Arubahuis explorando con por soluciona problema di vivienda pa bursalen cu ta bay Hulanda otro aña

Den ultimo añanan studiantenan cu ta bay studia Hulanda ta encontra un reto grandi pa loke ta trata haya cambernan pa biba. Pa yuda studiantenan cu ta bayendo Hulanda proximo aña Departamento di Enseñansa y diferente stakeholder ta brinda informacion y guia pa yuda e studiantenan aki prepara pa surpasa e reto aki.

Durante un conferencia di prensa recien minister demisionario di Enseñansa y Deporte Endy Croes a elabora riba e tema y splica cu e problema ta grandi y si studiantenan inscribi laat pa haya un camber, e chens pa haya un camber ta hopi tiki y den e caso aki tin muchanan cu hasta ta bin back door di e problema aki.

Ayera nochi a tuma luga un anochi informativo pa studiantenan cu otro aña y e aña siguiente lo kier bay studia Hulanda tocante con pa inscribi y con e proceso ta pa haya un camber na Hulanda.

Durante e ronda di pregunta prensa a puntra e mandatario tocante si a evalua algun otro plan pa yuda studiantenan haya camber na Hulanda, manera por ehempel Corsou ta haci cu ta huur un flat pa yuda e studiantenan cu e reto aki.

Minister Croes a splica cu Corsou tin un su modelo y loke nan ta haci ta cu nan ta huur e camber pa e prome aña pa e studiantenan tin un poco mas trankilidad y despues di e aña ey e studiantenan ta busca nan propio camber.

El a indica cu esey por ta un modelo, pero el a remarca cu Arubahuis ta trahando riba otro facilidadnan y esaki ta mas enfoca riba e companianan cu ta huur cas of camber na studiantenan. Segun el a indica Aruba tin e lista di e companianan aki na diferente ciudad y tin comunicacion cu Arubahuis cu por facilita e proceso pa e studiantenan.

“E modelo di Corsou ta conoci pa nos, Arubahuis ta explorando tur locual cu ta na nos alcance cu e idea cu mester resolve e problematica aki pa studiantenan,” el a remarca.

E mandatario a indica cu te aworaki nan ta na altura cu ta e studiantenan di prome aña ta esunnan cu ta pasa den e problemanan aki y ya despues di un aña hopi di nan, door di guia di mentor di Arubahuis, ta logra resolve e problema.

El a agrega cu tin otro retonan tambe. E mandatario a splica cu tin studiante cu ta haya camber, pero nan no ta cambernan luhoso, y studiantenan no ta gusta pasobra e no ta cumpli cu nan exigencianan y no ta tuma e camber. Esey ta un punto di enfoke tambe pa subraya na e studiantenan cu lo bay Hulanda otro aña cu nan mester tuma loke nan ta haya y na caminda nan por resolve e otro retonan.