Ministerio Publico a caba di publica cifra tocante e delitonan cu mas presencia den nos comunidad. Esaki no ta solamente bon como informacion pero tambe ta lanta curiosidad encuanto e posible causa y consecuencianan di e tipo di delito cu ta birando mas frecuente o ta disminui. E lista di delito mas frecuente ta por cierto encabeza pa dos tipo cu ta sucede den trafico: core sin rijbewijs y core bao influencia di sustancia prohibi. Den mayoria di caso e ultimo aki ta concerni alcohol, esey ta semper e experiencia mundialmente, aunke no a duna mas detaye tocante e diferente sustancianan ilegal cu a hunga un papel den e delito aki na Aruba. E diferencia grandi entre core sin rijbewijs y core bao influencia ta, aunke no menciona, cu e promer ta un ‘overtreding’ (infraccion) y e otro ta un delito grave, un ‘misdrijf’ (crimen). Di e manera aki nos tin un infraccion ta encabeza un lista cu por lo demas ta contene solamente ‘misdrijven’. Bisando esey nos no ta kita e importancia di su mencion, pasobra core sin rijbewijs por conduci na accidente unda esaki por tin consecuencia mas grave pa esun cu a haci esey. Si bo haya bo den un accidente fatal conduciendo sin rijbewijs, e consecuencianan por ta considerable.
Pero ta mas importante papia tocante e otro delito, core bao influencia, cu ta un crimen grave semper, den cualkier circunstancia. Sin embargo, tin un aceptacion grandi di coremento bao influencia, mas tanto alcohol, cu realmente nos por bisa cu ta considera esaki practicamente ‘normal’ den nos comunidad. Y esey a pesar di legislacion cu ta duna posibilidad amplio pa impone castigo severo riba esun cu ta viola ley den e sentido aki. E problema ta sinta mas bien den e hecho cu nos ta anda demasiado ‘suave’ cu e tema aki, pior ora ta trata di famia o amigo cu haya nan den problema pa via di bebida. Semper tin un argumento pa ‘splica’ e comportamento inaceptable aki. Demasiado poco vez nos ta realiza cu core un vehiculo bao influencia ta igual na usa un arma potencialmente mortal, pa bo mes y principalmente pa otro persona; ta pesey den e ley corespondiente, Landsverordening Wegverkeer Aruba (LWV) ta marca e violacion aki como ‘misdrijf’.
E pregunta clave na nos mes ta: cuanto di nos ta purba activamente di preveni coremento burachi den famia o entre amigo? Por ehemplo, bo ta laga bo yiu sali cu bo auto bao prohibicion di bebe alcohol, pero si acaso e hacie toch, bo ta bis’e pa laga e auto unda cu e ta y yama cas? Bo ta dispuesto pa percura pa bo yiu yega cas sano y salvo, sin haci daño na su mes y sigur no na otro hende? O bo ta laga e asunto pa ‘regla cuenta’ pa su mañan mainta ora ta laat caba? Nos conoce mayor, no hopi, cu ta duna nan yiu auto bao di e condicion describi aki riba, un excepcion den cada mil…? Coremento burachi ta un enfermedad serio den nos comunidad y banda di e cifranan cu ta aparece nos no ta mira tanto esfuerzo pa combati e custumber aki, cu a causa hopi tristeza caba den nos comunidad.
Otro tipo di delito cu por cierto ta aparece riba e lista di delito mas comun ta delito di indole sexual. Nos ta dispuesto pa kere cu esey tin un relacion cu e esfuerzonan haci durante e ultimo añanan di varios banda pa conscientiza nos comunidad di e gravedad di e delito aki, unda no ta trata di ‘infraccion’ sino semper di crimen severo. Cu actualmente tin mas denuncia ta tuma lugar ta un bon señal, tumando na cuenta cu e gran mayoria di crimen sexual, sigur cometi contra mucha y hoben, ta sucede den seno familiar o en todo caso tin involucra un persona conoci pa e victima. Esey ta haci cu nunca lo ta asina facil pa e victima inicia un denuncia o bay busca ayudo di otro persona o instancia cu por yuda den e denuncia. A pesar di haci denuncia ainda ta keda e problemanan pa yega na suficiente prueba pa e caso por haya su caminda pa corte, y cu exito. Te awe ta asina cu hopi crimen sexual no ta yega na un denuncia y hopi denuncia, e gran mayoria, nunca ta yega corte. Den e periodo di gobernacion autonomo desde 1986 nos ta papiando di miles di caso cu a yega na denuncia y finalmente algun caso pa aña tabata yega dilanti huez.
Nos ta comenta esaki pa enfatiza con importante e apoyo na e esfuerzonan pa combati e maldad aki ta y lo keda semper. Lamentablemente nos no ta tende tanto mas di e proyectonan cu a haya bida despues di un di e casonan mas tragico cu nos a experimenta den nos comunidad. Nos por a tuma nota di e hecho cu e equipo contrata pa e proyecto ‘Sociaal Crisisplan’ mientras tanto a desaparece for di payroll di gobierno, pasobra e proyecto a termina, pero no a duna publicidad na con a duna continuacion na e trabao den coordinacion y trabao conhunto di e departamento y entidadnan estatal cu ta responsable pa esaki.
Finalmente, nos ta spera cu e publicacion di Ministerio Publico por haya seguimento den otro ramo di gobernacion, publicando nan trabao. No tin pakico e tipo di publicacion aki mester keda un excepcion, tur departamento y servicio gubernamental lo mester haci esaki anualmente, sin falta. Den e era digital aki no por keha ademas cu no tin placa pa papel.
