(Infobae) – Elon Musk lo uni na Donald Trump awe diasabra na un evento di campaña na Butler, Pennsylvania, e mesun luga unda e candidato Republicano tabata blanco di e prome di dos intento di asesinato na juli, durante e actual campaña electoral.
“Mi lo t’ey pa sostene!”, Musk a bisa diahuebs ultimo riba su plataforma X, ora a comparti e post di Trump cu ta promove e evento. E CEO di SpaceX y Tesla lo ta un di e invitadonan special, segun e team di campaña di Trump a confirma ayera diabierna.
E evento aki lo marca e multimiyonario su prome aparicion publico na un evento di campaña pa e ex-mandatario desde cu el a expresa su apoyo. Musk a expresa su sosten na juli, poco despues di e atake, skirbiendo pa X: “Mi ta sostene presidente Trump completamente y ta spera cu e recupera pronto.”
Den e ultimo lunanan, Musk a aumenta su sosten pa Trump y a tuma un rol mas activo den politica, hasta a bay di acuerdo pa dirigi un comision di eficiencia di gobierno si Trump gana e eleccion.
Adicionalmente, Musk a forma un comision di accion politico, conoci como un super PAC, cu ta opera sin e restriccionnan usual y ta apoya e candidato Republicano. Den e ultimo lunanan, e organisacion aki a inverti hopi den iniciativanan pa impulsa participacion electoral.
Musk a pidi na su siguidonan den mensahenan siguiente pa registra y pa vota dia 5 di november, e fecha riba cua Trump lo enfrenta e vice-presidente actual, Democrata Kamala Harris, na e urnanan. Ademas, el a ripiti un rumor infunda riba e supuesto intencionnan di Partido Democrata pa “horta” eleccion door di vota for di exterior y plama teorianan riba gastonan den transporte di inmigrantenan indocumenta.
E mitin di awe ta bay tuma luga na e mesun sitio unda un hoben pistolero a mishi Trump su horea robes cu su tironan y a mata Corey Comperatore, un di su siguidonan. Den e atake ey, varios persona a resulta herida.
Segun e ekipo di campaña, varios miembro di famia di Corey Comperatore, hunto cu otro assistentnan y rescatistanan cu tabata presente na e mitin di juli, lo compaña Trump e biaha aki.
E ex-presidente lo ta compaña pa su compañero di candidatura, e senador Republicano di Ohio JD Vance; su yiu homber, Eric Trump; su nuera y co-presidente di Comite Nacional Republicano, Lara Trump; ademas di otro legisladornan y comisarionan di Pennsylvania, segun su ekipo di campaña a anuncia.
