(Infobae) – Horcan Milton ta moviendo door di Golfo di Mexico cu bientonan di te cu 250 km/h. Florida a emiti advertencia pa 51 condado, incluyendo Miami, segun cu e tormenta ta acercando. Ta anticipa impacto severo cu riesgo di inundacion, olanan ciclonico y dañonan structural.

Te ayera, horcan Milton tabata sigui intensifica explosivamente den Golfo di Mexico cu bientonan di 280 km/h, birando e horcan na Atlantico mas poderoso desde Dorian na 2019. Spesialista di FOX Weather Bryan Norcross a destaca e naturalesa inusual di e fenomeno aki den Golfo di Mexico y e peligernan potencial e ta representa.

Cuminda, awa y otro suministronan esencial a cuminsa disparce for di rekinan, mientras cu stacionnan di gasolin ta keda sin combustibel y ta cuminsa sigura nan facilidadnan. Residentenan di Florida, cu ainda tin e recuerdo recien di horcan Helene, ta preparando pa e yegada di Milton. Di acuerdo cu e persiguido di tormenta di AccuWeather, Aaron Rigsby, e tiendanan di hardware na Tampa tambe ta mirando un demanda halto segun cu hende ta reforsa nan bentana.

E sistema tabata sigui su avance riba Golfo di Mexico cu bientonan di 282 km/h (175 mph). E condado di Pasco y e costa west di e estado ta den alerta halto pa e yegada inminente, mientras cu e advertencianan di horcan, tormenta tropical y olanan di tormenta ta extende na e area di Orlando y otro partinan di Florida Central.

Debi na menasa di horcan Milton, varios aeropuerto na Florida a dicidi di suspende nan operacionnan comercial. Aeropuerto Internacional di Orlando (MCO) y Aeropuerto Ehecutivo di Orlando (ORL) lo stop vuelonan comercial diaranson mainta, aunke nan lo mantene e habilidad pa ricibi vuelonan di emergencia y yudansa humanitario.

E incertidumbre tocante e reapertura di aeropuertonan na Tampa, Florida, ta crece segun cu horcan Milton ta acercando y ta obliga pa tuma medidanan di seguridad. Aeropuerto Internacional di Tampa a anuncia cu entrante awe diamars pa 9or di mainta tur operacion comercial y di carga lo ser suspendi, manera a ser informa ayera dialuna. E medida aki lo ta conta tambe pa e otro aeropuertonan publico maneha pa e Autoridad di Aviacion di Hillsborough County: Peter O. Knight, Tampa Executive y Plant City Airports, cu lo cera riba un orario similar.

Mientras tanto, residentenan di Tampa cu ta buscando pa evacua mester actua lihe, ya cu e restriccionnan aki ta complica salida via aire, People a informa rond di e region.

Alcalde di Miami-Dade, Daniella Levine Cava, a informa cu, pa e momentonan aki, tur oficina y scol di e condado lo keda habri, aunke evacuacion preventivo ta ser sugeri pa esnan cu ta biba den casnan mobil of RV, debi na e menasa di e horcan Milton. Levine Cava a bisa cu e condado lo sigui monitoria e evolucion di e tormenta y cu evacuacion por bira obligatorio si e condicionnan empeora.