Dia 17 di september ultimo Women’s Club of Aruba a cumpli 90 aña di existencia. Pa celebra e gran logro aki, e club a organisa un fiesta pa tur su miembronan y aworaki ta toca turno pa e comunidad di Aruba tambe cune na e celebracion.
Roxanne Vieira, vice presidente di Women’s Club of Aruba ta conta Bon Dia Aruba di e e trabao di e club, e proyectonan y e recaudacion di fondo cu nan ta bay tin den fin di siman pa alabes celebra hunto cu pueblo di Aruba.
E celebracion ‘Ready, Set, Bloom’ ta un recaudacion di fondo cu tin como meta ta pa haya fondo pa e proyectonan cu e club ta haci durante aña pa comunidad, pero principalmente pa e proyecto “Dress a Child” cu ta e proyecto unda e club ta bisti riba 300 mucha pa december.
Vieira a splica cu e proyecto “Dress a Child” ta un proyecto cu a cuminsa hopi aña atras y cu ta tuma luga tur aña na comienso di december. Apart di e proyecto aki Women’s Club of Aruba tambe tin e ‘Student Award’ den luna di juli na unda ta honra e miho graduadonan di Aruba y tambe tin proyecto pa adultonan mayor cu ta inclui bishita casnan di adultonan mayor tur luna pa pasa un rato agradabel cu nan.
E celebracion di 90 aña di existencia di e club, Vieira a conta, tabata uno ameno y uno yen di emocion. Durante a nochi e club honra diferente ex presidente di e club cu tin hopi aña ta dedica un granito di nan tempo pa yuda comunidad. “Ya bo ta cuminsa pensa caba aki 10 aña nos ta haci 100 aña y ya esey a cuminsa pasa den background di bo mente,” el a expresa.
Pa e celebracion special aki International Women’s Club of Aruba tabatin e honor di ricibi bishita for di Merca di e presidente internacional di e General Federation of Women’s Clubs, Suellen Brazil y di e presidente electo di General Federation of Women’s Clubs, Wendy Carriker.
Women’s Club of Aruba ta consisti di mas o menos 133 miembro, cu ta inclui life members, miembronan cu tin mas cu 30 of 40 aña cu ta forma parti di e club y e resto di miembronan ta esunnan mas nobo.
Vieria a splica cu e meta principal di e club ta yuda den comunidad cu trabao boluntario y pa añanan cu ta bin e club ta premira expande un poco mas den loke e ta realisando aworaki, “Nos esencia ta pa yuda mucha, adultonan mayor y hende muhe,” el a enfatisa,
El a splica cu nan kier agrega algun proyecto mas pasobra como un club di servicio ta te cierto proyectonan por wordo realisa pa aña y un proyecto cu e club ta desea di agrega ta uno cu ta basa riba hende muhe. El a sigui splica cu aworaki nan tin proyecto cu ta basa riba mucha, un proyeto cu ta enfoca riba hobennan, aworaki nan ta bezig cu e adultonan mayor y pronto e club kier bin cu un proyecto dedica completamente na hende muhenan di Aruba, cual ta un necesidad.
Pa loke ta e fondonan cu e club, Vieira a indica cu e fondonan ta un aspecto cu ta un reto grandi y e club ta depende di donacion. Apart di esey nan ta organisa recaudacionnan di fondo pa por haya placa pa nan por realisa nan por proyecto.
“Nos ta un non profit organization. Nos no ta traha pa ganashi. Di ganashi loke drenta ta bay back den comunidad. Awendia e ta un reto hopi grandi, pero toch ainda bo tin e comunidad cu ta yuda y esey nos ta aprecia masha hopi mes. E ta un reto grandi y tur aña mester pensa riba recaudacionnan di fondo y pensa con ta trece placa aden,” el a remarca.
El a resalta cu tin diferente club di servicio cu ta haci e mesun trabao y si e clubnan uni, por tin un impacto
El a agrega cu un reto cu ta bin door cu tin club cu ta traha cu e mesun meta, tur e club y fundacionnan aki tambe ta depende di donacion y e ora e ta haci cu e ayudo ta bira poco mas dificil pa haya.
Por ultimo Vieira a extende un invitacion na henter pueblo di Aruba pa uni na e celebracion di 90 aña di Women’s Club of Aruba y alabes contribui pa e club por sigui eherce su trabao di servicio. Pa mas informacion por tuma contacto cu Women’s Club of Aruba.
Potret: Facebook Women’s Club of Aruba.
