WOW Aruba, cu ta un organisacion non profit crea pa duna sosten y apoyo na hende muhe pa por siña y apoya otro, ayera mainta a anuncia nan proyecto “Grit! Tech Camp” cu ta bay tuma luga dia 12 di october dirigi pa hobennan muhe entre 13 pa 19 aña.
Den cualkier negoshi of sector, e diversidad di talento humano semper lo ta un piedra angular di innovacion. En particular, den e sector di tecnologia, e pluralidad aki ta busca pa forma un economia digital mas inclusivo y competitivo, cu ta habri oportunidadnan pa tur hende desaroya nan potencial, transformando e futuro di negoshinan, sectornan y comunidadnan pa medio di innovacion. Den e diversidad aki, e vision y talento di hende muhe ta fundamental.
Segun Myrienne Figaroa, ken ta fungi como head of community empowerment na e organisacion a enfatisa cu esaki ta un proyecto pa empodera e grupo di hoben muhe pa drenta den mundo di tecnologia ‘Girls Represent in Tech’ (Grit!) Pero tambe pa crea un caracteristica den un persona cu ta haci uso di su pasion y su perseverancia pa e por logra su metanan aunke por haya cierto contratempo na caminda.
“Nos ta haciendo esaki specialmente pa e hubentud di Aruba, awendia muchanan ya den un edad hopi hoben nan tin cu scoge pa nan scol y pa studionan cu nan kier haci y esaki no ta facil. Den ultimo tempo nos ta wak e mundo tecnologico ta avansando asina rapido y cu tur e trabou cu ta biniendo aworaki den mundo laboral ta den e direccion di tecnologia. P’esey nos kier inspira y empodera e hobennan pa sigui un carera den tecnologia,” el a bisa.
Nan a scoge muchanan muhe pa motibo cu den reciente conferencia dedica na Hende Muhe na maart ultimo, ex-director di Central Bureau of Statistics (CBS) Desiree Helder a indica cu hende muhe ta di opinion cu solamente 3% di nan tin un contribucion riba e sector di Telecomunicacion y solamente 5% tin un contribucion den sector di Investigacion y Ciencia.
“Esaki ta hopi abou y nos ta desea por medio di e tech camp aki informa e hobennan pa asina nan sa kico ta come y bebe den trabounan den tecnologia y asina por explora un carera den esaki,” Figaroa a señala.
Pa e evento, nan tin 4 speaker local hende muhe como por ehemplo, Wendy Koffy ken ta parti di ekipo di management di Aruba Bank, Lucia Werleman ken lo papia di transformacion no solamente den tecnologia di companianan grandi pero tambe den aspecto humano di con nan ta adopta e tecnologia aki como empleadonan, ademans Kristel de Nobrega ken ta specialisa den Cybersecurity lo papia di e importancia di esaki y Lucienne Lacle ken ta un Tech Consulting y lo splica kico product management ta.
Nan ta bay tin diferente sesion interactivo pa e dia aki unda e hobennan lo ricibi informacion necesario riba diasabra 12 di october for di 9or di mainta pa 1or di merdia na Setar di Sero Blanco.
Di su parti, Shahayra Morales-Croes ken ta presidente di WOW (Women empOwering Women) Aruba a splica cu WOW ta un organisacion non profit cu a ser funda na aña 2017 pa seis amiga cu a wak e necesidad na unda un ser femenino por ta hunto pa haci networking pa siña y papia riba diferente tema di desaroyo personal of profesional.
Cu esaki, nan tin nan parti unda nan ta duna back na comunidad den forma di empoderamento, no solamente dirigi riba nan miembro sino tambe comunidad y e aña aki nan enfoke a bay un tiki mas riba e hobennan unda nan a mira e necesidad pa duna informacion specificamente pa muchanan muhe y asina nan por haya sa un tiki mas “y por tin rol models den nos comunidad y sigur e tema aki ta importante,” el a sigura.
Vanessa Donata, ken ta forma parti di marketing executive di Setar a trece dilanti cu como e compania di telecomunicacion principal na Aruba nan ta hopi contento di por participa den evento aki unda nan ta spera di por conta cu e asistencia di hasta 100 persona e dia ey.
Di acuerdo cu UNESCO, solamente 3 di cada 10 hende muhe na mundo ta studia careranan STEM (ciencia, tecnologia, ingenieria y matematica), un cifra cu ta cay te na 8% den careranan di Ingenieria y 3% den esnan relaciona cu Tecnologia di Informacion, lamentablemente di esnan cu ta gradua, menos cu 10% ta logra haya trabou den e industria aki.
Espacio pa ricibi hende muhe den industria di tecnologia a ser habri principalmente debi na e demanda grandi cu ta resulta di aceleracion digital, companianan a haya nan mes cu un falta di talento femenino, cual ta e motibo di pakico nan ta mira como esencial pa genera e interes aki den hende muhe pa profesionnan y actividadnan relaciona cu tecnologia.
