Cuestionamento entre parlamentario Tromp y prome minister tocante keho entrega na OM pa malversacion na SSA

Despues cu den e siman aki a bira conoci e noticia cu algun persona di Stichting Sportsubsidie Aruba (SSA) a keda suspendi pa motibo di iregularidadnan pa loke ta trata uso di algun fondo, parlamentario Marisol Tromp a informa cu el a bay Ministerio Publico pa entrega un keho di posibel delito penal bao e funcion di ex-director di e stichting aki.

Den un comunicado ta splica cu diahuebs mainta lider di fraccion di MAS parlamentario Marisol Tromp a entrega na Ministerio Publico pruebanan cu el a ricibi di malversacion den un fundacion di deporte di gobierno cu ta resorta bao minister Endy Croes.

“Pa hopi biaha hende ta tende rumor y ta papia riba caya pero den e caso aki, parlamentario a ricibi pruebanan preto riba blanco y e ta compronde e consternacion cu tin riba e caso aki paso ta trata di berdad over di mal uso di funcion di e director di Stichting Sportsubsidie Aruba (SSA) pero ta wak tambe cu valsheid in geschrifte ta tuma lugar. Hopi biaha bo ta core den caya y ta wak hobennan para riba caya ta pidi placa cu bleki den man ta sacudi paso nan mester di placa pa por haci nan deporte y bay afo.” E comunicado ta señala.

Akinan ta papia tocante placa di subsidio cu no ta yega nan destino, invoicenan ta wordo falsifica y cu tin un modus operandi “mi ta haya hopi lamentabel cu un gobierno cu ta papia di integridad, no ta prome bes cu ta wak e tipo di modus operandus aki y vooral cu e minister aki ya a hay’e envolvi den un caso similar antes. Aworaki por mira cu esaki ta sosode atrobe y laga husticia haci su trabao.

Tambe ta cuestiona cu segun el a sigura, prome minister Evelyn Wever-Croes no a entrega un keho “na varios ocasion ora el a haya sa tipo di casonan cu ta hole machtsmisbruik y cu ta hole cu a abusa di fondo manera por ehempel na Aruba Huis, e no a entrega keho y cu minister Endy Croes den un entrevista a bisa cu aparentemente SSA lo a cuminsa cu un investigacion interno y cu nan ta kere cu e lo ta hopi mas grandi cu loke nan a pensa. Esaki no ta kita cu e minister mes por a haci aangifte na Ministerio Publico.”

Di su parti, Fundacion Sportsubsidie Aruba (SSA) ta sigura cu nan a entrega un keho dia 25 di september ultimo na autoridadnan di Landsrecherche pa loke ta trata iregularidadnan detecta dentro di e fundacion.

Mediante un comunicado, nan tambe a informa cu “e iregularidadnan detecta ta regarda transaccionnan financiero sin cu e obhetivonan deportivo planea a wordo realisa. SSA ta reafirma su compromiso pa actua diligentemente y eficientemente den atende e asunto aki, y kier sigura e publico cu e resultado di investigacion interno cu tur documento a wordo entrega na husticia. Asina tambe ta aclaria cu ningun di e miembronan di Hunta di Supervision (Raad van Toezicht) ta envolvi den e acontecimentonan, y ta desmenti asina e informacion eroneo difundi anteriormente den

medionan di comunicacion. Finalmente SSA ta laga e proceso aki den man di e autoridadnan hudicial corespondiente pa haci nan trabao.”

“Ni con cerca e persona ta di nos, e lo mester carga su responsabilidad”

Prome minister Evelyn Wever-Croes ta señala cu siman pasa el a haya informacion di minister di Enseñansa y Deporte Endy Croes di un investigacion pa posibel malversacion “el a informa mi tambe cu mesora a suspende e persona y a cuminsa un investigacion y asina cu el a investigacion aki a keda cla a entrega un keho.”

Ademas a bisa cu a encarga e persona aki e posicion debi na su estudio financiero y su experiencia den deporte, “berdad ta trata di un persona cu ta toca na mi famia, pero no ta pa e motibo ey cu el a wordo encarga cu e puesto sino tur su preparacion financiero na universidad y despues den deporte. A pensa cu e ta e persona cu por a wordo confia cu e posicion, awor tin sospecho di malversacion,” prome minister a expresa.

Den su declaracion, prome minister a referi na parlamentario Marisol Tromp “cu a usa e oportunidad pa referi na e investigacion andando aki y a bisa cu mescos cu e caso di Arubahuis lo no entrega keho. Esaki ta un mentira. Mi ta constata cu Sra. Tromp ta gaña den caso di Arubahuis nos a pidi investigacion y a base di esey mesora, nos a entrega keho.”

Pa finalisa, prome minister a enfatisa cu “mi ta ripiti, pa Gabinete Wever-Croes I y II, integridad ta un prioridad, y unabes cu tin kiebro, tin consecuencia. Ni con cerca e persona ta di nos, e lo mester carga su responsabilidad. Esaki sigur ta e diferencia mas grandi entre nos Gobierno y e partidonan den oposicion cu no por bisa mescos. E caso

ta den man di OM y lo duna nan espacio pa haci nan trabao pa asina husticia por vence,” prome minister a expresa.

“Investigacion lo determina e proceso cu mester cana”

Minister Endy Croes ken a duna un declaracion caba bisando cu “ta trata di pagonan cu lo a bay pa tres persona specifico na mas cu un ocasion riba supuesto peticionnan pa deporte, cu segun informacion, nunca a tuma luga, y esey e investigacion ta basa su mes riba dje. Esey ta e liña cora cu a lanta e sospecho y a haci investigacion den e parti aki,” minister Croes a indica.

E mandatario a resalta cu otro medionan di comunicacion a culpa varios minister pa loke a sucede, pero el a aclaria cu ningun minister ta envolvi den e parti aki y cu ta algo hopi recien.

Croes a agrega cu e Conseho di Supervision a informa cu esun encarga a admiti por escrito su culpabilidad y cu e investigacion lo determina e proceso cu mester cana.

E mandatario a indica cu e no tin conocemento di ken e tres persona aki ta.

Minister Croes a clarifica cu SSA ta un stichting riba su mes y tin un two-tier model. E tin un Conseho di Supervision, cu ta controla y e tin e directiva cu ta haci operacionnan.

El a splica cu e placa ta bay pa federacionnan y pa añas caba, banda di e placa cu ta bay pa federacion, nan tin un fondo tambe disponibel pa Premio Excelencia den Deporte (PED), tin otro fondo pa organisacion di Weganan Escolar (WE) Aruba y tambe tin otro fondo pa Weganan Interinsular.

Por ultimo e minister demisionario di Deporte a sigura cu tur federacion cu a haci peticion pa nan proyecto pa 2024 y a haya aprobacion desde januari pa henter e aña, tur esey lo keda tuma luga. “A actua corecto, a proteha e fondonan di SSA pa tur federacion, a bin cu medidanan interno pa esaki no ripiti y ta mas cauteloso den tipo di maniobranan asina,” el a resalta.