(infobae) – Nicolas Maduro no ta sconde mas su relacion estrecho cu diferente gruponan terorista internacional. Diasabra nochi, durante un acto na Caracas, e chavista a pronuncia tocante e morto na Beirut di e hefe di Hezbollah, Nassan Nasrallah. Dilanti di su siguidornan, e dictador a condena e atake Israeli den cual e hefe terrorista a muri, expresando solidaridad cu e grupo extremista Libanes.
“Awe a bira conoci e asesinato di un lider di mundo musulman, di pueblonan Arabe, e señor Hassan Nasrallah, secretario general di Hezbollah,” el a expresa. “Y mi kier expresa, den nomber di e bloke historico revolucionario di e forsanan Bolivariano di Venezuela, e solidaridad cu Hezbollah, cu su famia, cu pueblo di Libanon.”
Di su banda, Maduro, cu tin lasonan conoci cu extremismo Islamico y ta acusa di crimennan grave di lesa humanidad na Venezuela, a bisa cu Israel a duna orden pa e atake “for di e sede na New York di Nacionnan Uni.”
“E cobardenan di mundo ta keda keto, pero e pueblonan rebelde, niun hende lo silencia nos voz. P’esey mi ta haci un yamado na e pueblonan di mundo, pueblonan musulman, pueblonan Arabe pa hisa nan voz y solidaridad cu pueblo Palestino, cu pueblo di Libanon,” el a conclui.
Forsanan di Defensa Israeli (IDF) a anuncia diasabra e eliminacion di e hefe di Hezbollah den un atake ehecuta diabierna na Beirut. Nasrallah, kende tambe tabata un di e fundadornan di e organisacion, a ser mata hunto cu Ali Karki, comandante di Frente Sur di Hezbollah, y otro alto mando di e organisacion. E golpi aki a realisa despues di un operativo minucioso basa riba informacion di inteligencia di IDF y agencianan di seguridad Israeli.
A ehecuta e atake cu avion di combate di IAF, cu a lansa un bombardeo preciso riba e Cuartel General Central di Hezbollah. E instalacion aki tabata scondi bao di un edificio residencial den area di Dahye, na Beirut, y na momento di e atake, e lider di Hezbollah tabata na e lugar planificando actividadnan terorista nobo contra ciudadanonan di Israel.
Regimen Venezolano, aliado di Iran, a habri porta pa e teroristanan di Hezbolah, cu awo tambe tin un presencia grandi den e frontera triple entre Brazil, Paraguay y Argentina.
E Republica Islamico tin relacion estrecho cu Venezuela pa hopi tempo caba, desde yegada di Hugo Chavez na poder. E vinculonan cercano di Maduro cu e regimen di ayatolanan a permiti e Persanan extende nan presencia militar y financiero den America Latino, principalmente a traves di Hezbollan.
E lasonan entre Venezuela y Iran a fortalece desde e presidencianan di Ahmadinejad y Chavez na aña 2005. Sinembargo, un red fuerte di sosten pa Hezbollah a existi na Venezuela pa hopi tempo caba; e grupo terorista Libanes tin cel den e pais Caribense desde comienso di añanan 1990.
Pero cu yegada di chavismo, nan influencia a crece considerablemente. Diferente investigacion a señala ex-minister y vice-presidente Tareck el Aissami – awe deteni pa corupcion – como responsable di e infiltracion di miembronan di e grupo extremista. E funcionario a keda sanciona pa Merca y Union Europeo y actualmente ta inclui den e Lista di esnan mas busca pa Servicio di Inmigracion y Control di Aduana Mericano.
