense di Reino (manda dia 11 di september 2024), cu kenmerk 2024Z13370, no por haya contesta dentro di e termino di tres siman,” Secretario di Estado Szabo a skirbi. “Pa por contesta e preguntanan tin mester di mas tempo. E solicitud di informacion adicional a dura en berdad mas largo cu loke a spera. Parlamento lo ricibi e contestanan lo mas pronto posible.”

Den un nota motivando e carta, cual a entrega hunto cu e carta, Szabo ta bisa cu ya a presenta respuestanan preliminar, cu ta desea mas informacion tocante e rol di e organisacion no-gubernamental Transparency International y particularmente riba su trabao den Caribe for di dia 10 di october 2010. A indica cu ya a haci un solicitud pa informacion di Transparency International.

Prensa di Reino a reporta cu e Secretario di Estado tabatin e respuestanan cla pa entrega na e parlamentario, pero a pospone nan entrega.

E preguntanan di Van Haasen a bin dilanti despues di un cantidad di violacion di integridad involucrando politico den Corsou, Aruba y Sint Maarten. El a expresa preocupacion tocante e clima politico instabiel y corupcion amplio na e regionnan autonomo aki, y a cuestiona si e problemanan aki ta stroba bon gobernacion.

Citando varios articulo, di fuentenan manera NOS, AD, The Daily Herald y Caribisch Netwerk, parlamentario Van Haasen a haci tres pregunta na e Secretario di Estado:

1. Secretario di Estado ta na altura di e situacion politico instabil y corupcion generalisa na e paisnan autonomo dentro di nos Reino?
2. Secretario di Estado ta comparti e opinion cu su metanan di bon gobernacion, un politica financiero solido y e autosuficiencia economico ta alcansable solamente cu un administracion integro y liber di corupcion?

3. Secretario di Estado ta considera cu gobierno Hulandes tin un rol den monitoria corupcion y integridad na e paisnan autonomo dentro di nos Reino siguiendo e mesun criteria cu Transparency International?

E hecho cu Secretario di Estado Szabo a dicidi pa consulta Transparency International prome cu duna un contesta ta un indicacion cu ta tumando e tema na serio y tin intencion pa profundisa riba e hallazgonan di e ONG.

Corupcion na Aruba

Despues cu ayera minister demisionario di Labor, Glenbert Croes (MEP) a keda aresta den conexion cu caso Portulaca, e tema di corupcion den e parti Caribense di Reino a haya spotlight un biaha mas. Pero esaki ta apenas e caso mas recien pa ilustra un problema hopi mas amplio.

Den pasado, Bon Dia Aruba a publica e situacion preocupante di corupcion den gobernacion na Aruba.

Corupcion den poder ehecutivo na Aruba (Gobierno di Aruba)
 Aruba tin record den Reino di politiconan condena pa hechonan castigable, incluyendo ex-minister di Finanzas, Tico Croes di gabinete di Henny Eman III pa caso di Fondo di Desaroyo Nobo San Nicolas su sentencia (Onherroepelijk).

Ex-minister Paul Croes, cu tabata minister di Hubentud, Asuntonan Social y Labor den Gabinete Mike Eman II, tambe a keda condena penalmente den e caso IBIS pa diferente delito manera labamento di placa, participacion den un organisacion criminal, acepta y pidi soborno y abuso di su funcion. Paul Croes su sentencia ta tambe ta onherroepelijk y na e momentonan aki ta pagando su debe cu husticia di Aruba na KIA.

Benny Sevinger, parlamentario y ex-minister di Infrastructura, Integracion y Medio Ambiente den Gabinete Mike Eman I y II, ken a keda condena den corte di prome instancia y HOF den e caso Avestruz recientemente pa otorgamento di tereno di gobierno, mal uso di su fundacion Curason Berde, estafa di pais Aruba y aceptacion di soborno.

Corupcion den poder legislativo na Aruba (Parlamento di Aruba)
 Alan Howell, ken tabata e sospechoso principal di e caso Diamanta y tabata fungi como vice-presidente di Parlamento di Aruba, tambe a keda condena pa malversacion di fondo y falsificacion di documento pa corte di prome instancia. Aworaki su sentencia ta den apelacion.

Conhuntamente cu Howell, tin Jacqueline van Putten, ken tabata candidato riba lista y tabata tesorera di e fundacion di fraccion di partido POR den Parlamento di Aruba yama Blue is Love Foundation. Den sentencia ta indica cu Van Putten a enrikece su mes cu ‘Sinterklaas’ bonus cu e no tabatin derecho riba dje. Van Putten no a apela su sentencia, loke ta haci su condena onherroepelijk.

Politiconan sospechoso di husticia na e momentonan aki
 Otmar Oduber , ex-minister di Infrastructura y Medio Ambiente di Gabinete Wever-Croes I, na momentonan aki ta sospechoso den caso Flamingo relaciona cu otorgamento di tereno y lo cuminsa oficialmente na corte na luna di november.

Chris Romero, ex-minister di Transporte y Sector Primario di Gabinete Wever-Croes I, tambe ta sospechoso penal den e caso Kwihi pa algun contract di servicio otorga den su funcion como minister.

Guilfred Besaril, ex-minister plenipotenciario di Gabinete Wever-Croes II na Hulanda, ta sospecha di malversacion di placa di Pais Aruba durante biahenan di negoshi, a emiti ordennan di pago cu beneficio personal y a realisa gastonan a costo di Pais Aruba. E caso aki ta yama Tulipan.

Y awo por agrega Glenbert Croes, ex-minister di Labor, Integracion y Energia di Gabinete Wever-Croes II, sospechoso principal di caso Portulaca.

Corupcion den Reino
Na Aruba: Na e momento aki tin 5 politico condena penalmente pa corupcion.

Partido AVP: Na e momento aki tin 3 condena pa corupcion.

Partido POR: Na e momento aki tin 2 politico condena pa corupcion y 1 sospechoso di husticia na e momento aki den caso Flamingo.

Partido MEP: Tin 2 sospechoso di husticia na e momento aki, un cu ta den caso Kwihi e ex-minister Chris Romero y ex-minister plenipotenciario Guilfred Besaril den e caso Tulipan.

Na Corsou: Tin 2 politico condena pa corupcion y 1 pa asesinato di Helmin Wiels.

Na Sint Maarten: Tin 2 condena na e momento aki pa corupcion.