Diamars ultimo mediante un comunicado di prensa, Cuerpo Policial di Aruba (KPA) a informa cu dos hoben a keda deteni na Sabana Liber y na Madiki e mesun dia den oranan di mainta.
Den comunicado a señala cu Recherche di San Nicolas ta investigando un caso serio di tiramento cu arma di candela conhuntamente cu polis uniforma di San Nicolas cu a tuma lugar riba 8 di september 2024 na Esso Ville San Nicolas.
Den cuadro di esaki y un tremendo investigacion haci pa e recherchenan a haci un entrada hudicial na Madiki y Sabana Liber.
Den oranan trempan di mainta a haci detencion di dos hoben, ta trata aki di e personanan di inicial di A.J.Z.C.R. naci na Aruba y e otro hoben di inicial J.C.A.S. naci na Cuba di 17 aña di edad.
Equipo forma door di diferente unidad policial manera team di aresto, recherchenan, K9 Unit como tambe cu sosten di fiscal di Ministerio Publico a haci e entrada hudicial.
E investigacion ta den full swing y nan no ta descarta cu lo por tin mas detencion proximamente.
Polis tambe ta indica cu den cuadro di e investigacion aki, si un persona a wak algo of si tin algun informacion, por comunica cu nan na e number 11141, nan ta garantisa anonimidad.
