Ayera mester a tuma luga e prome reunion publico di e aña parlamentario nobo, cual lo a bira tambe e prome reunion publico pa parlamentario Raymond Kamperveen den su funcion como presidente nobo di Parlamento di Aruba. Pero esaki no a tuma luga pa motibo di falta di quorum den parlamento.
Presidente di parlamento Kamperveen a publica un video ariba su rednan social pa elabora riba motibo cu e reunion no a bay door.
Den e video Kamperveen a splica cu na momento di yama e reunion publico di ayera en berdad tabatin quorum riba papel, pero den sala di parlamento, manera ta stipula den reglement van orde, no tabatin 11 parlamentario presente y pa e motibo ey no por a habri e reunion.
El a splica cu el a duna mey ora di tempo pa wak si otro parlamentarionan ta yega pa e reunion. Segun el a indica algun a yega y ora a yama pa di dos biaha pa habri reunion, no tabatin quorum atrobe den parlamento y e ora el a tuma e decision pa aplasa e reunion pa un otro dia.
Kamperveen a menciona cu den e reglement van orde tin reglanan cu ta bisa ora un parlamentario no por yega pa t’ey presenta na un reunion publico, e mester meld cerca e presidente of cerca e Griffier pa avisa e cu nan no lo t’ey presente.
Den e caso aki, el a menciona, un di e poco nan cu a meld cu no por tabata presente ta parlamentario y lider di fraccion RAIZ Misha Raymond pa motibo di salud.
“Nos sa cu ta temporada di campaña pero nos sa tambe como parlamento nos tin un trabou, nos tin deber pa ta presenta ora tin reunion. E realidad ta nos tur ta wordo paga ora tin reunion pa nos t’ey presente pa cualkier reunion publico,” el a remarca.
El a indica cu e parlamentarionan cu no a meld cu no lo tey presenta tabata, entre otro, parlamentario Miguel Mansur, parlamentario Gerlien Croes, parlamentario Rycond Sandos do Nascimento, parlamentario Mike Eman, parlamentario Mike de Meza y Arthur Dowers.
Di otro banda, parlamentario Kamperveen a menciona den e video cu el a tuma nota cu parlamentario Edgard Vrolijk, ex presidente di parlamento, a bisa cu RAIZ cu no kier duna presidencia di comision.
Kamperveen a indica cu e “ta haya jammer” pasobra tur e añanan cu a bay semper nan por a yega na otro den comision, ta yega na palabracion y ora e reunion wordo yama tur hende ta bay di acuerdo, pero aworaki cos a cambia.
“Nos por compronde cu e situacion a cambia y mi por compronde e rabia cu ta biba den dje paden, pero mi ta conseh’e busca su paz pa e por traha miho pa Aruba y su hendenan,” el a bisa.
El agrega: “Mi kier a bis’e en berdad democracia ta bay wordo sirbi pasobra nan verzoek cu nan a haci pa haci cambio, como democracia nos tin cu vota riba dje, e no a tuma luga, pero e ta bay tuma luga y si en realidad mayoria ta bisa cu nan por hay’e, nos por acepta esey pasobra ta democracia. Nos si ta permiti democracia reina den parlamento si e mayoria vota pa esun cu ta ricibi of tuma presidencia.”
Pro ultimo, Kamperveen a remarca cu ta trabou como presidente pa yama e reunion, pa ta imparcial y zorg pa tur cos cana manera reglement van orde ta sitpula, pero ta trabou di e parlamentarionan pa presenta na pia di trabou.
