Di diadomingo marduga pa ayera dialuna Aruba a experiencia un awasero cu a calma un tiki e calor e cual lo cuminsa baha gradualmente den proximo luna segun loke ELMAR a informa, sinembargo, e yobidanan a trece cune lamper y strena causando interupcion di coriente.
Den esaki, ayera mainta pa 5.46 nan a informa cu un parti di Balashi/Bringamosa, Sabana Basora/Pos Chiquito y un parti di Savaneta debi na blikseminslag riba Hoogspanningslijn, tabata confrontando un interupcion den suministro di coriente.
Pa 6:26 di mainta nan a sigura cu e situacion no tabata sigur pa nan tecniconan traha riba hoogspanningslijn debi na mal tempo. E tecniconan ta pendiente pa tempo calma pa asina nan por eherce nan trabou na un manera sigur pa nan mes y esnan den e area.
Pa 7:12 mainta nan a logra a isola e interupcion y reestablece e suministro di coriente den e area di Pos Chiquito y un parti di Sabana Basora.
Pa 7:38 mainta nan tecniconan tabata trahando riba diferente Hoogspanningslijnen pa reemplasa componentenan di coriente cu a sufri daño.
Pa 9:18 AM: E trabou di reparacion riba e Hoogspanningslijn Sabana Basora a wordo realisa. Nos ta preparando pa reconecta e area bek.
Pa 9:25 di mainta suministro di coriente a keda reestableci na Sabana Basora y Pos Chiquito.
Pa 9:28 di mainta e trabounan di reparacion tabata andando riba diferente Hoogspanningslijnen cu a sufri daño debi na blikseminslag.
Nan tabata premira cu lo tabatin un duracion di mas o menos 1 ora y mey mas pa realisa e trabou di reparacion riba Hoogspanningslijn Yara cu a sufri daño.
Pa 10:10 di mainta e trabounan mester haya un duracion di mas o menos 45 minuut mas pa realisa e trabou di reparacion riba Hoogspanningslijn Balashi cu a sufri daño.
Pa 10:19 mainta e suministro di coriente a ser reestableci na Savaneta.
Pa 10:27 mainta e suministro di coriente a ser reestableci na Balashi/Bringamosa. Tur cliente tabatin servicio di coriente back.
Pa esaki, e mesun comunidad a reaccion dunando un pabien na trahadonan di ELMAR cu tabata trahando cu e tempo asina ey unda seguridad mester bay prome y warda te ora e tempo a normalisa pa haci e trabounan necesario.
Pa despues di 3.30 di atardi ELMAR a bolbe informa cu den un parti di e area di Savaneta tabata confrontando un interupcion den e distribucion di coriente un biaha mas y nan tecniconan tabata mobilisando pa atende cu e situacion.
