Pregunta no haci aki… Awor ta bin di Den Haag…

Manera por a anticipa, e rapport reciente di Amnesty International tocante trato di refugiado Venezolano na Aruba a causa mas reaccion na Hulanda cu na Aruba. Por hasta bisa cu aki a reina un silencio total, tanto di banda di gobierno como di demas forzanan politico. Ta parce cu a publica un rapport tocante otro teritorio den Caribe, y no di nos isla mes… Pero no lo tarda pa e preguntanan apropia bin di otro banda, di Den Haag…

Gabinete Hulandes casi inmediatamente a haya pregunta di parlamentario den Tweede Kamer. Asina den nos edicion di 05 di october a publica e preguntanan haci pa parlamentario Raoul White di PvdA/GroenLinks na ministro Faber, responsable pa asilo y migracion. Mientras tanto, ministro Faber encarga cu asilo y migracion den e gabinete recien instala, a pidi mas tempo pa por studia e asunto bon y esey pa bon motibo.

Un punto clave den e preguntanan haci ta e denuncia di Amnesty international cu Aruba ta organiza vuelo pa Venezuela unda ta percura pa refugiado bay back nan pais. Esaki, si resulta berdad, ta encera un violacion di e principio di ‘non-refoulement’, di no debolbe un persona, cu por ta un refugiado, pa un pais den situacion potencialmente peligroso pa nan. Ademas a surgi e pregunta si Hulanda a traves di e ayudo financiero na Aruba pa maneha e situacion cu e refugiadonan, ta colaborando den e violacion di tratado internacional aki, pa cual gobierno di Reino finalmente ta responsable.

Por cierto cu den e preguntanan haci pa parlamentario White el a referi tambe na articulo 43, inciso 2 di Statuut. Inciso 1 di e articulo ta trata e responsabilidad di e paisnan den Reino pa percura cu ta cumpli cu realizacion di derecho y libertadnan fundamental, seguridad huridico y gobernacion adecua. Seguidamente inciso 2 ta bisa cu e garantia di e derechonan referi ta “asunto di Reino”. Den pasado recien principalmente e inciso 2 aki a haya bastante referencia y uso cerca nos, pero mas den sentido di gobierno di Reino como garante di bon gobernacion, algo cu na e islanan autonomo regularmente ta tema di discusion. Den e caso actual e motibo pa referi na esaki ta un poco diferente, unda ta haci un apelacion riba e responsabilidad di gobierno di Reino pa preveni y actua den caso di violacion di derecho humano, den e caso aki derecho di refugiado, a base di tratado internacional cu Aruba tambe a firma. En todo caso por ripara aki caba cu na Hulanda den circulo di gobernacion y parlamento specificamente, ta papiando di e eventual necesidad di intervencion pa garantiza cu Aruba ta cumpli cu tratado, ‘por la buena o por la mala’.

Awor, bolbiendo na e situacion na Aruba, nos por observa e silencio profundo menciona anteriormente, di banda di gobierno y di demas forzanan politico, pero manera por a ripara caba, e asunto aki no ta desaparece ‘por arte de magia’. E otro forzanan politico por ta pensa cu esaki ta un caso unda esun cu a kima cierto parti corporal bay sinta riba esaki, pero lo tabata mas diligente y corecto pa haci pregunta o invita e mandatarionan responsable pa bin duna cuenta den parlamento, loke ta parce na moda actualmente. Si un simple asunto di corupcion den un fundacion ta motibo pa pidi reunion cu e ministro responsable, anto den un asunto unda reputacion di e pais ta bao escrutinio internacional, lo a spera mas accion di nan banda. Ademas, keda keto por ser interpreta como un confirmacion di ta di acuerdo cu e maneho di gobierno den e asunto aki; ta esey nan ta desea?

Di otro banda, si gobierno ta keda insisti den nan silencio, talvez considerando cu nan no debe ningun hende o instancia na Aruba un splicacion, nos no ta di acuerdo pero ‘que sea así’. Pasobra persisti den e actitud aki, cu nos conoce hopi bon, pero cu no ta cuadra pa nada cu e famoso ‘transparencia’ cu supuestamente ta un di e pilarnan, no visible en todo caso, di maneho di e gabinete aki, no ta bay yuda pa resolve e problema aki. Den e situacion actual ta importante pa adverti di awor caba cu, na momento cu gobierno di Reino ta tuma paso pa primeramente pone nan mes na altura y seguidamente tuma e medidanan corespondiente pa coregi un situacion cu posiblemente no ta cuadra cu nos obligacionnan internacional, nos no ta desea di tende e lamento y criticanan, acusando representante di gobierno Hulandes o di Reino pa nan actitud o accion cu lo ta mustra aspecto ‘colonialista o neo-colonalista’. A toca e disco ey suficiente caba den ultimo añanan, principalmente pa crea un tipo di espacio pa maniobra politico, pa evita cumplimento cu e obligacionnan como pais den Reino, cu ta someti na supervision pa cual no tin manera di scapa. No cu nos ta desea di sugeri cu busca manera di scapa ta bon, al contrario. Ta bira tempo pa nos, cu ta mustra curashi semper ora nos tin razon, cuminza siña actua corecto y diligentemente ora nos no tin razon. Nos por corda bon cu varios aña pasa a hiba consulta amplio riba e asunto aki, loke a resulta den ayudo financiero Hulandes. Si esey no tabata suficiente, nos no a haya di tende. Obviamente, e control Hulandes tambe lo a faya, si en berdad Aruba no ta atende e asunto corectamente. En todo caso, gobierno por core pa duna cuenta localmente, pero no por haci esey cu Den Haag; otro ‘reality check’ na caminda…