Minister demisionario di Finanzas, Xiomara Maduro (MEP) a habri siman cu un reunion cu e ekipo di IMF kendenan ta prepara nan mes pa e ‘Article IV visit’ di Aruba cu lo tuma luga den aña 2025. Durante e bishita eynan IMF lo evalua Aruba su situacion financiero y economico, y lo raporta esaki den un raport cu ta publico.
Cada dos aña IMF ta haci un ‘Article IV evaluation’ di Aruba. Ultimo biaha tabata na aña 2023 y IMF a publica un rapport positivo pa Aruba. IMF ta constata cu Aruba a recupera grandemente despues di e pandemia y ta mira e disciplina financiero aplica cu ta resulta den presupuestonan cu surplus pa Aruba cu ta brinda espacio financiero pa inversion y tambe pa baha e debe di Pais Aruba, segun un comunicado di gobierno. E tempo ey, IMF a indica cu restaura balans macroeconomico y reforsa crecemento a termino medio ta e tareanan principal di politica cu autoridadnan ta enfrentando.
Durante e reunion, Minister Maduro a duna un bista con Aruba ta para financieramente na e momentonan aki y kico tur ta e trabounan cu ta haci pa mehora e maneho financiero di nos Pais. E mandatario a splica, entre otro, di e trabounan cu ta wordo haci den cuadro di e Landspakket pa mehora e maneho financiero di Pais Aruba. Proyectonan manera ‘verslaggevingsstelsel’ y 3 lines of defense’ lo trece mehoracion grandi den administracion financiero, presentacion di presupuesto y lo yuda cera e ciclo presupuestario cu cuentanan anual cu por wordo controla y certifica pa un accountant externo.
Den e siman nos dilanti e ekipo di IMF lo reuni cu diferente instancia na Aruba pa asina por informa nan mes y compila e informacion necesario pa asina otro aña na april nan por haci nan ‘Article IV evaluation of Aruba.’
