Con por determina si un persona ta horta coriente

Na mesa di redaccion di Bon Dia Aruba a yega informacion di parti di un ciudadano preocupa, kende a indica cu e tin sospecho cu un bisiña ta horta su coriente. Bon Dia Aruba a tuma contacto cu PR di ELMAR NV, Audrey Croes, pa haci algun pregunta tocante e tema aki.

Segun e ciudadanonan a splica Bon Dia Aruba, e ta sospecha cu su bisiña ta horta su coriente pa motibo cu cada biaha cu e bisiña cende su luz, e ta afecta e suministro di coriente di su cas y te hasta tin bombiyo ta kima.

Pa haya informacion concreto tocante e tema aki, Bon Dia Aruba a puntra Croes si ELMAR NV sa encontra casonan di hortamento di coriente, si tin casonan registra, kico ta e proceso cu un persona mester cana den caso cu ta sospecha esaki, con un persona por sa cu otro ta horta coriente, y kico ta pasa ora un hende wordo gara ta horta coriente y cual ta e pasonan cu ELMAR ta tuma.

Croes a splica cu ta algo cu nan ta encontra. El a indica cu esaki a cuminsa desde inicio di disitribucion di coriente na Aruba y ya rond di 1925 tin e prome registracion di esaki. El a resalta cu hortamento di coriente no ta algo cu ta sucede na Aruba, pero ta un fenomeno mundial.

Pa loke ta trata e proceso cu un persona mester cana den caso cu tin sospecha cu un hende ta horta coriente, e PR di ELMAR a indica cu primeramente e persona mester tuma contact cu Customer Service di ELMAR pa e tecniconan di e compania por cuminsa haci un investigacion.

Pa un persona por determina si otro ta horta coriente, Croes a menciona algun indicador cu por yuda indica cu tin hortamento di coriente. E indicadornan aki ta, entre otro; e cas no tin meter di coriente, pero tin luz anochi; tin kabel extra conecta den e fuse box di ELMAR cu ta bay direct pa e cas; of e seyo na e meter of e fusebox di ELMAR ta kibra, of no tin seyo.

Por ultimo, Bon Dia Aruba a puntra kico ta pasa ora un hende wordo gara ta horta coriente of kico ta e pasonan cu ELMAR ta tuma. Croes a splica cu e acto lo por wordo denuncia na Cuerpo Policial, e parcela ta wordo desconecta, y tin un boet pa cu esaki.

El a sigui splica cu e boet ta basa riba un formula, entre otro, riba e duracion cu a horta coriente y cantidad di artefacto electronico den e cas. Na momento cu cera un areglo di pago, lo por reconecta e cliente su servicio.