Parlamentario Raoul White di Tweede Kamer cu pregunta tocante rapport di Amnesty International

Recientemente, Amnesty International a publica un rapport tocante e situacion di Venezolanonan na Aruba, den cual a haci un yamado pa mas proteccion pa nan. E rapport, titula “Regla pero no proteccion: desvelando gap den proteccion di refugiado pa Venezolano na Aruba’, ta resalta e falta di legislacion specifico relaciona cu refugiado na Aruba, problemanan asocia cu detencion di solicitante di asilo y refugiado, y preocupacion tocante e trato di solicitante di asilo Venezolano, incluyendo mucha.

Parlamentario di GroenLinks-PvdA, Raoul White, a dirigi un serie di pregunta na Secretario di Estado pa Relacionnan di Reino, Zsolt Szabo, tocante violacion di derechonan humano di refugiadonan Venezolano na Aruba.

Pa cuminsa, White ta puntra e Secretario di Estado si e ta na altura di e noticia “Amnesty: Hulanda complice den violacion di derechonan humano na Aruba.”

E rapport di Amnesty International tabata inclui un seccion titula “Participacion di gobierno Hulandes”, den cual tabata bisa cu “Amnesty International ta opone e deportacion di Venezolano for di Aruba y ta preocupa tocante e proteccion di Venezolanonan na Aruba,” segun Dagmar Oudshoorn, kende ta director di Amnesty International Hulanda. “E organisacion di derechonan humano tambe tin preocupacion tocante e participacion di gobierno Hulandes den e acomodacion di refugiado na Aruba.”

Gobierno Hulandes ta duna sosten na Aruba den acomodacion di refugiadonan Venezolano. E sosten aki ta consisti di ayudo financiero y tecnico. A paga pa vuelonan usa pa deporta Venezolanonan, loke ta nifica cu Hulanda posiblemente a contraveni e principio di no-devolucion tambe.

Documentonan di ambos gobierno ta duna evidencia di esaki. Sosten di gobierno Hulandes ta enfoca principalmente riba tracing di Venezolano y nan detencion y deportacion, na lugar di nan proteccion, segun AI.

Principio di no-devolucion
Parlamentario White tambe ta puntra e Secretario di Estado si “por reflexiona riba e afirmacion di Amnesty cu na Aruba a viola e principio di no-devolucion” y si e ta di acuerdo cu esaki.

Den e rapport di AI, ta bisa cu mientras cu ta compronde cu condicionnan ta dificil pa un isla manera Aruba, a ratifica tratadonan internacional di derechonan humano cu ta implica cierto derecho y obligacion relaciona cu refugiado y asilo. Aruba ta parti di e Convencion di Refugiado di 1951 y mester cumpli cu su obligacionnan, manera e principio di no-devolucion, cu ta prohibi pa debolbe hende na paisnan unda nan por encontra persecucion, tortura y otro violacion di derechonan humano, manera ta e caso na Venezuela.

White ta puntra e Secretario di Estado, si e ta di acuerdo cu e afirmacion di AI cu a viola e principio di no-devolucion na Aruba, ki accion concreto ta bay tuma? Y si e no ta di acuerdo, pakico no, y pa fundamenta su contesta legalmente. Tambe a haci e pregunta si e por reflexiona riba e afirmacion di AI cu Hulanda a contribui na e violacion di e principio di no-devolucion na Aruba, y si e ta di acuerdo cu esaki. Si e ta di acuerdo, ta puntra e Secretario di Estado si e ta dispuesto pa investiga con esaki por a sucede, y con ta bay evita cu ta bolbe viola e principio den futuro. Y si acaso no ta di acuerdo, pa fundamenta su contesta legalmente.

Tocante e ponencia menciona anteriormente, unda AI ta bisa cu Hulanda a paga pa vuelo pa deporta Venezolanonan, White ta puntra si “ta berdad cu Hulanda a duna sosten financiero pa Aruba pa vuelonan di deportacion di Venezolano?” y ta puntra si esaki ta e caso, con ta concilia esaki cu e principio di no-devolucion.

Tambe den e mesun nota ta puntra si ta berdad cu e ayudo proporciona pa Hulanda pa Aruba tabata centra principalmente riba localisa Venezolanonan y detene y deporta nan. Si esaki no ta asina, ta pidi e Secretario di Estado pa splica pakico e no ta berdad.

Mas directamente ta puntra e Secretario di Estado si e ta al tanto di e rapport “Regla pero no Proteccion” di Amnesty, particularmente capitulo 8 cu ta bay tocante e rol di Hulanda. Ta pidi pa reflexiona riba cada paragraf di e contenido di e capitulo aki, cu entre otro, ta indica cu documentonan di gobierno tanto di Aruba como di Hulanda ta indica cu posiblemente a contraveni e principio di no-devolucion.

White tambe ta puntra si den virtud di articulo 43, paragraf 2 di Statuut di Reino, Secretario di Estado por indica cua ta e rol di Reino na momento cu ta viola e principio di no-devolucion na un di e paisnan? Di ki manera gobierno di Reino por contribui pa preveni violacion di derechonan na un di e paisnan, y specificamente, den e situacion di e violacion di derecho di e refugiadonan na Aruba?

Articulo 43, paragraf 2 di Statuut di Reino ta bisa cu “salvaguardia e derecho, libertad, seguridad huridico y calidad di gobernacion aki ta responsabilidad di Reino.”

Como ultimo pregunta, White ta pidi e Secretario di Estado pa contesta e preguntanan aki di manera separa, prome cu e tratamento plenario di e presupuesto di Relacionnan di Reino.

Mientras ta keda pendiente pa un contesta di e Secretario di Estado, ta destaca e hecho cu na Aruba ningun parlamentario a menciona e rapport aki di Amnesty International te ainda, ni a manda pregunta pa e mandatarionan concerni.