Minister di Finanzas: Normanan financiero ta hancra den ley y ta conta pa cualkier otro gobierno cu bin dilanti

Durante conferencia di prensa ayera mainta minister demisionario di Finanzas y Cultura, Xiomara Maduro, a anuncia cu gobierno a entrega e nota di fin di aña 2024 na Parlamento di Aruba. Den e nota aki ta keda estableci cu gobierno ta aplica e maneho di “meevaller” manera ta poni den articulo 14 di e Ley di LAft.

E maneho “meevaller” a nifica cu tur resultado financiero cu ta riba e surplus di 1% di GDP, di esaki 50% lo ser aloca pa financia extra inversion y e otro 50% lo bay pa paga debe di Pais Aruba.

Contestando pregunta di miembro di prensa tocante si otro aña lo sigui cu e mesun vision of lo tin ahustenan nobo cu por yega, minister Maduro a splica cu ya caba gobierno demisionario a entrega presupuesto di otro aña y como cu tin un eleccion pronto, si bin un gobierno nobo e gobierno ey, via nota di cambio, por haci cambionan na e presupuesto aki.

El a resalta cu e ora toch ta sigui e continuidad den locual ta e ley di presupuesto, cual ya caba ta entrega y si bini un cambio mes den constelacion di gobierno na Aruba, e gobierno nobo por haci cambio den e presupuesto.

Contestando e pregunta si e cambionan aki ta na beneficio of por perhudica e pais, e mandatario a indica cu e ta depende di ken drenta den gobernacion, kico ta bay ta nan vision y si nan kier sigui locual a ser haci caba of si nan kier haci algo completamente diferente.

“Di nos banda nos a percura pa tambe den e periodo demisionario aki keda haci locual ta corecto pa pais Aruba, entre otro finalisa e trabounan di 2024, nos a entrega caba 2025, pero mas cu claro esun cu haya e mandato tin cu atende cu e presupuesto. Sea cu e ta bisa cu e ta sigui manera cu e ta, of e ta bisa no e tin visionnan completamente diferente y e ora via un nota di cambio e lo haci e cambionan,” el a splica.

A puntra e minister cu si bin cambio, tur loke tin estableci aworaki, e maneho “meevaller” di 50% pa Aruba 50% pa paga debe por cambia. El a clarifica cu ora ta trata e normanan financiero, e normanan aki ta hancra den e articulo 14 di e Ley di LAft, cual a keda aproba december 2023 unanimamente den Parlamento di Aruba.

El a remarca cu esaki ta nifica cu tur hende ta compronde cu supervision financiero ta importante, tur hende ta na altura cu tin normanan cu mester respeta y sigui y un di e normanan ey ta entre otro cu mester tin un surplus di minimo di 1% y locual bin riba e 1% ey por ser dedica 50% pa inversion y 50% pa paga debe. “E reglanan aki ta keda conta tambe pa cualkier otro gobierno cu bin dilanti,” el a resalta.