Bo ta integro…? Bisa kico bo lo haci…

Nos por experimenta atrobe un ‘take-over’ di un partido politico cu a keda elimina pa loke ta su promer bida como partido. Un partido manera PPA, un tempo e partido cu mas apoyo popular di tur tempo na Aruba, ta conoce awor pa di dos biaha un reactivacion na man di politico cu no tin ningun relacion cu e papel historico di e partido. Esey ta haci naturalmente cu cualkier referencia na e pasado glorioso di e partido actualmente no tin ningun relevancia. Esnan cu ta maneha e asociacion awor aki si por tin nan propio merito, pero esey lo mester resulta na december den e proximo eleccion. Ta bon pa recorda tambe cu e promer intento pa reactiva e partido den ultimo eleccion tampoco a resulta den logra drenta parlamento.

Esey ta trece nos na evaluacion di e propio merito cu mester resulta den suficiente voto. Esey no lo resulta facil, ya cu e lider di partido a tuma e paso inusual aki di activa e partido antiguo, pasobra su propio partido no a logra registracion na tempo pa bay eleccion. Tambe e lider politico aki tabatin caba un partido unda e tabata e titular principal, cu a kibra a consecuencia di corupcion interno, cu a conduci tambe na retiro di e anterior gabinete di coalicion. Banda di esey e lider mes tin un caso penal pendiente cu lo conoce su promer sesionnan na november proximo. Independiente di e resultado di e huicio penal aki, e hecho di ta envolvi den un caso penal como ministro no ta recomendacion pa gana voto popular. Pa tur loke ta menciona aki nos no ta mira directamente ningun valor agrega den e ‘takeover’ di e partido cu pasado ‘glorioso’, cu definitivamente ta pertenece na pasado.

Ademas di esey nos ta mira un aglomeracion bastante grandi di partido chikito den proximo eleccion unda lo ta sumamente dificil pa logra asiento den parlamento. Te awor no ta mira señal di disposicion pa colabora cu otro partido chikito pa forma un bloque grandi cu por enfrenta e dos partidonan cu tradicionalmente un base popular fuerte.

E aspecto di algun relacion cu delincuencia den partido, manera referi den e caso menciona, no ta un problema solamente pa e lider di e partido nobo/bieu referi anteriormente. Por cierto tur dos e partidonan grandi tin un problema pa splica ta dicon den nan seno tabata asina facil pa opera como ministro delincuente, mientras ademas no a scucha nunca cu a haci un esfuerzo pa elimina e posibilidadi di e tipo di delincuencia ey na e nivel gubernamental mas halto, a traves di medida interno cu mester garantiza integridad y combati corupcion. Nos ta rumbo pa cinco caso di ministro involucra den caso penal, loke ta parce nos demasiado pa un teritorio asina chikito manera nos ta.

E pregunta ta kico nos por spera den campaña pa loke ta e tema aki di integridad. Nos por bisa awor caba cu tur sin excepcion lo bisa cu nan ta integro y lo demostra esey tambe, basta nos vota pa nan. Esey no necesariamente lo ta un mentira pero por lo menos lo ta recomendable pa informa ta con nan ta desea di duna contenido na e tarea di vigilancia pa preveni corupcion. Nos no kier ta pesimista pero nos ta kere cu aki e conversacion lo pega. Casi nunca den e ultimo 30 aña nos a topa politico cu por duna detaye di e forma con nan lo preveni corupcion den nan propio seno. Mas bien nos a mira un continuacion di e secretismo den cual nan ta opera, cu ta haci nan plan di opera di forma coruptivo mas facil, dunando proteccion tambe na nan ‘hendenan di confianza’ cu ta ehecuta e partinan mas sensitivo y confidencial di nan plan di gobernacion. Esey a conduci por ehemplo, hustamente den e caso di e ministerio di e ministro menciona anteriormente, na e descubrimento di empleado publico cu no mester a presenta na trabao, e famoso ‘ambtenaarnan spiritu’ cu e ministro a defende cu alma y cuerpo. Den e caso reciente di e conflicto cu taxista tambe nos por a mira cu pa cierto politiconan di e partido grandi den coalicion tabata mas importante defende corupcion cu permiso, cu habri y sanea henter e sistema y duna acceso na tur ciudadano igual oportunidad. Ta parce nos cu bay puntra nan awor ta con concretamente nan ta bay cumpli cu presenta metodo contundente di preveni corupcion ta mescos cu puntra nan pa bandona nan practica di decadas di net lo contrario.

Pasando pa e otro partido, no asina grandi mas, aunke esey lo depende di e resultadonan di proximo eleccion, nos por observa cu e ex-ministro cu a caba di scucha un sentencia di cuatro aña pa practica coruptivo, lo desisti di un continuacion di su carera politico y a propone su yiu como sucesora. Esey ta mustra elogiable, pero lo tabata mihor si su consideracion di ‘etica politico y moral’ por a yega na su consenshi algun aña pasa caba. Pa loke ta su partido, te awe no por a mira ningun paso pa demostra publicamente cu e partido a tuma rienda pa evita cu un serie di ministro ta cay den tentacion y ta anda na forma incorecto cu propiedad di pueblo. Ser integro ta simplemente loke bo supuestamente ta siña na cas, si tur cos ta bon: “Loke no ta di bo, laga para…”

Finalmente, na tur partido: ken ta coopera pa cambia Constitucion pa evita cu atrobe lo tin parlamentario cu asiento, mientras nan ta condena penalmente caba…?